പ്രകൃതിയോട് ചേര്‍ന്നുനില്‍ക്കുന്ന വിനോദസഞ്ചാരകേന്ദ്രങ്ങളോട് താല്‍പര്യമുള്ളവര്‍ക്ക് യാത്രപോകാവുന്ന സ്ഥലമാണ് കര്‍ണാടകത്തിലെ ചിക്മഗളൂര്‍ ജില്ലയിലെ ശിവ്ഗിരിയെന്ന സ്ഥലം. കാടും മലയും എന്നുവേണ്ട പ്രകൃതിയുടെ വിവിധ ഭാവങ്ങള്‍ ഇവിടെ ആസ്വദിയ്ക്കാം. ഹൊക്ഷരെകന്‍ഗ്രി മലവാരത്തിലുള്ള യെമ്മെനദൊഡ്ഡി ഗ്രാമത്തിനടുത്താണ് ശിവ്ഗിരി.

കാടുകള്‍ തന്നെയാണ് ശിവ്ഗിരിയിലെ പ്രധാന ആകര്‍ഷണം. എന്നാല്‍ വെറും കാടുമാത്രമല്ല ഇവിടെയുള്ളത്. ഏക്കറുകണക്കിന് സ്ഥലത്ത് പരന്നുകിടക്കുന്ന കാപ്പിത്തോട്ടങ്ങളുമുണ്ട്. കാപ്പിത്തോട്ടങ്ങള്‍ക്കിടയിലൂടെയുള്ള ഒരു നടത്തം ആരാണ് ഇഷ്ടപ്പെടാത്തത്. ശിവ്ഗിരിയിലാണെങ്കില്‍ ഇതിന് ഒട്ടേറെ അവസരങ്ങളുമുണ്ട്. കുന്നിന്റെ മുകളിലായുള്ള നൂറ് വര്‍ഷം പഴക്കമുള്ള ഒരു തോട്ടമാണ് ഇവിടത്തെ കാപ്പിത്തോട്ടങ്ങളില്‍ ഏറ്റവും മനോഹരമായത്. ടൈഗര്‍ റിസര്‍വ്വ് വനത്തിന് മധ്യത്തിലായിട്ടാണ് ഈ കാപ്പിത്തോട്ടമുള്ളത്. കുന്നിന്‍ മുകളില്‍ നിന്നുള്ള കാപ്പിത്തോട്ടത്തിന്റെ കാഴ്ച വര്‍ണനയ്ക്കതീതമാണ്.

മറ്റൊരു പ്രധാന ആകര്‍ഷണം ശിവ്ഗിരിയിലെ ഏറ്റവും ഉയരമുള്ള കുന്നാണ് ദൊഡ്ഡബലെ സിദ്ദരഗുഡ്ഡ പീക്ക് എന്നാണ് ഇതിന്റെ പേര്. സമുദ്രനിരപ്പില്‍ നിന്നും 5,500 അടി ഉയരത്തിലാണ് ഈ പര്‍വ്വതശിഖരം ഇവിടെ 400 വര്‍ഷം പഴക്കമുള്ള ഒരു ശിവക്ഷേത്രവുമുണ്ട്. മദഗദകരെ തടാകം, മുത്തൊടി വന്യജീവി സങ്കേതം ശിവ്ഗിരിയ്ക്കടുത്തുള്ള മറ്റ് ആകര്‍ഷണങ്ങള്‍. റോക്ക് ക്ലൈംബിങും ട്രക്കിങ്ങുമാണ് ശിവ്ഗിരിയിലെ ഏറ്റവും പ്രധാന വിനോദങ്ങള്‍. മലകയറ്റപ്രിയര്‍ക്ക് പുതിയ അനുഭവങ്ങളാണ് ശിവ്ഗിരി നല്‍കുന്നത്. ബാംഗ്ലൂരില്‍ നിന്നും 235കിലോമീറ്റര്‍ അകലെയാണ് ഈ സ്ഥലം.