സംസ്കാരത്തിന്റെയും പൈതൃകത്തിൻറെയും കാര്യത്തിൽ പാലക്കാടിന്റെ അത്രത്തോളം ഉയർന്ന നാടുകൾ കേരളത്തിൽ കുറവാണ്. തമിഴ്നാടുമായി ചേർന്നു കിടക്കുമ്പോളും മാറ്റമില്ലാത്ത സംസ്കാരങ്ങളും ആചാരങ്ങളുമായി നിലനിൽക്കുന്ന ഇവിടുത്തെ ക്ഷേത്രങ്ങളുടെ പ്രത്യേകത ഒന്നു വേറെ തന്നെയാണ്. ഒരു ശിവനെയും അഞ്ചു വിഷ്ണുവിനെയും പ്രതിഷ്ഠിച്ചിരിക്കുന്ന അഞ്ചുമൂർത്തി ക്ഷേത്രവും ചെളിയിൽ പ്രതിഷ്ഠിച്ചിരിക്കുന്ന ഭഗവതി ക്ഷേത്രവും ആയിരത്തിലധികം വർഷം പഴക്കമുള്ള പുരാതന ക്ഷേത്രങ്ങളും ഒക്കെ കൂടി പാലക്കാടിനെ വ്യത്യസ്തമാക്കുന്നു. പാലക്കാട് ജില്ലയിലെ പ്രത്യേകതകൾ നിറഞ്ഞ, എന്നാൽ ഏറെ അറിയപ്പെടാതെ കിടക്കുന്ന ക്ഷേത്രങ്ങളെക്കുറിച്ചറിയാം...
ചേറ്റിൽ വെട്ടിയ ഭഗവതി ക്ഷേത്രം
ചെളിയിൽ പൂണ്ട നിലയിൽ ദേവി വിഗ്രഹം സ്ഥിതി ചെയ്യുന്ന ക്ഷേത്രമാണ് ചേറ്റിൽ വെട്ടിയ ഭഗവതി ക്ഷേത്രം. സ്വയംഭൂ വിഗ്രഹമാണെന്ന് വിശ്വസിക്കുന്ന ഈ പുരാതന ക്ഷേത്രം ധോണിയിലാണ് സ്ഥിതി ചെയ്യുന്നത്.
കാച്ചാംകുറിശ്ശി മഹാവിഷ്ണു ക്ഷേത്രം
തമിഴ്നാട്ടിലെ ശ്രീരംഗം ക്ഷേത്രത്തിന് തുല്യമായി കണക്കാക്കപ്പെടുന്ന ക്ഷേത്രമാണ് കൊല്ലങ്കോടിന് സമീപം സ്ഥിതി ചെയ്യുന്ന കാച്ചാംകുറിശ്ശി മഹാവിഷ്ണു ക്ഷേത്രം. പുരാണത്തിലെ പ്രസിദ്ധ നദികളായ ഇക്ഷുമതിനദിയുടെയും ഗായത്രിനദിയുടെയും ഇടയിലാണ് ഈ ക്ഷേത്രം സ്ഥിതി ചെയ്യുന്നത് എന്നാണ് വിശ്വാസം.ഇന്നോളം കേരളത്തിൽ എവിടെ യാഗം നടക്കുകയാണെങ്കിലും സോമലത വെങ്കനാട് രാജാവിന്റെ പരമ്പരയിലുള്ളവർ കാച്ചാംകുറിശ്ശി ക്ഷേത്രസന്നിധിയിൽവെച്ചാണ് കൈമാറുന്നത്.
ലക്കിടിയിലെ കിള്ളിക്കുറിശ്ശിയിൽ സ്ഥിതി ചെയ്യുന്ന കിള്ളിക്കുറിശ്ശിമംഗലം മഹാദേവക്ഷേത്രം കേരളത്തിനിമ നിറഞ്ഞ വാസ്തുവിദ്യയ്ക്ക് പേരുകേട്ട ക്ഷേത്രമാണ്. ദക്ഷിണാമൂർത്തി ഭാവത്തിൽ ശിവനെ പ്രതിഷ്ഠിച്ചിരിക്കുന്ന ഈ ക്ഷേത്രം പരശുരാമന്റെ 108 ശിവക്ഷേത്രങ്ങളിൽ ഒന്നുകൂടിയാണ്.
പുരാവസ്തു വകുപ്പ് സംരക്ഷിത സ്മാരകമായി പ്രഖ്യാപിച്ചിരിക്കുന്ന കൈത്തളി ശിവക്ഷേത്രം കേരളത്തിലെ പുരാതന ക്ഷേത്രങ്ങളിലൊന്നു കൂടിയാണ്. പട്ടാമ്പിക്കടുത്ത് പെരിന്തൽമണ്ണ-ഷൊർണ്ണൂർ പാതയ്ക്കിടയിൽ സ്ഥിതി ചെയ്യുന്ന ഈ ക്ഷേത്രം ധാരാളം പ്രത്യേകതകളുള്ള ഒരു നിർമ്മിതിയാണ്.
