ഫ്രഞ്ച് ആധിപത്യത്തിന്റെ അടയാളങ്ങള് ഇന്നും സൂക്ഷിക്കുന്ന പോണ്ടിച്ചേരി സഞ്ചാരികള്ക്കു പ്രിയപ്പെട്ട ലക്ഷ്യസ്ഥാനമാണ്. കെട്ടിടങ്ങളില് മുതല് രുചികളില് വരെ ഇന്നും ഫ്രഞ്ച് തനിമയുള്ള ഇവിടം നിങ്ങളുടെ യാത്രകളില് ഒരിക്കലെങ്കിലും സന്ദര്ശിച്ചിരിക്കേണ്ട ഇടമാണ്. ക്രിസ്ത്യന് ദേവാലയങ്ങളും മ്യൂസിയങ്ങളും ബീച്ചും ഓറോബില്ലും ഫ്രഞ്ച് ശൈലിയിലുള്ള കെട്ടിടങ്ങളുമെല്ലാം ഫ്രാന്സിലെത്തിയ പ്രതീതി കുറച്ചൊക്കെ സഞ്ചാരികള്ക്ക് നല്കുകയും ചെയ്യും...
ഭക്ഷണം
ഭക്ഷണപ്രിയരായ ആളുകളെ സംബന്ധിച്ചെടുത്തോളം സാധ്യതകളുടെ ഒരു നാടാണ് പോണ്ടിച്ചേരി. ഫ്രഞ്ച് രുചികള് വിളമ്പുന്ന കഫേകളും അവയുടെ ആംബിയന്സും സെറ്ര് അപ്പുമാണ് ഇവിടുത്തെ പ്രധാന ആകര്ഷണം. ഇത്തരം ഇടങ്ങളില് ചിലവ് അല്പം കൂടുതലായിരിക്കുമെങ്കിലും ഒരു തവണയെങ്കിലും തീര്ച്ചയായും ഇത് ട്രൈ ചെയ്യണം. ഇത്തരം ഇടങ്ങളിലെ ഭക്ഷണത്തിന് കുറഞ്ഞത് 800 രൂപ മുതല് 1500 രൂപ വരെയെങ്കിലും ഒരു ദിവസം ചിലവാകും. സാധാരണ ഹോട്ടലുകളെയും സ്ട്രീറ്റ് ഫൂഡിനെയും ആശ്രയിച്ചാല് 100 മുതല് 200 രൂപ വരയെ ചിലവാകൂ.
യാത്രകള്
പോണ്ടിച്ചേരിയെ അടുത്തറിയണെങ്കില് ഇതിലൂടെ കറങ്ങിയേ തീരൂ. ഡ്രൈവിങ് ലൈസന്സ് ഉള്ളയാളാണെങ്കില് ഇവിടെ നിന്നും ഇരുചക്ര വാഹനം വാടകയ്ക്കെടുത്ത് കറങ്ങാം. ഓട്ടോയെയും ടാക്സികളെയും ആശ്രയിക്കുന്നതിനേക്കാള് എളുപ്പവും മികച്ചതും ഇതായിരിക്കും. 300 രൂപ മുതല് പോണ്ടിച്ചേരിയില് സ്കൂട്ടറുകളും ബൈക്കുകളും വാടകയ്ക്ക് ലഭിക്കും.
ബീച്ചുകള്
പോണ്ടിച്ചേരിയിലെ ഏറ്റവും പ്രധാന കാഴ്ച ഇവിടുത്തെ ബീച്ചുകള് തന്നെയാണ്.
പാരഡൈസ് ബീച്ച്, സെറിനിറ്റി ബീച്ച്, ഓറോവില് ബീച്ച്, പ്രോമനേഡ് ബീച്ച് എന്നിങ്ങനെ നാല് ബീച്ചുകളാണ് ഇവിടെ പ്രധാനമായും ഉള്ളത്. ഇതില് പ്രോമനേഡ് ബീച്ച് ഒഴികെയുള്ളവയെല്ലാം ആല്പം ദൂരത്തായാണ് സ്ഥിതി ചെയ്യുന്നത്. വാര് മെമ്മോറിയല്, ജോന് ഓഫ് ആര്ക്ക് പ്രതിമ, ടൗണ് ഹാള്, പഴയ ലൈറ്റ് ഹൗസ്, ഗാന്ധി പ്രതിമ, ഡൂപ്ലെക്സ് പ്രതിമ എന്നിങ്ങനെ നിരവധി പ്രതിമകളുടെ കാഴ്ച പ്രോമനേഡ് ബീച്ചില് കാണാം.
ഓറോവില്ല
വര്ണ്ണവര്ഗ്ഗലിംഗ ഭേദങ്ങളില്ലാതെ മനുഷ്യനെ മനുഷ്യനായി മാത്രം കാണുന്ന ഇടങ്ങളിലൊന്നാണ് പോണ്ടിച്ചേരിയിലെ ഓറോവില്ല. വിവിധ രാജ്യങ്ങളില് നിന്നുള്ളവര് ഒരേ മനസ്സോടെ ജീവിക്കുന്ന ഓറോവില്ല പോണ്ടിച്ചേരി യാത്രയില് ഒരിക്കലും ഒഴിവാക്കരുതാത്ത ഇടമാണ്. 2000 ഏക്കർ സ്ഥലത്താണ് ഓറോവിൽ സ്ഥിതി ചെയ്യുന്നത്. അൻപതിന് അടുത്തുള്ള രാജ്യങ്ങളിൽ നിന്നാണ് 120 സെറ്റിൽമെന്റുകളിലായി 2100 ആളുകൾ ഇവിടെ താമസിക്കുന്നുണ്ട്
മാത്രി മന്ദിർ ഇവിടെ മറക്കാതെ കാണണം.