വിഷു, ഈസ്റ്റർ യാത്രകൾ തിരക്കില്ലാതെ പോകാം... മാവേലിക്കും മലബാർ എക്സ്പ്രസിനും ഏപ്രിൽ മാസം അധിക കോച്ച്

വിഷു, ഈസ്റ്റർ യാത്രകളുടെ നേരമാണിനി വരുന്നത്. ഈ വാരാന്ത്യം മുതൽ തന്നെ യാത്രകളുടെ തിരക്ക് ആരംഭിക്കും. ഏപ്രിൽ 10, 11 തിയതികളിലെ തിരക്ക് പറയുകയും വേണ്ട. വിവിധ സ്ഥലങ്ങളിൽ പഠിക്കുവാൻ പോയവരും ജോലി ചെയ്യുന്നവരും ഒക്കെ വിഷു അവധിയും ഈസ്റ്ററും വാരാന്ത്യവും കണക്കാക്കി യാത്രകൾ പ്ലാൻ ചെയ്തിട്ടുണ്ട്. ഈ സമയത്തെ തിരക്ക് പരിഹരിക്കുവാൻ കേരളത്തിൽ ഏറ്റവും കൂടുതൽ ആശ്രയിക്കുന്ന രണ്ട് ട്രെയിനുകൾക്ക് റെയിൽവേ അധിക കോച്ചുകൾ നല്കിയിരിക്കുകയാണ്.

തിരുവനന്തപുരം സെൻട്രൽ- മംഗളൂരു സെൻട്രൽ മാവേലി എക്സ്പ്രസ്, മംഗളൂരു സെൻട്രൽ - തിരുവനന്തപുരം സെൻട്രൽ മാവേലി എക്സ്പ്രസ്, തിരുവനന്തപുരം സെൻട്രൽ- മംഗളൂരു സെൻട്രൽ മലബാർ എക്സ്പ്രസ്, മംഗളൂരു സെൻട്രൽ - തിരുവനന്തപുരം സെൻട്രൽ മലബാർ എക്സ്പ്രസ് എന്നീ നാല് ട്രെയിൻ സർവീസുകൾക്കാണ് റെയിൽവേ ഏപ്രിൽ 14 വരെയുള്ള വിവിധ ദിവസങ്ങളിൽ അധിക കോച്ച് നല്കിയിട്ടുള്ളത്.

തിരുവനന്തപുരം മംഗളൂരു മാവേലി എക്സ്പ്രസ്

ട്രെയിൻ നമ്പർ 16604 തിരുവനന്തപുരത്തു നിന്ന് പുറപ്പെടുന്ന മംഗളൂരു സെൻട്രൽ മാവേലി എക്സ്പ്രസിന് ഏപ്രിൽ 5, 6,7, 13,14 തിയതികളിൽ ഒരു അധിക സ്ലീപ്പർ കോച്ച് അനുവദിക്കും, തിരുവനന്തപുരം ഭാഗത്തു നിന്നു മലബാർ ഭാഗത്തേയ്ക്ക് പോകുന്നവർക്ക് ഈ സേവനം പ്രയോജനപ്പെടുത്താം.

മംഗളൂരു - തിരുവനന്തപുരം മാവേലി എക്സ്പ്രസ്

ട്രെയിൻ നമ്പർ 16603 മംഗലാപുരത്ത് നിന്ന് യാത്ര തുടങ്ങുന്ന തിരുവനന്തപുരം മാവേലി എക്സ്പ്രസിന് ഏപ്രിൽ 5, 4,5,6,12,13 തിയതികളിൽ ഒരു അധിക സ്ലീപ്പർ കോച്ച് അനുവദിക്കും.

തിരുവനന്തപുരം- മംഗളൂരു മലബാർ എക്സ്പ്രസ്

ട്രെയിൻ നമ്പർ 16629 തിരുവനന്തപുരത്ത് നിന്ന് യാത്ര ആരംഭിക്കുന്ന തിരുവനന്തപുരം സെൻട്രൽ- മംഗളൂരു സെൻട്രൽ മലബാർ എക്സ്പ്രസിന് ഏപ്രില്‍ 4,5,6,13 14
തിയതികളിൽ ഒരു അധിക സ്ലീപ്പർ കോച്ച് അനുവദിക്കും.

