ട്രക്കിങ്ങിനിടയിലുള്ള അപകടങ്ങള് ഇപ്പോള് തുടര്ക്കഥയാവുകയാണ്. കാടിനുള്ളില് ഒറ്റപ്പെട്ടു പോകുന്നതും മൃഗങ്ങളുടെ അക്രമങ്ങള്ക്ക് ഇരയാകുന്നതും ഒക്കെ ഒരു വാര്ത്ത അല്ലാതായിരിക്കുന്നു. കഴിഞ്ഞ ദിവസമാണ് തേനിക്ക് അടുത്തുള്ള കുരങ്ങിണി മലയില് സഞ്ചാരികള് കാട്ടുതീയില് പെട്ടതും സഞ്ചാരികള് മരിച്ചതും. സാധാരണയായി കാടുകളില് ട്രക്കിങ്ങിനു പോകുമ്പോള് ശ്രദ്ധിക്കേണ്ട കാര്യങ്ങള് മനസ്സിലാക്കാം. ഇനിയുള്ള യാത്രകള് സുരക്ഷാ മുന്കരുതലുകള് എടുത്തിട്ടുള്ളവ മാത്രം ആയിരിക്കണമെന്ന് നമുക്ക് ഉറപ്പിക്കുകയും ചെയ്യാം...
തനിയെ യാത്ര ചെയ്യാതിരിക്കുക
തനിച്ചുള്ള യാത്രകള് കൂടുതലും ഒഴിവാക്കാന് ശ്രമിക്കുക. വനത്തിലൂടെയുള്ള യാത്രകള് പ്രത്യേകിച്ചും. വനത്തിലൂടെയുള്ള യാത്രകളില് വഴി തെറ്റാനും അപകടങ്ങള് ഉണ്ടാകുവാനും സാധ്യത ഏറെയാണ്. വന്യമൃഗങ്ങള് മുതല് കാട്ടുതീ വരെ വില്ലനായി എത്തുന്ന വനയാത്രകളില് ഒറ്റയ്ക്കാണെങ്കില് ഉള്ള കാര്യം പറയുകയേ വേണ്ട. അതിനാല് ഇത്തരം യാത്രകള് പരിചയ സമ്പന്നരായ ടീമിനോടും ഗൈഡിനോടും ഒപ്പം ചെയ്യാന് ശ്രദ്ധിക്കുക.
യാത്ര എവിടേക്ക് ആണെങ്കിലും എല്ലാവരും കയ്യില് ഫോണ് കരുതും. ഇതിലെ ജിപിഎസ് സിസ്റ്റം വഴി തെറ്റിക്കില്ല എന്ന ഉറപ്പില് യാത്ര തുടരുന്നവരാണ് കുടുതലും ആളുകള്. എന്നാല് വനങ്ങളിലേക്കുള്ള യാത്രയില് ഒട്ടും വിശ്വസിക്കാന് കൊള്ളാത്തവരാണ് മൊബൈല് ഫോണുകള്. കാടുകളില് സിഗ്നല് കവറേജ് ഇല്ലാത്തതും കൃത്യമായ വഴികള് ലഭ്യമല്ലാത്തതും യാത്രകളില് വലിയ പ്രശ്നം സൃഷ്ടിക്കും. അതുകൊണ്ട് തന്നെ കൃത്യമായി വഴി അറിയുന്ന ആളുകളുമായി വേണം യാത്ര പോകാന്.
മൃഗങ്ങളെ പ്രകോപിപ്പിക്കാതിരിക്കുക
കാട്ടിലേക്കുള്ള യാത്രകള് ഓരോന്നും കടന്നു കയറ്റമാണ്. ആ ഒരു ബോധ്യത്തില് മാത്രം യാത്ര തുടരുക. മാത്രമല്ല, യാത്രയ്ക്കിടയില് കാണുന്ന മൃഗങ്ങളെ പ്രകോപിപ്പിക്കാതെ ഇരിക്കുവാന് ശ്രദ്ധിക്കുക. യാത്രയ്ക്കിടയില് കാണുന്ന മൃഗങ്ങളുടെ ഫോട്ടോ എടുക്കാതിരിക്കാനും അവയ്ക്ക് ഭക്ഷണം കൊടുക്കാതിരിക്കാനും പ്രത്യേകം ശ്രദ്ധിക്കണം.
കാനനയാത്രകള് നടത്തുന്നവര് ഏറ്റവും കൂടുതല് ശ്രദ്ധിക്കേണ്ട ശ്രദ്ധിക്കേണ്ടതും പരിശീലിക്കേണ്ടതുമായ കാര്യങ്ങളില് ഒന്നാണ് നിശബ്ദത. കാടിനു തനതായ ഒരു ശബ്ദം ഉള്ളപ്പോള് അത് ആസ്വദിക്കാനാണ് സഞ്ചാരികള് ശ്രദ്ധിക്കേണ്ടത്. മാത്രമല്ല, നിശബ്ദരായി മുന്നേറുന്നത് കൂടുതല് മൃഗങ്ങളെ കാണാനും സഹായിക്കും. ചില അവസരങ്ങളില് ബഹളം കേട്ടെത്തുന്ന വന്യമൃഗങ്ങള് യാത്രകള്ക്ക് ഭീഷണിയായും തീരാറുണ്ട്.
