Click it and Unblock the Notifications
ഹിമാചല്‍ പ്രദേശിലെ ജലസമൃദ്ധമായ പബ്ബാര്‍ നദീതീരം സഞ്ചാരികള്‍ക്കായി ഒരുക്കി വച്ചിരിക്കുന്നത് കാഴ്ചയുടെ ഉല്‍സവം തന്നെയാണ്. പബ്ബാര്‍ നദിയുടെ എല്ലാ പ്രൗഢിയും അതിന്‍െറ പാരമ്യത്തില്‍ ദര്‍ശിക്കണമെങ്കില്‍ ജുബ്ബാലില്‍ തന്നെ എത്തണം. 288 ചതുരശ്രമൈല്‍ വിസ്തൃതിയില്‍ പ്രകൃതി വശ്യത സമുദ്രനിരപ്പില്‍ നിന്ന് 1901 മീററര്‍ ഉയരത്തില്‍ പകര്‍ത്തിവെച്ചരിക്കുന്നു ജുബ്ബാല്‍.
ചരിത്രം
1814 മുതല്‍ 1816 വരെ തുടര്‍ന്ന പ്രസിദ്ധമായ ഗൂര്‍ഖാ യുദ്ധത്തിന് ശേഷമാണ് പ്രദേശം സന്തന്ത്രരാജ്യമായി മാറിയത്. കരം ചന്ദ് രാജാവാണ് ജൂബ്ബാലിന്‍െറ നാഥനെന്ന് ചരിത്രം പറയുന്നു. എന്നാല്‍ 1948 ഏപ്രില്‍ 15ന് ദിഗ് വിജയ് സിങിന്‍െറ ഭരണകാലത്ത് പ്രദേശം ഇന്ത്യാമഹാരാജ്യത്തില്‍ ലയിച്ചു
ആപ്പിള്‍ മരങ്ങളും കൊട്ടാരവും
തുടുത്ത ആപ്പിള്‍ മരങ്ങളും ദേവദാരുക്കാടുകളും ഇടതിങ്ങി നില്‍ക്കുന്ന മലഞ്ചരിവുകളാണ് ജുബ്ബാലിന്‍െറ ആകര്‍ഷണീയത. ഒപ്പം പബ്ബാര്‍ നദീ സ്രോതസ്സായ ചന്ദ്രനഹാന്‍ തടാകസമീപത്തെ വിസ്മയക്കാഴ്ചകളും അവിടത്തെ മീന്‍പിടിത്തവും സന്ദര്‍ശകര്‍ക്ക് നല്‍കുന്ന വിരുന്നും ചെറുതല്ല. ഗതകാല സ്മരണകളിലേക്ക് മനസ്സിനെ കൂട്ടിക്കൊണ്ടു പോകുന്ന ജുബ്ബാല്‍ കൊട്ടാരക്കാഴ്ചകള്‍ ആര്‍ക്കാണ് മറക്കാനാവുക. റാണമാര്‍ രാജപ്രൗഡിയോടെ വസിച്ചിരുന്ന ജുബ്ബാല്‍ കൊട്ടാരം ഭൂതകാല സ്മരണകളിലേക്ക് വെളിച്ചം വീശുന്നതാണ്.
ഹത്കേശ്വരി ക്ഷേത്രം
മഹാഭാരത ഇതിഹാസനായകരായ പാണ്ഡവര്‍ പണിതതെന്ന് കരുതപ്പെടുന്ന ഒരു ക്ഷേത്രവും ജുബ്ബാലിലുണ്ട്. ഹത്കേശ്വരി ക്ഷേത്രം. എന്തായാലും 800 എഡിക്കും 1000 എഡിക്കും ഇടയില്‍ നിര്‍മിച്ചതാണ് ക്ഷേത്രമെന്ന് വിദഗ്ധര്‍ വിലയിരുത്തുന്നു. 19 ാം നൂറ്റണ്ടില്‍ ജൂബ്ബാല്‍ രാജാവ് അമ്പലം പുതുക്കിപ്പണിതതായും ചരിത്രരേഖകളില്‍ കാണാം. പഗോഡരീതിയില്‍ ബഹുനിരകളോട് കൂടിയ ടവര്‍ മാതൃകയിലാണ് ക്ഷേത്രം നിര്‍മിച്ചിരിക്കുന്നത്. ഹതകേശ്വരി ദേവിയാണ് മുഖ്യപ്രതിഷ്ഠയെങ്കിലും ഇത് കൂടാതെ വേറെ അഞ്ച് ദേവകളുടെയും പ്രതിഷ്ഠയുമുണ്ട്. പുതുക്കലിന് മുമ്പുള്ള അതേ രീതിയില്‍ തന്നെ ദേവീ വിഗ്രഹം നിലനിര്‍ത്തിയിരിക്കുന്നു. ദിവസവും പ്രദേശവാസികളുടെ ഐശ്വര്യത്തിനുവേണ്ടി ആരതി നടക്കാറുണ്ട് ഇവിടെ.
ഉത്സവങ്ങള്‍
ജൂലൈയില്‍ നടത്തുന്ന ‘രാംപുര്‍ ജതര്‍ ’ഉത്സവവും ‘ഹെമിസു’മാണ് ഇവിടത്തെ പ്രധാന ഉല്‍സവങ്ങള്‍. ഇതില്‍ ഹെമിസ് ആഘോഷം തിബത്തന്‍ ബുദ്ധമതത്തിലെ പ്രധാന ഗുരുക്കളിലൊരാളായ ഗുരു പദ്മസംഭവയുടെ സ്മരണക്കാണ് നടത്തുന്നത് . ‘സിംഹഗര്‍ജന ഗുരു’ എന്ന പേരിലാണ് ഇദ്ദേഹം അറിയപ്പെട്ടിരുന്നത്.
