തണുത്തുറഞ്ഞു കിടക്കുന്ന നദിയിലൂടെ നടന്നു പോകുന്ന, ലോകത്തിലെ ഏറ്റവും മനോഹരമായ ട്രക്കിങ്ങുകളിലൊന്നായ ചാദാർ ട്രക്കിങ്ങിനെക്കുറിച്ച് നമ്മൾ കേട്ടിട്ടുണ്ട്. ശൈത്യകാലത്തെ ഏറ്റവും 'ത്രില്ലിങ്' ട്രക്കിങ്ങുകളിലൊന്നായ ഇത് തണുത്തുറഞ്ഞ് കട്ടിയായി കിടക്കുന്ന സന്സ്കാർ നദിയ്ക്ക് മുകളിലൂടെയാണ് കടന്നു പോകുന്നത്. സാഹസിക സഞ്ചാരികൾ ഇപ്പോൾ തന്നെ ചാദാർ ട്രക്കിങ്ങിനൊരുങ്ങിക്കഴിഞ്ഞിട്ടുണ്ടാവും. എന്നാൽ ഇന്നത്തെ വിശേഷം ചാദാർ ട്രക്കിങ്ങില്ല. മറിച്ച് ഒരു മാരത്തോൺ ആണ്. അതും വെറും ഓട്ടമല്ല, ഇതുപോലെ തണുത്തു കട്ടിയായി കിടക്കുന്ന ഒരു തടാകത്തിലു മുകളിലൂടെയുള്ള ഓട്ടം! പാൻഗോങ് ഫ്രോസൺ ലേക്ക് മാരത്തോണ്. ലഡാക്കിൽ ഇനി കാത്തിരിക്കുവാനുള്ള ഇവന്റുകളിലൊന്നായി ഇപ്പോൾ തന്നെ മാറിക്കഴിഞ്ഞു! പാൻഗോങ് ഫ്രോസൺ ലേക്ക് മാരത്തോണ് എന്താണെന്നും ഇതിന്റെ പ്രത്യേകതകളും വിശേഷങ്ങളും എന്തൊക്കെയാണെന്നും നോക്കാം...
പാംഗോങ്
4350 മീറ്റര് ഉയരത്തിൽ സ്ഥിതി ചെയ്യുന്ന ഈ തടാകത്തിന്റെ ആകെ നീളം 134 കിലോമീറ്റര് ആണ്. അതിൽ 35 കിലോമീറ്റര് ഇന്ത്യയിലും ബാക്കി വരുന്ന 90 കിലോമീറ്റര് ദൂരം ചൈനയിലുമാണ് കിടക്കുന്നത്. പല കാരണങ്ങളാൽ തടാകത്തിന്റെ നിറം മാറുന്നതായും പറയപ്പെടുന്നു. പച്ചയും നീലയും ചുവപ്പും നിറങ്ങളിൽ തടാകത്തെ കാണാം. ലോകത്തിലെ ഏറ്റവും ഉയരത്തിലുള്ള തടാകങ്ങളിലൊന്നായ ഇത് ഉപ്പുവെള്ള തടാകം കൂടിയാണ്.
ശൈത്യകാലത്ത് വെള്ളം കട്ടിപിടിച്ചു കഴിയുമ്പോള് ആളുകൾ ഇവിടെ ഐസ് സ്കേറ്റിങ് നടത്തുന്നത് സ്ഥിരം കാഴ്ചയാണ്.
ഇത്രയും ഉയരത്തിൽ സ്ഥിതി ചെയ്യുന്ന തടാകത്തിന് മറ്റുപല പ്രത്യേകതകളും ഉണ്ട്. ഉപ്പുജല തടാകമായതിനാൽ ഇതിൽ മത്സ്യങ്ങളോ മറ്റു ജീവികളോ വളരില്ല.വെള്ളത്തിൽ സസ്യങ്ങളുടെ സാന്നിധ്യവുമില്ല. മറ്റൊരു കാര്യം, ഇവിടെ വെള്ളത്തിന് ഒഴുക്കില്ല എന്നതാണ്. സ്ഥിരമായി നിലകൊള്ളുന്ന വെള്ളമാണ് പാംഗോങ് തടാകത്തിലുള്ളത്.