പോര്‍ബന്ദര്‍, ജാംനഗര്‍ എന്നീ രണ്ട് ജില്ലകളിലായി പടര്‍ന്ന് കിടക്കുന്ന ഈ മനോജ്ഞ സങ്കേതത്തിലേക്ക് പോര്‍ബന്ദര്‍ പട്ടണത്തില്‍ നിന്ന് 15 കിലോമീറ്റര്‍ മാത്രമെ ദൂരമുള്ളു. റിസര്‍വ്വ് വനമായിരുന്ന ഈ പ്രദേശം 1979 ലാണ് വന്യജീവിസങ്കേതമായി അറിയപ്പെട്ടത്. മലമ്പാതകളും സമതലങ്ങളും സുന്ദരമായ കൊച്ചരുവികളുമുള്ള ഈ പ്രദേശം പച്ചവിരിച്ച വൃക്ഷങ്ങളാലും കൃഷിഭൂമികളാലും ആവരണം ചെയ്തിരിക്കുന്നു.

അറബിക്കടലില്‍ നിന്ന് 15 കിലോമീറ്റര്‍ മാത്രമേ ദൂരമുള്ളു എങ്കിലും ഈ ഭൂമിയെ  ലവണസ്വഭാവത്തില്‍ നിന്ന് പ്രതിരോധിക്കുന്നതില്‍  ഇവിടത്തെ പച്ചപ്പുകള്‍ മുഖ്യപങ്ക് വഹിക്കുന്നു. വംശമറ്റുകൊണ്ടിരിക്കുന്ന ഒരുപാട് മൃഗങ്ങളും പക്ഷികളും ഉരഗങ്ങളും ഈ സാങ്ച്വറിയുടെ ഭാഗമായുണ്ട്.

ചെന്നായ, പുള്ളിപ്പുലി, വിഷപാമ്പുകള്‍, ചീങ്കണ്ണി, മരയോന്തുകള്‍, പരുന്തുകള്‍ എന്നിവയുടെ ആവാസകേന്ദ്രമാണിത്. 192.31 ചതുരശ്ര കിലോമീറ്റര്‍ വിസ്തൃതിയില്‍ കിടക്കുന്ന ഈ സാങ്ച്വറിയില്‍ മൃഗങ്ങള്‍ക്ക് പുറമെ നിരവധി വര്‍ണ്ണങ്ങളിലുള്ള ചെടികളും ഔഷധസസ്യങ്ങളുമുണ്ട്. ഇവയ്ക്കെല്ലാം പുറമെ ഈ സുന്ദരമായ അഭയകേന്ദ്രത്തില്‍ ബിലേശ്വരി, ജോഗ്രി എന്നിങ്ങനെ താല്‍ക്കാലിക നദികളുമുണ്ട്.