ഷിമോഗ അഥവാ ശിവമൊഗ...മലയാളികൾക്ക് ഈ പേരു അത്ര അപരിചിതമായിരിക്കുവാൻ വഴിയില്ല. കണ്ണൂരിൽ നിന്നും കാസർകോഡു നിന്നും വയനാടു നിന്നുമൊക്കെ കുടിയേറിയ നൂറുകണക്കിനു മലയാളികളുടെ നാടാണിത്.
കർണ്ണാടകയുടെ അരിപ്പാത്രമെന്നും അപ്പക്കൊട്ടയെന്നുമൊക്കെ അറിയപ്പെടുന്ന ഇവിടം വിനോദസഞ്ചാരികൾക്ക് സ്വർഗ്ഗമാണ്.
തീർഥാടന കേന്ദ്രങ്ങളും വെള്ളച്ചാട്ടങ്ങളും മനോഹരമായ കൃഷിഭൂമികളും ഒക്കെയായി സഞ്ചാരികൾക്ക് എന്നും കൗതുകമൊരുക്കുന്ന ഈ നാട് ജീവിതത്തിലൊരിക്കലെങ്കിലും കണ്ടിരിക്കേണ്ടതാണ്.
അഗുംബൈയു തവരക്കുപ്പെയും കുടജാദ്രിയും ശൃംഗേരിയും ഒക്കെ ഇവിടെ എത്തുന്നവർക്ക് നൽകുന്നത് പരിധിയില്ലാത്ത കാഴ്ചകളാണ്. ഷിമോഗയിലെത്തിയാൽ ഉറപ്പായും കണ്ടിരിക്കേണ്ട ചില ഇടങ്ങളുണ്ട്...പരിചയപ്പെട്ടാലോ...
ഹൊന്നേമരഡു അഥവാ സുവർണ്ണ തടാകം ഇവിടുത്തെ പ്രധാനപ്പെട്ട മറ്റൊരിടമാണ്. സഞ്ചാരികൾക്കിടയിൽ തീർത്തും അറിയപ്പെടാത്ത ഇവിടം ശതാവരിയുടെ റിസർവ്വോയറിന്റെ ഭാഗമാണ്. ഈ നദിയുടെ കരയിലിരുന്ന് സൂര്യോദയവും സൂര്യാസ്തമയവും കാണുവാനാണ് ഇവിടെ കൂടുതലും ആളുകളെത്തുന്നത്.
ഹൈക്കിങ്ങ്, ബോട്ടിങ്ങ്, കയാക്കിങ്ങ്, വിൻഡ് റാഫ്റ്റിങ്, ട്രക്കിങ്ങ് ഒക്കെയാണ് ഇവിടുത്തെ പ്രധാന ആക്ടിവിറ്റികൾ.
കൊടുംകാടിനു നടുവിൽ സ്ഥിതി ചെയ്യുന്ന കുണ്ടാദ്രി ഷിമോഗിലെ പ്രസിദ്ധമായ ഒരു കുന്നാണ്. പശ്ചിമ ഘട്ടത്തോട് ചേർന്നു സ്ഥിതി ചെയ്യുന്ന ഇവിടെ 17-ാം നൂറ്റാണ്ടിലെ ജൈനക്ഷേത്രം, കുളം, വ്യൂ പോയിന്റ് എന്നിവയാണ് പ്രധാന കാഴ്ചകൾ. ഇവിടെ നിന്നും സമീപത്തെ കാടുകളിലേക്ക് ട്രക്കിങ്ങ് നടത്താറുണ്ട്.
ഷിമോഗയില് നിന്നും 14 കിലോമീറ്റർ അകലെ സ്ഥിതി ചെയ്യുന്ന സക്രൈബൈലു എലിഫന്റ് ക്യാംപ് കുറേ സമയം വിനോദപ്രദമായി ചിലവഴിക്കുവാൻ പറ്റിയ ഇടമാണ്. തുംഗ നദിയുടെ തീരത്ത് സ്ഥിതി ചെയ്യുന്ന ഈ ക്യാംപിൽ പിടിച്ചു കൊണ്ടുവന്ന് മെരുക്കുന്ന ആനകളാണുള്ളത്.
രാവിലെ 8.30 മുതൽ 11.30 വരെയാണ് ഇവിടെ പ്രവേശനം.
സൗത്ത് ഇന്ത്യയുടെ ചിറാപുഞ്ചി എന്നറിയപ്പെടുന്ന ഇടമാണ് അഗുംബെ. ലോകത്തിൽ ഏറ്റവുമധികം രാജവെമ്പാലകൾ അധിവസിക്കുന്ന ഇടവും ഇതുതന്നെയാണ്. മഴക്കാടുകളെക്കുറിച്ച് ഗവേഷണം നടത്താനുള്ള ഒരിടവും ഇവിടെയുണ്ട്. രാജവെമ്പാലകളുടെ തലസ്ഥാനം എന്നും ഇതറിയപ്പെടുന്നു.