Click it and Unblock the Notifications
മാണ്ഢിയില് നിന്നും 62 കിലോമീറ്റര് അകലെയുള്ള ഒരു ഗ്രാമപ്രദേശമാണ് പ്രഷാര്.സമുദ്രത്തില് നിന്നും 2730 മീറ്റര് മുകളിലുള്ള ഈ പ്രദേശത്ത് തടാകത്തിന്റെ കരയിലായി ഐതിഹ്യങ്ങള് നിറഞ്ഞ ഒരു ക്ഷേത്രം സ്ഥിതി ചെയ്യുന്നു. മുനിവര്യനായിരുന്ന പ്രഷാറിന്റെ പേരിലുള്ള ഈ ക്ഷേത്രം നിര്മ്മിച്ചിരിക്കുന്നത് അദ്ദേഹം തപസ്സിരുന്നു എന്ന് കരുതപ്പെടുന്ന സ്ഥലത്താണ്. മഞ്ഞുവീണ് മൂടിയ മലനിരകള്ക്ക് നടുവില് കടും നീല നിറത്തിലുള്ള തടാകം ഇവിടുത്തെ അതിശയിപ്പിക്കുന്ന കാഴ്ചയാണ്. നടുവിലായി ഒരു ചെറിയ ദ്വീപുള്ള ഈ തടാകത്തിന്റെ ആഴം എത്രയെന്ന് ഇതുവരെ തിട്ടപ്പെടുത്തിയിട്ടല്ല.
വിവിധ ആചാര അനുഷ്ഠാനങ്ങള് നടക്കുന്ന ഈ തടാകതീരം വിശുദ്ധസ്ഥലമായാണ് അറിയപ്പെടുന്നത്. 13ാം നൂറ്റാണ്ടില് ദൈവിക ശക്തിയുള്ള ഒരു കുഞ്ഞ് ഒറ്റ മരം കൊണ്ട് തീര്ത്തതാണ് തടാകതീരത്തുള്ള ക്ഷേത്രം എന്നാണ് പഴങ്കഥകള് പറയുന്നത്. താഴ്വരയിലൂടെ ഒഴുകുന്ന ബിയാസ് നദിയും പ്രഷാറില് നിന്നുള്ള മനോഹരമായ ഒരു കാഴ്ചയാണ്.
