ബെംഗളൂരു എയർപോർട്ട് യാത്ര: കനത്ത മഴയിൽ കുരുക്കിൽപ്പെടാതിരിക്കാൻ ഈ ബദൽ വഴികൾ പരീക്ഷിക്കാം

രാത്രി പെയ്ത കനത്ത മഴയെത്തുടർന്ന് ബെംഗളൂരു ഹെബ്ബാൾ-കെംപെഗൗഡ അന്താരാഷ്ട്ര വിമാനത്താവള (KIA) പാതയിൽ ഇന്ന് (ഒക്ടോബർ 2) രാവിലെ ഗതാഗതം വളരെ മന്ദഗതിയിലാണ്. ഹെബ്ബാൾ, ജക്കൂർ മേഖലകളിലെ വെള്ളക്കെട്ടും ഫ്ലൈഓവർ നിയന്ത്രണങ്ങളുമാണ് ഗതാഗതക്കുരുക്ക് രൂക്ഷമാക്കുന്നത്. വിമാനത്താവളത്തിലേക്ക് പോകുന്ന യാത്രക്കാർ ബദൽ വഴികൾ തിരഞ്ഞെടുക്കുന്നതോടൊപ്പം കൈയിൽ ആവശ്യത്തിന് അധിക സമയം കരുതുന്നതുമാകും ബുദ്ധി. ഇന്നത്തെ യാത്രയ്ക്ക് ഉപയോഗിക്കാവുന്ന ബദൽ പാതകളും അനുയോജ്യമായ സമയവും താഴെ നൽകുന്നു. മഴയും തിരക്കും കാരണം ടാക്സി നിരക്കുകൾ ഉയർന്നേക്കാമെന്നതിനാൽ ക്യാബുകൾ നേരത്തെ തന്നെ ബുക്ക് ചെയ്യാൻ ശ്രദ്ധിക്കുക.

സെപ്റ്റംബർ 30, ഒക്ടോബർ 1 തീയതികളിൽ പെയ്ത ശക്തമായ മഴയിൽ ഹെബ്ബാൾ, ബാഗലൂർ ഭാഗങ്ങളിലെ താഴ്ന്ന പ്രദേശങ്ങളിൽ വെള്ളക്കെട്ട് രൂപപ്പെട്ടിരുന്നു. കണ്ണൂർ ജങ്ഷനിലെ വെള്ളക്കെട്ട് ബാഗലൂർ വഴിയുള്ള ഗതാഗതത്തെയും ബാധിച്ചിട്ടുണ്ട്. ബെംഗളൂരുവിൽ ഇന്ന് മിതമായ മഴയ്ക്ക് സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പ് (IMD) അറിയിച്ചു. നഗരത്തിൽ പ്രത്യേക മുന്നറിയിപ്പുകളൊന്നുമില്ലെങ്കിലും അണ്ടർപാസുകളിലും നിർമ്മാണ പ്രവർത്തനങ്ങൾ നടക്കുന്ന സ്ഥലങ്ങളിലും വെള്ളക്കെട്ട് ഉണ്ടാകാൻ സാധ്യതയുണ്ട്.

എയർപോർട്ട് റോഡിൽ കുരുക്ക് അനുഭവപ്പെടാൻ സാധ്യതയുള്ള പ്രധാന സ്ഥലങ്ങൾ

ഹെബ്ബാൾ ഫ്ലൈഓവർ ചേരുന്ന ഭാഗങ്ങൾ, മേഖ്രി സർക്കിൾ-ഹെബ്ബാൾ സ്ട്രെച്ച്, ജക്കൂർ, യെലഹങ്ക റാമ്പുകൾ എന്നിവിടങ്ങളിൽ വാഹനങ്ങളുടെ നീണ്ട നിരയ്ക്ക് സാധ്യതയുണ്ട്. എലിവേറ്റഡ് കൊറിഡോർ പ്രവേശന കവാടങ്ങളിലെ പരിശോധനകൾ കാരണം വണ്ടികൾ ലെയ്ൻ മാറുന്നത് പതുക്കെയാകും. നിലവിൽ എയർപോർട്ട് റോഡിലെ എലിവേറ്റഡ് കൊറിഡോറിലൂടെ ഇരുചക്ര വാഹനങ്ങൾക്ക് സഞ്ചരിക്കാം. എന്നാൽ ഓട്ടോറിക്ഷകൾക്ക് പ്രവേശനമില്ല. ചരക്ക് വാഹനങ്ങൾക്ക് രാവിലെ 6 മുതൽ രാത്രി 10 വരെ നിയന്ത്രണമുണ്ട്.

വിമാനത്താവളത്തിലേക്ക് എപ്പോൾ തിരിക്കണം? സമയം എങ്ങനെ പ്ലാൻ ചെയ്യാം?

