പ്രത്യേകിച്ച് ഒരു പരിചയപ്പെടുത്തലിന്റെ ആവശ്യമില്ലാത്ത ഇടമാണ് രാജ്ഘട്ട്. രാഷ്ട്ര പിതാവായ മഹാത്മാ ഗാന്ധിയുടെ സ്മരണകളുറങ്ങുന്ന ഇവിടം ഭാരതത്തിലെ ഏറ്റവും പാവനമായ ഇടങ്ങളിലൊന്നായാണ് കരുതപ്പെടുന്നത്. അഹിംസയിലധിഷ്ഠിതമായ സത്യാഗ്രഹ മാർഗ്ഗങ്ങളിലൂടെ, രാജ്യത്തിന്റെ സ്വാതന്ത്ര്യത്തിനു വേണ്ടി പൊരുതിയ രീതികളിലൂടെ, ലോകം ക്ഷമയോടെ കേൾക്കുന്ന വാക്കുകളിലൂടെ ഒക്കെയും എന്നും ഗാന്ധിി ഓർമ്മിക്കപ്പെടുന്നു. ഏതു സാഹചര്യത്തിലും, കടന്നു പോകുവാൻ എത്ര പാടുപെടേണ്ടി വന്നാലും, സ്വന്തം ആദർശങ്ങളെ ചേർത്തു പിടിച്ച അദ്ദേഹത്തിന്റെ സ്മരണകളുറങ്ങുന്ന രാജ്ഘട്ടിന് ചരിത്ര സ്ഥാനം എന്നതിലുപരിയായി പല പ്രത്യേകതകളുമുണ്ട്...
ഇനി ഡെൽഹി വരെ പോയി രാജ്ഘട്ട് കാണുവാൻ സാധിക്കാത്തവർക്ക് ഓൺലൈനിൽ കാണുവനും അവസരമുണ്ട്. നേരിട്ടു കാണുന്ന അതേ വ്യക്തതയോട് കൂടി തന്നെ പനോരമിക് കാഴ്ചയിലാണ് രാജ്ഘട്ടിന്റെ വ്യൂ ഒരുക്കിയിരിക്കുന്നത്. http://www.p4panorama.com/panos/rajghat/index.html ലിങ്കില് ക്ലിക് ചെയ്താല് രാജ്ഘട്ടിന്റെ വിവിധ ഭാഗങ്ങളുടെ വ്യത്യസ്ത ആംഗിളിൽ നിന്നുള്ള കാഴ്ചകൾ കാണാം.
വർഷത്തിൽ എല്ലാ ദിവസങ്ങളിലും ഇവിടെ പ്രവേശനം അനുവദനീയമാണ്. വർഷത്തിൽ എല്ലാ ദിവസവും ഇവിടം സന്ദർശകർക്കായി തുറന്നിരിക്കുന്നു. എന്നാല് ലോക നേതാക്കളും മറ്റും സന്ദര്ശിക്കുന്ന അവസരങ്ങളിൽ സുരക്ഷാ കാരണങ്ങളാൽ പ്രവേശനത്തിന് തടസ്സമുണ്ടായേക്കും. പ്രവേശനം സൗജന്യമാണ്. ഏകദേശം ഒരു മണിക്കൂർ സമയം ചിലവഴിക്കുവാൻ സാധിക്കുന്ന രീതിയിൽ ഇവിടേക്കുള്ള യാത്ര പ്ലാൻ ചെയ്യാം.
റിംഗ് റോഡിനും യമുനാ നദിയുടെ തീരത്തിനും ഇടയിലായാണ് രാജ്ഘട്ട് സ്ഥിതി ചെയ്യുന്നത്. ജനപഥിൽ നിന്നും നാലു കിലോമീറ്റർ അകലെയുമാണ് ഇവിടം. പ്രഗതി മൈതാൻ മെട്രോ സ്റ്റേഷനാണ് ഏറ്റവും അടുത്തുള്ള മെട്രോ സ്റ്റേഷൻ.