പാരീസിൽ ഐഫൽ ടവർ കാണാനാണോ ഏറ്റവും ആഗ്രഹം? അതോ ഇസ്താംബൂളിലെ ഇടവഴികളിലൂടെ നടക്കുവാനോ? ഇതൊന്നുമല്ല, മസായി മാരയിലെ വൈൽഡ് ലൈഫ് സഫാരി ആസ്വദിക്കണോ?? യാത്രകളുടെ കാര്യത്തിൽ ഒരുപാട് ആഗ്രഹങ്ങളും സ്വപ്നങ്ങളുമുള്ളവരാണ് നമ്മൾ. എന്നാൽ പോക്കറ്റിലത്രയും പണം ഒറ്റയടിക്കു ചിലവാക്കുവാൻ പറ്റാത്തതിനാൽ യാത്രാമോഹങ്ങൾ തത്കാലത്തേയ്ക്ക് മാറ്റിവെച്ചിരിക്കുകയാണ് പലരും. എന്നാൽ ഒരുമിച്ച് ചിലവാക്കുവാൻ സാധിച്ചില്ലെങ്കിലും നിങ്ങളുടെ സ്വപ്നയാത്ര പോകുവാൻ ഒരു വഴിയുണ്ട്. ട്രാവൽ നൗ പേ ലേറ്റർ!
യാത്രകളിലെ ഏറ്റവും പുതിയ ട്രെൻഡുകളിലൊന്നാണ് ട്രാവൽ നൗ പേ ലേറ്റർ - Travel Now Pay Later. യാത്ര പോകുവാൻ ആവശ്യമായ മുഴുവൻ പണവും കയ്യിലില്ലെങ്കിലും നിങ്ങളുടെ യാത്രകൾ ഇതു സാധ്യമാക്കും. പകരം ഈ തുക ചെറിയ തവണകളായി തിരികെ അടച്ചാൽ മതി. ഇതാ 'ട്രാവൽ നൗ പേ ലേറ്റർ' എന്ന പദ്ധതിയെക്കുറിച്ചും ഇതു വഴി എങ്ങനെ പരമാവധി സൗകര്യങ്ങൾ ലഭ്യമാക്കാമെന്നും എങ്ങനെ യാത്ര ചെയ്യാമെന്നും വിശദമായി വായിക്കാം
തിരിച്ചടവിൽ ശ്രദ്ധിക്കാം
ട്രാവൽ നൗ പേ ലേറ്റർ ഉപയോഗിക്കുമ്പോൾ ശ്രദ്ധിക്കേണ്ട കാര്യങ്ങൾ നിരവധിയുണ്ട്. പെട്ടന്നുള്ള യാത്രകള്ക്ക് ഈ സൗകര്യം പ്രയോജനപ്പെടുത്തുന്നത് നല്ലതാണ്. എന്നാൽ രണ്ടോ മൂന്നോ മാസങ്ങൾക്കു ശേഷം പോകുവാൻ പ്ലാൻ ചെയ്യുന്ന യാത്രകൾ ഇങ്ങനെ ബുക്ക് ചെയ്യുന്നത് കൂടുതൽ സാമ്പത്തിക ബാധ്യതയുമുണ്ടാക്കും, കാരണം മിക്ക കമ്പനികളും ബുക്ക് ചെയ്തു തൊട്ടടുത്ത മാസം മുതല് തിരിച്ചടവ് ആരംഭിക്കാറുണ്ട്. അതിനാൽ യാത്ര ചെയ്യുന്ന സമയത്തോടടുപ്പിച്ച് ഈ സംവിധാനം വഴി ബുക്ക് ചെയ്യുന്നതാണ് നല്ലത്.
ഓരോ കമ്പനിക്കും ധനകാര്യസ്ഥാപനത്തിനും വ്യത്യസ്തമായയ തിരിച്ചടവ് രീതികളും പലിശയുമാണ് ഉള്ളത്. ട്രാവൽ നൗ പേ ലേറ്റർ വഴി പണമെടുക്കുന്നവർത്ത് ഒരു മാസം കഴിഞ്ഞു മുതൽ തന്നെ തിരിച്ചടവ് ആരംഭിക്കാം. 18 മാസം വരെ തിരിച്ചടവ് കാലാവധിയുണ്ട്. വാര്ഷിക പലിശ നിരക്ക് 13% മുതല് 30% വരെയാണ്.