യാത്രകളുടെ പൂര്ണ്ണതയായാണ് സെല്ഫികളെ പലരും കാണുന്നത്. അപകടകരമായ സാഹചര്യങ്ങളില് പോലും സെല്പി എടുക്കാന് പലരും ശ്രമിക്കുന്നതും അപകടത്തില്പെടുന്നതും നമ്മള് കാണാറുണ്ട്. അതിനാല് ഇനിയുള്ള യാത്രകളില് സെല്ഫി ഒഴിവാക്കാം.
ഏറ്റവും കുറച്ച് ലഗേജുമായി യാത്ര ചെയ്യുന്നത് തരുന്നത് പ്രത്യേക ഒരു സുഖമാണ്. അതുകൊണ്ടുതന്നെ യാത്രകള്ക്ക്, പ്രത്യേകിച്ച് ട്രക്കിങ്ങിന് പോകുമ്പോള് ബാഗ് കുത്തിനിറച്ചുകൊണ്ട് പോകാതിരിക്കാന് ശ്രദ്ധിക്കുക. അത്യാവശ്യമുള്ള വളരെ കുറച്ച്ു സാധനങ്ങള് മാത്രം ബാഗില് കരുതുക. ഭാരം കുറവുള്ള സാധനങ്ങള് ഉപയോഗിക്കുന്നത് പ്രത്യേക ഗുണം ചെയ്യും.
യാത്ര ചെയ്യുന്ന സ്ഥലവും യാത്രയ്ക്ക് എടുക്കുന്ന ദിവസങ്ങളും രീതിയും അനുസരിച്ച് പാക്കിങ്ങില് വ്യത്യാസം വരും.
ചെറിയ ബാക്ക് പാക്ക്, വാം ക്ലോത്ത്, ജാക്കറ്റ്, ട്രെക്ക് പാന്റ്, ഹൈക്കിങ് ഷൂ, ടോര്ച്ച്, സോക്സ്, ടവ്വല്, പുനരുപയോഗിക്കാവുന്ന വെള്ളക്കുപ്പി, സ്നാക്സ്, സോപ്പ്, അത്യാവശ്യ മരുന്നുകള്, പവ്വര് ബാങ്ക് തുടങ്ങിയവ മറക്കാതെ എടുക്കാന് ശ്രദ്ധിക്കുക.
കാട്ടിലേക്കുള്ള യാത്രകളില് ഒറ്റപ്പെട്ടു പോകുന്നത് അത്രവലിയ സംഭവമല്ലാതായി മാറിയിരിക്കുകയാണ് ഇപ്പോള്. അതുകൊണ്ടുതന്നെ എന്തെങ്കിലും കാരണത്താല് യാത്രയ്ക്കിടയില് കൂട്ടം തെറ്റി എന്നുറപ്പായാല് സമീപത്ത് തന്നെ മൃഗങ്ങള് ആക്രമിക്കാത്ത രീതിയിലുള്ള ഒരു ചെറിയ സ്ഥലം കണ്ടെത്തുക എന്നതാണ് പ്രധാനം. മനസ്സിനെ ശാന്തമാക്കി വയ്ക്കാന് ശ്രദ്ധിക്കുക. കഴിയുമെങ്കില് ഉറക്കെ ചൂളമടിക്കുക. ഇത് നിങ്ങളെ തിരഞ്ഞ് വരുന്നവര്ക്ക് കേള്ക്കാന് സാധിക്കുകയും പെട്ടന്നു തന്നെ രക്ഷപെടാന് കഴിയുകയും ചെയ്യും.
പോകുന്ന വഴികളും സ്ഥലവും കൃത്യമായി അറിഞ്ഞതിനു വേണം യാത്ര തുടങ്ങാന് എന്നത് പ്രത്യേകം പറയേണ്ട കാര്യം ഇല്ലാല്ലോ... ഇക്കൂട്ടത്തില് ശ്രദ്ധിക്കേണ്ട മറ്റൊരു കാര്യമാണ് രാത്രികാലങ്ങളിലെ യാത്ര ഒഴിവാക്കുക എന്നത്. പ്രത്യേകിച്ച് കാട്ടിലൂടെയുള്ള യാത്രകളില് രാത്രി കാലങ്ങളില് സഞ്ചരിക്കുന്നത് ആപത്ത് സ്വയം വിളിച്ചു വരുത്തുന്നതിന് തുല്യമായിരിക്കും എന്ന് ഓര്ക്കുക.
കാടിനുള്ളിലേക്ക് കടക്കുമ്പോള് കാടിനു യോജിച്ച നിറത്തിലുള്ള വസ്ത്രങ്ങള് ധരിക്കാന് ശ്രദ്ധിക്കുക. ഫ്ളൂറസെന്റ് ഉള്പ്പെടെയുള്ള കടുത്ത നിറങ്ങളുള്ള വസ്ത്രങ്ങളുമായി കാട്ടില് പോകാന് ശ്രമിക്കരുത്. പകരം കാടിന്റെ പച്ചപ്പുമായി ചേര്ന്നു പോകുന്ന തരത്തിലുള്ള വസ്ത്രങ്ങള് ഉപയോഗിക്കുക.