മംഗളൂരു- തിരുവനന്തപുരം- മലബാർ എക്സ്പ്രസ്

ട്രെയിൻ നമ്പർ 16630 മംഗലാപുരത്ത് നിന്ന് യാത്ര തുടങ്ങുന്ന തിരുവനന്തപുരം സെൻട്രൽ- മംഗളൂരു സെൻട്രൽ മലബാർ എക്സ്പ്രസിന് ഏപ്രില്‍ 3, 4,5,6,12,13
തിയതികളിൽ ഒരു അധിക സ്ലീപ്പർ കോച്ച് അനുവദിക്കും.

ബെംഗളൂരു- കണ്ണൂർ ട്രെയിൻ സർവീസിൽ മാറ്റം

ട്രെയിൻ നമ്പർ 16511 കെ എസ് ആർ ബെംഗളൂരു - കണ്ണൂർ എക്സ്പ്രസ് ഏപ്രിൽ 1 മുതൽ 10 വരെ എസ്എംവിടി ബെംഗളൂരുവിൽ നിന്ന് രാത്രി 8.00 മണിക്ക് യാത്ര ആരംഭിച്ച് ബനസ്വാഡി, ഹെബ്ബാൾ, ചിക്ക് ബനാവർ വഴി യാത്ര തുടരുകയും കെഎസ്ആർ ബെംഗളൂരു സ്റ്റേഷൻ ഒഴിവാക്കുകയും ചെയ്യും.

ട്രെയിൻ നമ്പർ 16512 കണ്ണൂർ എക്സ്പ്രസ് - കെ എസ് ആർ ബെംഗളൂരു ഏപ്രിൽ 1 മുതൽ 10 വരെ വൈകിട്ട് 5.05 ന് കണ്ണൂരിൽ നിന്ന് പുറപ്പെട്ട് ചിക്ക് ബനാവർ, ഹെബ്ബാൾ, ബനസ്വാഡി വഴി എസ്എംവിടി ബെംഗളൂരു റെയിൽവേ സ്റ്റേഷൃനിൽ രാവിലെ 7.45 ന് എത്തുകയും കെഎസ്ആർ ബെംഗളൂരു സ്റ്റേഷൻ ഒഴിവാക്കുകയും ചെയ്യും.

ബെംഗളൂരു -തിരുവനന്തപുരം റൂട്ടിൽ വാരാന്ത്യ ട്രെയിൻ

ഈസ്റ്റർ, വിഷു തിരക്ക് പരിഗണിച്ച് ബെംഗളൂരു -തിരുവനന്തപുരം റൂട്ടിൽ ദക്ഷിണ റെയിൽവേ പ്രത്യേക ട്രെയിന്‌ സർവീസ് നടത്തും.

ട്രെയിൻ നമ്പര്‍ 06555 എസ്എംവിടി ബെംഗളൂരു- തിരുവനന്തപുരം സ്പെഷ്യൽ ട്രെയിൻ ബയ്യപ്പനഹള്ളി റെയിൽവേ സ്റ്റേഷനിൽ നിന്ന് രാത്രി 10.00 മണിക്ക് പുറപ്പെട്ട് പിറ്റേദിവസം ഉച്ചയ്ക്ക് 2.00 മണിക്ക് തിരുവനന്തപുരം നോർത്ത് റെയിൽവേ സ്റ്റേഷനിൽ എത്തും .ഏപ്രിൽ - 4, 11, 18, 25, മേയ് - 2, 9, 16, 23, 30 എന്നീ വെള്ളിയാഴ്ചകളിൽ മാത്രമായിരിക്കും സർവീസ്.

ട്രെയിൻ നമ്പർ 06556 തിരുവനന്തപുരം നോർത്ത് -എസ്എംവിടി ബംഗളൂരു സ്പെഷ്യൽ ട്രെയിൻ തിരുവനന്തപുരം നോർത്ത് റെയിൽവേ സ്റ്റേഷനിൽ നിന്ന് ഉച്ചയ്ക്ക് 2.15 ന് പുറപ്പെട്ട് പിറ്റേന്ന് രാവിലെ 7.30 ന് ബെംഗളൂരു ബയ്യപ്പനഹള്ളി റെയിൽവേ സ്റ്റേഷനിൽ എത്തും.
ഏപ്രിൽ - 6, 13, 20, 27, മേയ് - 4, 11, 18, 25, ജൂൺ - 1 എന്നീ ഞായറാഴ്ചകളിലാണ് ഈ ട്രെയിൻ ഉള്ളത്.
2 എസി ടൂ ടയർ കോച്ച്, 16 എസി ത്രീ ടയർ കോച്ച്, 2 ലഗേജ് കം ബ്രേക്ക് വാൻ എന്നിവയാണ് ഇതിനുള്ളത്.