ബെംഗളൂരു എയർപോർട്ട് യാത്രക്കാർ ശ്രദ്ധിക്കുക: ഇന്ന് ബെല്ലാരി റോഡിൽ ഗതാഗത നിയന്ത്രണം; ഈ ബദൽ വഴികൾ ഉപയോഗിക്കാം

ഇന്ന് (ഒക്ടോബർ 4) ബംഗളൂരു യെലഹങ്ക എയർഫോഴ്സ് സ്റ്റേഷനിൽ ഐഎഎഫ് ഹാഫ് മാരത്തൺ നടക്കുന്നതിനാൽ ബെല്ലാരി റോഡ് വഴി ഗതാഗത നിയന്ത്രണമുണ്ട്. കെംപെഗൗഡ അന്താരാഷ്ട്ര വിമാനത്താവളത്തിലേക്ക് പോകുന്നവർ രാവിലെ 6:30 നും ഉച്ചയ്ക്ക് 12 നും ഇടയിൽ യാത്രയ്ക്ക് 30 മുതൽ 60 മിനിറ്റ് വരെ അധിക സമയം കരുതേണ്ടി വരും. യെലഹങ്ക, ജാക്കൂർ, കോഗിലു പ്രദേശങ്ങളിൽ ഇടയ്ക്കിടെ റോഡുകൾ അടയ്ക്കാൻ സാധ്യതയുണ്ട്. ബെല്ലാരി റോഡ് വഴിയാണ് യാത്രയെങ്കിൽ ഇറങ്ങുന്നതിന് മുൻപ് ലൈവ് മാപ്പ് പരിശോധിച്ച് ട്രാഫിക് സാഹചര്യം ഉറപ്പുവരുത്തുക.

മാരത്തണിന്റെ ഗേറ്റുകൾ പുലർച്ചെ 4:30-ന് തുറന്നു. ഗേറ്റ് 6 വഴിയുള്ള പ്രവേശനം 5:15-ന് അവസാനിച്ചതിനെ തുടർന്ന് ഗേറ്റ് 7 വഴിയാണ് നിലവിൽ പ്രവേശനം. വിവിധ വിഭാഗങ്ങളിലെ ഫ്ലാഗ്-ഓഫ് സമയങ്ങൾ: 21.1 കെ - രാവിലെ 5:45, 10 കെ - 6:10, 5 കെ - 6:25, 2 കെ - 6:40. മാരത്തൺ ഓട്ടം നടക്കുന്ന സമയത്ത് എയർഫോഴ്സ് സ്റ്റേഷന് ചുറ്റുമുള്ള ലെയ്നുകളിൽ പൊലീസ് കുറച്ചുസമയത്തേക്ക് ഗതാഗതം തടഞ്ഞേക്കാം. കൂടാതെ, സഞ്ജീവിനിനഗർ ക്രോസിനും വിദ്യാശിൽപ ജംഗ്ഷനും ഇടയിലുള്ള എലിവേറ്റഡ് എയർപോർട്ട് റോഡിൽ ഇരുചക്രവാഹനങ്ങൾക്ക് വിലക്ക് തുടരുകയാണ്.

ബെല്ലാരി റോഡിലെ ഗതാഗത മാറ്റങ്ങളും ബംഗളൂരു എയർപോർട്ട് റൂട്ടും

ബെല്ലാരി റോഡിൽ കനത്ത ട്രാഫിക് ബ്ലോക്കാണെങ്കിൽ, ഹെന്നൂർ-തനിസന്ദ്ര-ബാഗലൂർ കോറിഡോർ വഴി സ്റ്റേറ്റ് ഹൈവേ 104 ലൂടെ യാത്ര ചെയ്ത് ട്രംപറ്റ് ഇന്റർചേഞ്ചിന് സമീപം പ്രധാന റോഡിലേക്ക് പ്രവേശിക്കാം. നേരത്തെ പുറപ്പെടുവിച്ച ഔദ്യോഗിക ട്രാഫിക് അഡ്വൈസറിയിൽ ഈ റൂട്ട് ശുപാർശ ചെയ്യുന്നുണ്ടെങ്കിലും ചിലയിടങ്ങളിൽ റോഡ് മോശമാണ്. അതിനാൽ സൂക്ഷിച്ച് വണ്ടിയോടിക്കുക. പകൽ സമയങ്ങളിൽ ഈ റൂട്ട് തിരഞ്ഞെടുക്കുന്നതാണ് കൂടുതൽ സൗകര്യം. ഹെബ്ബാളിലെ കുരുക്കിൽപ്പെടാതെ എയർപോർട്ടിൽ എളുപ്പത്തിൽ എത്താൻ ഈ പാത സഹായിക്കും.

വിമാനയാത്രക്കാർ അറിയാൻ: മാരത്തൺ സമയവും ട്രാഫിക് നിർദേശങ്ങളും

എയർപോർട്ട് ബസ് സർവീസുകൾ സാധാരണ പോലെ സർവീസ് നടത്തുമെങ്കിലും യെലഹങ്ക, ഹെബ്ബാൾ ഭാഗങ്ങളിലെ ഗതാഗത നിയന്ത്രണം മൂലം സർവീസുകൾ വൈകാൻ സാധ്യതയുണ്ട്. 'നമ്മ ബിഎംടിസി' (Namma BMTC) ആപ്പിലൂടെ 'വായു വജ്ര' ബസുകളുടെ തത്സമയ വിവരങ്ങൾ അറിയാം. ടെർമിനൽ 2-ൽ നിന്നുള്ള വിമാന സമയവും ബിഎംടിസി സമയക്രമവും ഒത്തുനോക്കിയ ശേഷം ലൈവ് ട്രാക്കിംഗ് ഉപയോഗിക്കുന്നതാണ് ഉചിതം. ക്യാബ് വിളിക്കുന്നവർ സർജ് ചാർജുകൾ ശ്രദ്ധിക്കുക; തിരക്കില്ലാത്ത സമയത്ത് മുൻകൂട്ടി ബുക്ക് ചെയ്യുന്നതാകും ലാഭകരം.

ഉച്ചയോടെ എയർപോർട്ടിൽ നിന്ന് നഗരത്തിലേക്ക് തിരിച്ചുവരുന്നവർ മാരത്തൺ പൂർത്തിയാകുന്ന സമയത്തെ തിരക്ക് കണക്കിലെടുക്കുക. ബെല്ലാരി റോഡിൽ ഗതാഗതം മന്ദഗതിയിലാണെങ്കിൽ ഹെന്നൂർ-ബാഗലൂർ റൂട്ടോ മറ്റ് ബദൽ പാതകളോ ഉപയോഗിച്ച് നാവിഗേഷൻ ഫോളോ ചെയ്യുക. തത്സമയ ട്രാഫിക് അപ്‌ഡേറ്റുകൾക്കായി ബെംഗളൂരു സിറ്റി ട്രാഫിക് പൊലീസിന്റെയും ഡിസിപി നോർത്തിന്റെയും സോഷ്യൽ മീഡിയ പേജുകൾ ശ്രദ്ധിക്കാം. യാത്ര തിരിക്കും മുൻപ് ഉച്ചയോടെ റൂട്ട് ഒന്നു കൂടി റീ-ചെക്ക് ചെയ്യുന്നത് നന്നായിരിക്കും.