ബോര്‍ഡിയില്‍ നിന്നും ഏതാണ്ട് 24 കിലോമീറ്റര്‍ അകലത്തിലായാണ് ദഹനു കോട്ട സ്ഥിതി ചെയ്യുന്നത്. കരിങ്കല്ലില്‍ കൊത്തിയുണ്ടാക്കിയ ആ കോട്ടയുടെ ചുമരുകള്‍ക്ക് ഏകദേശം 38 അടിയോളം ഉയരവും പത്തടിയോളം കനവുമുണ്ട്. ചിമാജി റാവു അപ്പയുടെ കീഴില്‍ മറാത്ത വംശജര്‍ എ ഡി 1739 ജനുവരിയില്‍ ഈ കോട്ട പിടിച്ചടക്കുകയായിരുന്നു എന്നാണ് വിശ്വസിക്കപ്പെടുന്നത്.

ബാസണ്‍ ഉടമ്പടി പ്രകാരം എ ഡി 1817 ല്‍ ബ്രിട്ടീഷുകാര്‍ ഈ കോട്ടയുടെ നിയന്ത്രണം ഏറ്റെടുക്കുകയായിരുന്നു. പിന്നീട് കോട്ട ഒരു ജയിലായി മാറി. 1818 ല്‍ കോട്ടയുടെ മട്ടുപ്പാവ് ഇടിഞ്ഞു വീണെങ്കിലും ചരിത്രാന്വേഷികള്‍ക്ക് നിരവധി വിസ്മയങ്ങള്‍ പകര്‍ന്നുകൊണ്ട് ഈ കോട്ട ഇന്നും നിലനില്‍ക്കുന്നു. ബോര്‍ഡിയിലെത്തുന്ന സഞ്ചാരികള്‍ നിര്‍ബന്ധമായും കണ്ടിരിക്കേണ്ട ഒരു കാഴ്ചയാണ് ദഹനു കോട്ട എന്ന കാര്യത്തില്‍ സംശയമില്ല.