ശിവക്ഷേത്രമാണെങ്കിലും സുബ്രഹ്മണ്യന് കൂടുതൽ പ്രാധാന്യം കൊടുത്തിരിക്കുന്ന ക്ഷേത്രമാണ് കൊടുമ്പ് മഹാദേവക്ഷേത്രം. ചിറ്റൂരിനടുത്ത് കൊടുമ്പിൽ സ്ഥിതി ചെയ്യുന്ന ഈ ക്ഷേത്രം പരശുരാമൻ പ്രതിഷ്ഠ നടത്തിയതാണെന്നാണ് വിശ്വാസം. തമിഴ് ശൈലിയിലാണ് ക്ഷേത്രം നിർമ്മിച്ചിരിക്കുന്നത്.
ഒരു ശിവനും നാല് വിഷ്ണുവും പ്രതിഷ്ഠിക്കപ്പെട്ടിരിക്കുന്ന അപൂർവ്വ ക്ഷേത്രമാണ് തിരുമിറ്റക്കോട് അഞ്ചുമൂർത്തി ക്ഷേത്രം. ഉയ്യവന്ത പെരുമാളായി വിഷ്ണുവിനെ ആരാധിക്കുന്ന ഈ ക്ഷേത്രം വൈഷ്ണവരുടെ 108 തിരുപ്പതികളിൽ ഒന്നു കൂടിയാണ്. പാണ്ഡവർ പ്രതിഷ്ഠിച്ച നാലു വിഷ്ണുപ്രതിഷ്ഠകളും പരശുരാമ പ്രതിഷ്ഠിതമായ ശിവലിംഗപ്രതിഷ്ഠയും ചേർന്ന് അഞ്ചുപ്രതിഷ്ഠാമൂർത്തികൾ ഇവിടെ കുടികൊള്ളുന്നു എന്നാണ് വിശ്വാസം.
തൃശൂർ വടക്കുംനാഥ ക്ഷേത്രത്തിന് തുല്യമെന്ന് വിശ്വസിക്കപ്പെടുന്ന ക്ഷേത്രങ്ങളിലൊന്നാണ് പട്ടാമ്പി തിരുവേഗപ്പുറയിൽ സ്ഥിതി ചെയ്യുന്ന തിരുവേഗപ്പുറ ശ്രീമഹാക്ഷേത്രം. പരമശിവൻ, പാർവ്വതീദേവി, മഹാവിഷ്ണു, ശങ്കരനാരായണൻ എന്നിവരാണ് ഇവിടുത്തെ പ്രധാന മൂർത്തികൾ. തൂതപ്പുഴയുടെ തീരത്ത് സ്ഥിതി ചെയ്യുന്ന ഈ ക്ഷേത്രം വളാഞ്ചേരിയിൽ നിന്നും അഞ്ച് കിലോമീറ്റർ അകലെയാണുള്ളത്.
പരശുരാമൻ പ്രതിഷ്ഠ നടത്തി എന്നു പറയപ്പെടുന്ന ഭാരതത്തിലെ തന്നെ പ്രസിദ്ധ ക്ഷേത്രങ്ങളിലൊന്നാണ് തൃത്താല മഹാദേവക്ഷേത്രം. അതിപുരാതനമായ ഈ ക്ഷേത്രത്തിൽ പന്തിരുകുലത്തിലെ മേഴത്തോൾ അഗ്നിഹോത്രി പ്രതിഷ്ഠ നടത്തിയതാണ് എന്നും ഒരു വിശ്വാസമുണ്ട്. ഒൻപതാം നൂറ്റാണ്ടിലാണ് ഇത് നിർമ്മിക്കപ്പെട്ടത് എന്നാണ് കരുതുന്നത്.
പാലക്കാട് തൃപ്പാളൂരിൽ ഗായത്രി പുഴയുടെ തീരത്ത് സ്ഥിതി ചെയ്യുന്ന ക്ഷേത്രമാണ് തൃപ്പാളൂർ മഹാദേവക്ഷേത്രം. നരസിംഹമൂർത്തി, ശ്രീകൃഷ്ണൻ എന്നിവരെ പ്രതിഷ്ഠിച്ചിരിക്കുന്ന ഇവിടം ശൈവ-വൈഷ്ണവ തേജസ്സുകൾ കുടികൊള്ളുന്നു എന്നു വിശ്വസിക്കപ്പെടുന്ന ക്ഷേത്രം കൂടിയാണ്.
നെന്മാറ വല്ലങ്ങി വേലയ്ക്കു പേരുകേട്ട നെല്ലിക്കുളങ്ങര ഭഗവതി ക്ഷേത്രം പാലക്കാട്ടെ നെന്മാറയിലാണ് സ്ഥിതി ചെയ്യുന്നത്. നെല്ലിക്കുളങ്ങര ഭഗവതിയെയാണ് ഇവിടെ പ്രതിഷ്ഠിച്ചിരിക്കുന്നത്.
പാലക്കാട് കടമ്പഴിപ്പുറം എന്നു പേരായ ഗ്രാമത്തിൽ സ്ഥിതി ചെയ്യുന്ന പ്രസിദ്ധമായ ക്ഷേത്രമാണ് വായില്ല്യാംകുന്നു ക്ഷേത്രം. ശബ്ദത്തിന്റെയും സംസാരശേഷിയുടേയും ശക്തിയായി അറിയപ്പെടുന്ന വായില്ലാക്കുന്നിലപ്പൻ പന്തിരുകുലത്തിലെ പന്ത്രണ്ടാമനാണ്.
പാലക്കാട്-ചെർപ്പുളശ്ശേരി പാതയിൽ കടമ്പഴിപ്പുറത്താണ് ക്ഷേത്രം സ്ഥിതി ചെയ്യുന്നത്.