Click it and Unblock the Notifications
കച്ചവടക്കാരുടെ ബഹളൊന്നുമില്ലാത്ത മനോഹരമായ തീരമാണ് തിരുമുല്ലവാരം ബീച്ച്. നഗരത്തില് നിന്ന് ആറു കിലോമീറ്റര് അകലെയാണ് ബീച്ചിന്റെ സ്ഥാനം. അധികം ആഴമില്ലാത്തതിനാല് ഇവിടെ സുരക്ഷിതമായി നീന്താം. ഇക്കാരണത്താല് കുട്ടികള്ക്കും ഇവിടെ ഭയാശങ്കകളില്ലാതെ ആഘോഷിച്ചു തിമിര്ക്കാം. കുടുംബത്തോടൊപ്പം ഉല്ലസിക്കാന് പറ്റിയ ഇടമാണ് തിരുമുല്ലവാരം ബീച്ച്. ചുറ്റുമുള്ള മനോഹരമായ കാഴ്ചകള് കണ്ട് ഇവിടെ സമയം ചെലവിടാവുന്നതാണ്.
ബീച്ചിലെ ശാന്തമായ അന്തരീക്ഷം, നഗരത്തിലെ ബഹളങ്ങളില് നിന്നും തിരക്കേറിയ ജീവിതത്തിന്റെ ആലസ്യത്തില് നിന്നും സന്ദര്ശകര്ക്ക് ആശ്വാസം പകരും. സമീപത്ത് സ്ഥിതി ചെയ്യുന്ന വിഷ്ണു ക്ഷേത്രത്തിന്റെ പേരില് നിന്നാണ് ഈ ബിച്ചിന് തിരുമുല്ലവാരം എന്ന പേര് ലഭിച്ചത്. പ്രശസ്തമായ ഞായറാഴ്ച പാറ ഇവിടുത്തെ മറ്റൊരു ആകര്ഷണമാണ്. തീരത്തു നിന്ന് അരകിലോമീറ്റര് അകലെ കടലിലായാണ് ഈ പാറ സ്ഥിതി ചെയ്യുന്നത്. വേലിയിറക്കസമയത്ത് പാറ കാണാന് കഴിയും. വൈകുന്നേരങ്ങളില് ബീച്ചിന്റെ സൗന്ദര്യം പൂര്ണ്ണമായും ആസ്വദിക്കാന് കഴിയും. അതിനാല് ബീച്ച് സന്ദര്ശനത്തിന് വൈകുന്നേരങ്ങള് തിരഞ്ഞെടുക്കുന്നതാണ് ഉത്തമം. മഴക്കാലം ഒഴികെയുള്ള ഏതു സമയത്തും ഇവിടം സന്ദര്ശിക്കാം.
