കര്ണാടകയിലെ പ്രശസ്തമായിക്കൊണ്ടിരിക്കുന്ന ഒരു വിനോദ സഞ്ചാരകേന്ദ്രമാണ് ഗാലിബോര്. പ്രകൃതിസ്നേഹികള്ക്കും സാഹസിക യാത്രികര്ക്കും ഒരുപോലെ ഇഷ്ടമാകുന്ന ഗാലിബോറിലേക്ക് ബാംഗ്ലൂരില് നിന്നും 110 കിലോമീറ്റര് ദൂരമുണ്ട്. അര്ക്കാവതി നദി കാവേരിയുമായി ചേരുന്ന സംഗമസ്ഥാനത്തുനിന്നും പത്ത് കിലോമീറ്റര് ദൂരത്താണ് സുന്ദരമായ പ്രകൃതിദൃശ്യങ്ങള്ക്ക് പേരുകേട്ട ഗാലിബോര്. അവധിദനങ്ങള് ചെലവഴിക്കാന് പറ്റിയ ഇടമാണിത്.
കാവേരി വന്യജീവി സങ്കേതത്തിനടുത്ത് നിബിഡവനത്തിലാണ് ഗാലിബോര്. ഫിഷിംഗ് ക്യാംപിന് പിന്വശത്തായുള്ള മലയുമായി ബന്ധപ്പെട്ടാണ് ഈ സ്ഥലത്തിന് ഗാലിബോര് എന്ന് പേര് വന്നത്. ഗാലിബോര്, ഭീമേശ്വരി, ദൊഡ്ഡമക്കലി എന്നിങ്ങനെ മൂന്ന് ക്യാംപുകള് ചേര്ന്നാണ് കാവേരി ഫിഷിംഗ് ക്യാംപ് എന്ന് അറിയപ്പെടുന്നത്. ഇതില് ഗാലിബോര്, ഭീമേശ്വരി എന്നീ രണ്ട് ക്യാംപുകള് മാത്രമാണ് വിനോദസഞ്ചാരികള്ക്കായി തുറന്നുകൊടുക്കാറുള്ളത്. ഗാലിബോര് ക്യാംപിലേക്ക് ഭീമേശ്വരിയില് നിന്നും 16 കിലോമീറ്റര് ദൂരമുണ്ട്.
എന്തുകൊണ്ട് സഞ്ചാരികള് ഗാലിബോറിലേക്ക്?
ഫിഷിംഗില് താല്പര്യമുള്ള തുടക്കക്കാര് മുതല് ഈ രംഗത്തെ പ്രൊഫഷണലുകള് വരെ ഗാലിബോലെത്തുന്നു. അപൂര്വ്വ ഇനമായ മഹാശീര് ആണ് മീന്പിടിക്കാനായെത്തുന്നവരുടെ ഇഷ്ട ഇര. ഇവയെ പിടിച്ചയുടന് മീനുകളെ വെള്ളത്തിലേക്ക് തിരികെ വിടുകയാണ് ഇവിടത്തെ പതിവ്. കരമീന്, കാറ്റ്ഫിഷ് തുടങ്ങിയവയെയും ധാരാളം ചെറുമീനുകളെയും ഇവിടെ കാണാം. മീന് പിടിച്ച ശേഷം ഒരു ഫോട്ടോയ്ക്ക് കൂടി പോസ് ചെയ്ത ശേഷമാണ് ഇവയെ തിരിച്ച് വെള്ളത്തിലേക്ക് വിടുക.
ഫിഷിംഗ് മാത്രമല്ല, വിവിധ തരത്തില്പ്പെട്ട പക്ഷിമൃഗാദികളെയും ഗാലിബൊറില് കാണാന് സാധിക്കും. ഏതാണ്ട് വംശനാശം സംഭവിച്ചുകൊണ്ടിരിക്കുന്നതടക്കമുള്ള 220 ഓളം തരത്തിലുള്ള പക്ഷികള് ഇവിടെയുണ്ട് എന്നാണ് കരുതപ്പെടുന്നത്. വിവിധതരം കൊക്കുകള്, താറാവുകള്, മീന്കൊത്തി, കഴുകന്, കുയില്, കടല്ക്കാക്ക, പൊന്മാന്, പ്രാപ്പിടിയന് തുടങ്ങിയ പക്ഷികളെയാണ് ഇവിടെ സാധാരണയായി കാണാന് സാധിക്കുക.
കാട്ടുപന്നി, ഓന്ത്, പുള്ളിപ്പുലി, മാന്, അണ്ണാന്, ആമ, മുതല തുടങ്ങിയ മൃഗങ്ങളെയും ഇവിടെ കാണാന് സാധിക്കും. മൂര്ഖന്, പെരുമ്പാമ്പ്, രാജവെമ്പാല, അണലി തുടങ്ങിയ വിഷപ്പാമ്പുകളുടെയും ആവാസസ്ഥലമാണ് ഗാലിബോര് കാടുകള്.
ഗാലിബോറിലേക്ക്
ബാംഗ്ലൂരില് നിന്നും ഇവിടേക്ക് റോഡ് വഴി എത്തിച്ചേരാന് എളുപ്പമാണ്. ബാംഗ്ലൂരില് നിന്നും 110 കിലോമീറ്റര് സഞ്ചരിച്ചാല് ഇവിടെയെത്താം. പ്രശസ്ത ടൂറിസ്റ്റ് കേന്ദ്രങ്ങളായ മേക്കേദാടുവിനും ശിവനസമുദ്രത്തിനും സമീപത്താണ് ഗാലിബോര്. ജൂണ് - ആഗസ്ത് മാസങ്ങളിലാണ് ഇവിടെ സഞ്ചാരികള് ഏറ്റവും കൂടുതല് എത്തിച്ചേരുന്നത്. ഇക്കാലത്താണ് ഇവിടെ ഏറ്റവുമധികം ജലപ്പക്ഷികളെ കാണാന് സാധിക്കുക.