രാവിലെ വിമാനമുള്ളവർക്ക് പുലർച്ചെ 3:30 നും 6:30 നും ഇടയിലുള്ള സമയമാണ് യാത്രയ്ക്ക് ഏറ്റവും അനുയോജ്യം. കനത്ത മഴയില്ലെങ്കിൽ ഉച്ചയ്ക്ക് മുൻപുള്ള സമയത്തും ഉച്ചയ്ക്ക് ശേഷവും തിരക്ക് കുറവായിരിക്കും. എന്നാൽ വൈകുന്നേരം 5 മുതൽ രാത്രി 9 വരെ കനത്ത ഗതാഗതക്കുരുക്കിന് സാധ്യതയുണ്ട്. തിരക്കില്ലാത്ത സമയങ്ങളിൽ 45 മുതൽ 60 മിനിറ്റ് വരെയും, വൈകുന്നേരങ്ങളിലോ മഴയുള്ളപ്പോഴോ 90 മുതൽ 120 മിനിറ്റ് വരെയും അധിക സമയം കയ്യിൽ കരുതുക. അന്താരാഷ്ട്ര വിമാനങ്ങളിൽ യാത്ര ചെയ്യുന്നവർ ചെക്ക്-ഇൻ, രേഖാപരിശോധന എന്നിവയ്ക്കായി കൂടുതൽ സമയം മാറ്റിവെക്കണം.

ശ്രദ്ധിക്കേണ്ട ബദൽ പാതകൾ: തനിസന്ദ്ര, ബാഗലൂർ, STRR വഴികൾ

ഈസ്റ്റ് ബെംഗളൂരുവിൽ നിന്ന് വരുന്നവർക്ക് ഔട്ടർ റിംഗ് റോഡ് വഴി നാഗവാരയിലെത്തി തനിസന്ദ്ര മെയിൻ റോഡിലേക്ക് പ്രവേശിക്കാം. അവിടെ നിന്ന് ബാഗലൂർ മെയിൻ റോഡിലേക്ക് വലത്തോട്ട് തിരിഞ്ഞ് എയർപോർട്ട് ആൾട്ടർനേറ്റ് റോഡ് വഴി വിമാനത്താവളത്തിലെത്താം. ഹെബ്ബാൾ നിർമ്മാണ പ്രവർത്തനങ്ങൾ നടന്ന സമയത്ത് ട്രാഫിക് പോലീസ് നിർദ്ദേശിച്ച പ്രധാന ബദൽ പാതയാണിത്. ദേവനഹള്ളി ഭാഗത്തേക്ക് പോകുന്ന ദീർഘദൂര യാത്രക്കാർക്ക് റോഡ് തുറന്നിരിക്കുന്നതിനനുസരിച്ച് സാറ്റലൈറ്റ് ടൗൺ റിംഗ് റോഡ് (STRR) ഉപയോഗപ്പെടുത്താം.

എയർപോർട്ട് ബസ്, മെട്രോ വിവരങ്ങൾ

ക്യാബുകളിലെ ഉയർന്ന സർജ് പ്രൈസിംഗിൽ നിന്ന് ഒഴിവാകാൻ ബി.എം.ടി.സിയുടെ 'വായു വജ്ര' (Vayu Vajra) ബസുകൾ ഉപയോഗിക്കാം. മഴയുള്ളപ്പോഴും തടസ്സമില്ലാത്ത യാത്ര ഇവ ഉറപ്പുനൽകുന്നു. ഹെബ്ബാൾ, മെജസ്റ്റിക് തുടങ്ങിയ പ്രധാന കേന്ദ്രങ്ങളിൽ നിന്ന് ബസുകൾ ലഭ്യമാണ്. യാത്ര തിരിക്കും മുൻപ് സമയം ഔദ്യോഗിക പ്ലാറ്റ്‌ഫോമുകളിലൂടെയും ലൈവ് ട്രാക്കിംഗിലൂടെയും പരിശോധിക്കുക. അതേസമയം, ബ്ലൂ ലൈൻ എയർപോർട്ട് മെട്രോയുടെ നിർമ്മാണം പുരോഗമിക്കുകയാണ്. ഔട്ടർ റിംഗ് റോഡ് (ORR) റൂട്ടിലെ ട്രയൽ റണ്ണുകൾ ഒക്ടോബറിൽ ആരംഭിക്കും. ഹെബ്ബാൾ - എയർപോർട്ട് ലൈൻ 2027 ജൂണോടെ പൂർത്തിയാക്കാനാണ് ലക്ഷ്യമിടുന്നത്. അതുവരെ റോഡ് മാർഗ്ഗവും ബസുകളുമാണ് പ്രധാന ആശ്രയം.