യാത്ര പോകുമ്പോൾ കാണുന്ന സ്ഥലത്തോടൊപ്പം തന്നെ പ്രാധാന്യമുള്ളതാണ് ആ നാട്ടിലെ രുചികളും. നാടൻ ഭക്ഷണങ്ങൾ ഒരു നാടിന്റെ ചരിത്രത്തെയും സംസ്കാരത്തെയും നാവിന്റെ തുമ്പിൽ രുചികളായി കൊണ്ടു നിർത്തുകയാണ് ചെയ്യുന്നത്. മലബാറുകാരുടെ ഇറച്ചിപ്പച്ചിരിയും കോഴിക്കോടുകാരുടെ ഹൽവയും ആലപ്പുഴക്കാരുടെ താറാവ് കറിയും കോട്ടയംകാരുടെ കുടംപുളിയിട്ട മീനും തിരുവനന്തപുരംകാരുടെ ബോളിയും ഒക്കെ പറയുക ആ നാടിന്റെ രുചിഭേദങ്ങളെക്കുറിച്ചാണ്. അതുപോലെ തന്നെയാണ് കൊൽക്കത്തക്കാരുടെ കത്തിറോളും മുംബൈയിലെ വടാ പാവും വടക്കു കിഴക്കൻ ഇന്ത്യയിലെ മോമോസുമെല്ലാം ഇഷ്ടരുചികളിലേക്കെത്തുന്നത്.
ഇതേ ഭക്ഷണം തന്നെയാണ് യാത്രകളിൽ ഏറ്റവുമധികം പ്രതിസന്ധിയുണ്ടാക്കുന്ന കാര്യവും. ഭക്ഷണ നിയന്ത്രണത്തിൽ ശ്രദ്ധിക്കുന്നവരാണെങ്കിൽ പറയുകയും വേണ്ട. രുചിതേടിയുള്ള ഇത്തരം രീതികൾ ചിലപ്പോൾ ആരോഗ്യ പ്രശ്നങ്ങളിലേക്കും അമിത വണ്ണത്തിലേക്കുമായിരിക്കും നയിക്കുക. എന്നാൽ യാത്രയിൽ എത്ര ഭക്ഷണം കഴിച്ചാലും ചില പൊടിക്കൈകൾ അറിഞ്ഞാൽ അമിത വണ്ണം ഒരു പ്രശ്നമായി കരുതുന്നവർക്ക് കൂളായി പുറത്തുവരാം...