യാത്രകള് പ്ലാന് ചെയ്യുമ്പോള് ഏറ്റവും കുറഞ്ഞ ചിലവില് എങ്ങനെ പോകാം എന്നാണ് മിക്കവരും ആലോചിക്കുന്നത്... മുന്കൂട്ടി ടിക്കറ്റ് ബുക്ക് ചെയ്തും ഓഫറുകള് ഉപയോഗിച്ചുമെല്ലാം നമ്മള് പരമാവധി യാത്ര കുറഞ്ഞ ബജറ്റിലൊതുക്കുകയും ചെയ്യും. ഇതാ ഊട്ടിയിലേക്ക് പോകുന്നവര്ക്ക് പരീക്ഷിക്കുവാന് പറ്റിയ ഒരു യാത്രയുണ്ട്. പോക്കറ്റ് കാലിയാകില്ല എന്നു മാത്രമല്ല, വ്യത്യസ്തമായ ഒരനുഭവം കൂടി നല്കുന്ന യാത്രയായിരിക്കും കെഎസ്ആര്ടിസിയുടെ സൂപ്പര് ഫാസ്റ്റ് ബസിലുള്ള ഈ യാത്ര.
ഒറ്റദിവസം കൊണ്ട് പോയിവരാം
ഒരു രാത്രി ഊട്ടിയില് ചിലവഴിക്കുവാന് താല്പര്യമില്ലാതെ ഒറ്റ പകല് കൊണ്ട് പോയി വരാവുന്ന വിധത്തിലും പ്ലാന് ചെയ്യാം. 11 മണിക്കു ഊട്ടിയിലേക്ക് പോകുന്ന ബസ് അതിനു മുന്പായി അതിരാവിലെ ഗൂഢല്ലൂരിന് സര്വ്വീസ് നടത്തുന്നുണ്ട്. പുലര്ച്ചെ 4 മണിക്ക് മലപ്പുറത്തു നിന്നും പുറപ്പെട്ട് ഏഴുമണിയോടെ ബസ് ഗൂഢല്ലൂരിലെത്തും. ഇങ്ങനെ പോയി ഗൂഢല്ലൂരില് നിന്നും ഏഴുമണിയോടെ ഊട്ടിയിലേക്ക് ബസ് പിടിച്ചാല് ഊട്ടിയിലെത്തി കാഴ്ചകള് കണ്ട് വൈകിട്ടത്തെ ബസില് മലപ്പുറത്തിനു തിരികെ പോവുകയും ചെയ്യാം.
ഊട്ടി ടൂര് പാക്കേജ്
ഇത് കൂടാതെ അവധി ദിവസങ്ങളില് മലപ്പുറത്തു നിന്നും ഊട്ടിയിലേക്ക് ഒറ്റ ദിവസത്തെ ബജറ്റ് യാത്രയും ഒരുക്കിയിട്ടുണ്ട്. അതിരാവിലെ നാല് മണിക്ക് മലപ്പുറം കെഎസ്ആര്ടിസി സ്റ്റാന്ഡില് നിന്നും ആരംഭിക്കുന്ന യാത്ര മഞ്ചേരി, നിലമ്പൂർ, വഴിക്കടവ്, നാടു കാണിച്ചുരം, ഗൂഡല്ലൂർ വഴി രാവിലെ 10ന് ഊട്ടിയിൽ എത്തും. ബസ് ചാര്ജ്, പോകുന്ന സ്ഥലങ്ങളിലെ പ്രവേശന ചാര്ജ് എന്നിവ ഉള്പ്പെടെ ഒരാളില് നിന്നും 750 രൂപ വീതമാണ് ഈടാക്കുന്നത്. നീഡിൽ വ്യൂ പോയിന്റ്, ഷൂട്ടിങ് പോയിന്റ്, ബോട്ട് ഹൗസ്, ചിൽഡ്രൻ പാർക്ക്, ബൊട്ടാണിക്കൽ ഗാർഡൻ എന്നീ സ്ഥലങ്ങള് യാത്രയില് സന്ദര്ശിക്കും.