ചൂതാട്ടങ്ങളുടെ നാട്... കസീനോകളുടെയും... രാവുകളെപ്പോലും പകലാക്കി നിര്ത്തുന്ന മക്കാവൂ എന്നും സഞ്ചാരികള്ക്ക് കൗതുകമുണര്ത്തുന്ന നാടാണ്. ഏഷ്യയിലെ ലാസ് വേഗാസ് എന്നും ചൈനയിലെ ലാസ് വേഗാസ് എന്നുമെല്ലാം അറിയപ്പെടുന്ന ഇവിടുത്തെ ചൂതാട്ട കേന്ദ്രങ്ങള്ക്കും പയറ്റിത്തെളിഞ്ഞ കളികള്ക്കും ആരാധകര് ഏറെയുണ്ട്.
കസിനോകളും ചൂതാട്ടങ്ങളും തന്നെയാണ് മക്കാവുവിന്റെ ജീവന്. ചൂതാട്ടത്തിലൂടെ ഭാഗ്യം നേടാനും പരീക്ഷിക്കുവാനും ലക്ഷക്കണക്കിന് ആളുകള് ലോകത്തിന്റെ വിവിധ ഭാഗങ്ങളില് നിന്നും ഇവിടെയെത്തുന്നു. ലാസ് വേഗാസിന് ഒപ്പം തന്നെ വളര്ന്നു മുന്നേറുന്ന മക്കാവുവില് മാത്രമാണ് നിയമവിധേയമായി ചൂതാട്ടം നടത്തുവാന് ചൈനയില് അനുമതിയുള്ളതും. എന്തൊക്കെയായലും ചൂതാട്ടം എന്ന ഒറ്റവാക്കില് മാത്രം ഒതുങ്ങി നില്ക്കുന്നതല്ല ഈ നാടിന്റെ കഥ. സമ്പന്നമായ ചരിത്രം ഈ നാടിനുമുണ്ട്. ചൂതാട്ടത്തിന്റെ ലോകതലസ്ഥാനമായ മക്കാവുവിനെക്കുറിച്ചും അതിന്റെ പ്രത്യേകതകളും രസകരമായ വിവരങ്ങളും വായിക്കാം
മക്കാവു എന്ന ലോകപൈതൃക തലസ്ഥാനം
നേരത്തെ സൂചിപ്പിച്ചപോലെ പോര്ച്ചുഗീസിന്റെ ഒരു സ്വാധീനം ഇന്നും ഇവിടെ കാണാം. ആ കാലത്തെ പല നിര്മ്മിതികളും ഇവിടെ ഇന്നും നിലനില്ക്കുന്നു. കൊളോണിയൽ ശൈലിയിലുള്ള വാസ്തുവിദ്യ ഇവിടെ ധാരാളം കാണാം. 2005-ൽ മക്കാവു ചരിത്ര കേന്ദ്രം യുനെസ്കോയുടെ ലോക പൈതൃക പട്ടികയിൽ ഇടം നേടിയ സ്ഥലം കൂടിയാണിത്.
കൂടാതെ സെന്റ് പോൾസ് പള്ളിയുടെ അവശിഷ്ടങ്ങള്, മക്കാവു ടവർ, അമാ ടെംപിൾ എന്നിവ ഇവിടെ കാണാം.
ലോകത്തിലെ ഏറ്റവും ഉയരം കൂടിയ ബംഗി ജമ്പ്
ലോകത്തിലെ ഏറ്റവും ഉയരം കൂടിയ വാണിജ്യ ബംഗി ജമ്പ് മക്കാവുലാണ് സ്ഥിതി ചെയ്യുന്നത്. കാസിനോകളും ചൂതാട്ടകേന്ദ്രങ്ങളും മാത്രമേ ഇവിടെയുളളുവെന്ന് ചിന്തിക്കുന്നവര്ക്ക് മാറിച്ചിന്തിച്ച് വരുവാനുള്ള പല കാരണങ്ങളിലൊന്നാണ് ലോകത്തിലെ ഏറ്റവും ഉയരം കൂടിയ ബംഗി ജമ്പ്. മക്കാവു ടവറില് വെച്ചാണ് ഇത് നടക്കുന്നത്. 233 മീറ്റർ (764 അടി) ഉയരത്തില് നിന്നുമാണ് ഇവിടെ ബംഗീ ജമ്പിങ് നടത്തുന്നത്. ഫ്രീ ഫാളിന്റെ ഏറ്റവും സാഹസികമായ അനുഭവം ഇവിടെ ലഭിക്കുന്നു. സ്കൈവാക്ക്, സ്കൈജംപ് പോലുള്ള കാര്യങ്ങള്ക്കും മക്കാവു ടവറില് അവസരമുണ്ട്.
ഏറ്റവും സമ്പന്നമായ രണ്ടാമത്തെ പ്രദേശം
ലോകത്തിലെ ഏറ്റവും സമ്പന്നമായ രണ്ടാമത്തെ പ്രദേശമാണ് മക്കാവു. ഇന്റർനാഷണൽ മോണിറ്ററി ഫണ്ടിന്റെ 2017 ഒക്ടോബറിലെ കണക്കനുസരിച്ച്, ഭൂമിയിലെ ഏറ്റവും സമ്പന്നമായ രണ്ടാമത്തെ രാജ്യം/പ്രദേശമാണ് മക്കാവു. പ്രതിശീർഷ ജിഡിപി 114,430 യുഎസ് ഡോളറാണ്. കൂടാതെ, മക്കാവുവിന് പൊതുകടം പൂജ്യവും 2016 അവസാനത്തോടെ 55 ബില്യൺ യുഎസ് ഡോളറിന്റെ സാമ്പത്തിക കരുതൽ ശേഖരവുമുണ്ട്.