മാനന്തവാടി....പഴശ്ശിയുടെ പഴശ്ശിയുടെ പടവാളിന്റെ മൂർച്ചയറിഞ്ഞ നാട്... ബ്രിട്ടീഷുകാരുടെ ആധിപത്യ ഭരണത്തിന്റെ അടയാളങ്ങളും ഗോത്ര ജനതയുടെ പാരമ്പര്യവും ഒരു നാടിൻറെ ചരിത്രവുമെല്ലാം അതേപടി ഇന്നും സംരക്ഷിക്കുന്ന മാനന്തവാടി വയനാട്ടിലെ ഏറ്റവും പ്രധാനപ്പെട്ട പട്ടണങ്ങളിലൊന്നാണ്. കബനി നദിയുടെ തിരുനെല്ലിയുമെല്ലാം അതിർത്തി തീർക്കുന്ന ഇവിടം പഴയ വയനാടിന്റെ ആസ്ഥാനം കൂടിയായിരുന്നു. പ്രകൃതി ഭംഗി കൊണ്ട് അനുഗ്രഹീതമായ മാനന്തവാടി വയനാട്ടിലെത്തുന്ന സഞ്ചാരികളുടെ ഇഷ്ടകേന്ദ്രം കൂടിയാണ്. മലയോരത്തിന്റ മനോഹാരിതയുമായി സന്ദർശകരെ കാത്തിരിക്കുന്ന മാനന്തവാടിയുടെ വിശേഷങ്ങളും ഇവിടുത്തെ പ്രധാനപ്പെട്ട സ്ഥലങ്ങളും അറിയാം...
മാനന്തവാടി എന്നാൽ
മാനെ എയ്ത വാടി എന്ന പേരിൽ നിന്നാണ് മാനന്തവാടി എന്ന സ്ഥലനാമം വന്നത് എന്നാണ് കരുതപ്പെടുന്നത്. മാനെ എയ്തു വീഴ്ത്തിയ ഇടം എന്നാണ് മാനന്തവാടി എന്നതിന്റെ അർഥം. ഇവിടുത്തെ അമ്പുകുത്തി മല എന്ന സ്ഥല നാമം ഈ വാദത്തെ ശക്തിപ്പെടുത്തുന്ന ഇടമാണ്.
എവിടെയാണ്
വയനാടിന്റെ ആസ്ഥാനമായ കൽപ്പറ്റയിൽ നിന്നും 28 കിലോമീറ്റർ അകലെയാണ് മാനന്തവാടി സ്ഥിതി ചെയ്യുന്നത്. തലശ്ശേരി-ബാവലി റോഡാണ് മാനന്തവാടിയുടെ കടന്നു പോകുന്ന പ്രധാന പാത.
ഹൊസങ്കുടി
ജൈനമതം കേരളത്തിൽ ശക്തിയാർജിച്ച ഇടങ്ങളിലൊന്നാണ് മാനന്തവാടി. അക്കാലത്ത് ഇവിടുത്തെ വരദൂരിയെ അനന്തനാഥ സ്വാനി ക്ഷേത്രത്തിൽ സൂക്ഷിച്ചിട്ടുള്ള ജലധാരാ ഫലകത്തിന്റ ഭാഗമായ ശാസനത്തിൽ മാനന്തവാടിയെ ഹൊസങ്കുടി എന്നാണ് പറഞ്ഞിരിക്കുന്നത്.
ബ്രിട്ടീഷുകാരുടെ കേന്ദ്രം
കേരളത്തിൽ ബ്രിട്ടീഷുകാർ തമ്പടിച്ചിരുന്ന സ്ഥലങ്ങളിലൊന്നായിരുന്നു മാനന്തവാടി. പഴശ്ശിരാജയെ കീഴടക്കുക എന്ന ലക്ഷ്യത്തിലാണ് ബ്രിട്ടീഷ് പട്ടാളം വയനാടൻ കുന്നുകൾ കയറി ഇവിടെ എത്തിയത്. പട്ടാള ബാരക്കുകൾ, കാൻറീൻ , പട്ടാള ക്ലബ് തുടങ്ങിയവയുടെ അവശിഷ്ടങ്ങൾ ഇന്നും മാനന്തവാടി പട്ടണത്തിന്റെ വിവിധ ഭാഗങ്ങളിലായി കാണാം.