കടലിന്റെ മായികക്കാഴ്ചകൾ ഒളിപ്പിച്ചു വച്ചിരിക്കുന്ന പവിഴ ദ്വീപാണ് സഞ്ചാരികൾക്ക് ആൻഡമാൻ നിക്കോബാർ ദ്വീപസമൂഹം. കടലിന്റെ കാഴ്ചകളെ പ്രണയിക്കുന്നവർക്ക് ഒരിക്കലെങ്കിലും കണ്ടിരിക്കണമെന്ന് ആഗ്രഹിക്കുന്ന ഇവിടം പക്ഷേ, അത്ര എളുപ്പത്തിലൊന്നും ചെന്നുപറ്റാവുന്ന ഇടമല്ല. പ്രകൃതി സൗന്ദര്യവും വർണ്ണിക്കുവാൻ കഴിയാത്ത കാഴ്ചകളും ഒക്കെയായി സഞ്ചാരികൾക്ക് പുതിയ വാതിലുകൾ തുറന്നു കൊടുക്കുന്ന ആന്ഡമാൻ എല്ലാ അർഥത്തിലും മനോഹരമായ ഒരിടമാണ്. എന്നാല് മിക്കപ്പോഴും ഈ കാഴ്ചകളിൽ മാത്രമായി ആൻഡമാൻ ഒതുങ്ങിപ്പോകുന്നു എന്നത് യാഥാര്ഥ്യമാണ്.
കടലിനടിയിലെ കാഴ്ചകളും അത്ഭുതപ്പെടുത്തുന്ന പവിഴപ്പുറ്റുകളും ഒക്കെയുള്ള ഇവിടുത്തെ ദേശീയോദ്യാനങ്ങൾ ഇന്നും സഞ്ചാരികൾക്ക് അപരിചിതമാണ്. ഫോട്ടോഗ്രാഫർമാരുടെയും പരിസ്ഥിതി സ്നേഹികളുടെയും ഒക്കെ പ്രിയപ്പെട്ട ഒട്ടേറെ ദേശീയോദ്യാനങ്ങൾ ആൻഡമാനിലുണ്ട്. ഇന്ത്യൻ മഹാസമുദ്രത്തിൽ ചിതറിക്കിടക്കുന്ന ആൻഡമാൻ നിക്കോബാർ ദ്വീപസമൂഹത്തിലെ പ്രധാനപ്പട്ട ദേശീയോദ്യാനങ്ങളെ പരിചയപ്പെടാം.