കുംഭകോണത്തുനിന്നും 10 കിലോമീറ്റര്‍ മാറി പട്ടേശ്വരമെന്ന ഗ്രാമത്തിലാണ് ദുര്‍ഗ്ഗക്ഷേത്രം സ്ഥിതിചെയ്യുന്നത്. ദുര്‍ഗ്ഗാദേവിയാണ് ഇവിടുത്തെ പ്രധാന പ്രതിഷ്ഠ. ശിവഭക്തയായിരുന്ന രമാ ദേവി പ്രതിഷ്ഠിച്ചതെന്ന് കരുതപ്പെടുന്ന ഒരു ശിവലിംഗവും ഈ ക്ഷേത്രത്തിലുണ്ട്. വലിപ്പമേറിയ ഈ ക്ഷേത്രം വളരെ ഭംഗിയായി നടത്തിക്കൊണ്ടുപോകുന്നൊരു ക്ഷേത്രം കൂടിയാണ്.

മനോഹരമായി നിര്‍മ്മിച്ചിട്ടുള്ള അഞ്ച് ഗോപുരങ്ങളാണ് ക്ഷേത്രത്തിന്റെ മനോഹാരിത വര്‍ധിപ്പിയ്ക്കുന്നത്. കഴിഞ്ഞ ഒരു നൂറ്റാണ്ടില്‍ ഈ ക്ഷേത്രം പലവട്ടം പുതുക്കിപ്പണിയുകയും അറ്റകുറ്റപ്പണികള്‍ നടത്തുകയും ചെയ്തിട്ടുണ്ട്. ചോളന്മാരുടെയും നായകന്മാരുടെയും കാലഘട്ടത്തിലെ വാസ്തുശൈലിയിലാണ് ക്ഷേത്രം പണിതിരിക്കുന്നത്. പിന്നീടുവന്ന പല രാജവംശങ്ങളും തങ്ങളുടേതായ സംഭാവനകള്‍ നല്‍കി ക്ഷേത്രം പുതുക്കിപ്പണിയുകയായിരുന്നു.