അല്മോരയിലെ പ്രകൃതിരമണീയമായ പ്രദേശമാണ് ബിന്സാര്. സമുദ്രനിരപ്പില് നിന്ന് 2400 മീറ്റര് ഉയരത്തില് ത്സണ്ഡിധര് എന്ന പര്വ്വത ശിഖരത്തിലാണ് ഇത് സ്ഥിതിചെയ്യുന്നത്. ശിവന്റെ അപര നാമങ്ങളിലൊന്നായ ബിന്സാര ദേവ് എന്ന പേരില് നിന്നാണ് ഈ സ്ഥലനാമം ഉരുത്തിരിഞ്ഞത്. വേനല്കാലങ്ങളില് ഛാന്ദ് രാജാക്കന്മാരുടെ ആസ്ഥാനം ഇവിടെയായിരുന്നു. ഹിമാലയ നിരകളുടെ പശ്ചാതലത്തിലുള്ള പ്രാന്തപ്രദേശമായതിനാല് സഞ്ചാരികള്ക്ക് ഏറെ പ്രിയങ്കരമാണ് ഈ സ്ഥലം.
കുമയൂണ് മേഖലയിലെ ഏറ്റവും ഉയരം കൂടിയ പര്വ്വത പ്രദേശമാണ് ബിന്സാര്. ഉയരത്തിന്റെ ഉത്തുംഗതയില് നിന്ന് കേദാരനാഥ്, ശിവലിംഗ്, ത്രിശൂല്, നന്ദദേവി എന്നീ കൊടുമുടികളുടെ സൌന്ദര്യം എത്രകണ്ടാലും മതിവരില്ല. ഒരു ശിവക്ഷേത്രവും ഇതിന്റെ പരിസരത്തായുണ്ട്.