Click it and Unblock the Notifications
മഹാരാഷ്ട്രയിലെ റായ്ഗഡ് ജില്ലയില്‍ കോട്ടകള്‍ക്ക് പ്രശസ്തമായ നഗരമാണ് കര്‍ണാല. ചുറ്റും കനത്ത ഫോറസ്റ്റും മലനിരകളുമായി സമുദ്രനിരപ്പില്‍ നിന്നും ഏതാണ്ട് 439 മീറ്റര്‍ ഉയരത്തിലായാണ് കര്‍ണാല സ്ഥിതിചെയ്യുന്നത്.
ചരിത്രപരമായ പ്രാധാന്യം
തുഗ്ലക്ക് ഭാരണകാലത്ത് കൊങ്കണ്‍ ജില്ലയുടെ ആസ്ഥാനമായിരുന്നു കര്‍ണാല. അഹമ്മദ് നഗറിന്റെ ശില്‍പിയായ നിസാം ഷാ പിന്നീട് ഈ നഗരം ഏറ്റെടുക്കുകയായിരുന്നു. പോര്‍ട്ടുഗീസുകാരുമായി അടുത്ത ബന്ധം പുലര്‍ത്തിയിരുന്ന നിസാമിന് ലഭിച്ച സമ്മാനമായിരുന്നു പ്രശസ്തമായ കര്‍ണാല കോട്ട. കര്‍ണാലയുടെ ഭൂപ്രകൃതി പരമായ പ്രത്യേകതകള്‍ ശരിക്കും തിരിച്ചറിഞ്ഞത് പിന്നീട് ഇവിടം അധീനതയില്‍ വച്ചിരുന്ന ബ്രിട്ടീഷ് ഈസ്റ്റ് ഇന്ത്യാ കമ്പനിയാണ്.
പ്രകൃതിയുടെ മടിയില്‍
കര്‍ണാല പക്ഷിസങ്കേതമാണ് ഈ നഗരത്തെ പ്രകൃതിസ്‌നേഹികള്‍ക്ക് പ്രിയങ്കരമാക്കുന്നത്. പക്ഷിനിരീക്ഷണത്തില്‍ വ്യാപൃതരായ നിരവധി സഞ്ചാരികളാണ് വര്‍ഷം തോറും ഇവിടെയെത്തുന്നത്. 150 ലധികം പക്ഷിവര്‍ഗങ്ങള്‍ അന്തേവാസികളും 37 തരം പക്ഷിവര്‍ഗങ്ങള്‍ അതിഥികളുമായി ഇവിടെയുണ്ട്. നിരവധി ട്രക്കിംഗ് ആക്ടിവിറ്റീസും പ്രദാനം ചെയ്യുന്ന മനോഹരമായ ഒരു വിനോദസഞ്ചാര കേന്ദ്രമാണ് കര്‍ണാല.
വര്‍ഷം മുഴുവന്‍ നീണ്ടുനില്‍ക്കുന്ന മനോഹരമായ കാലാവസ്ഥയാണ് കര്‍ണാലയുടെ ഒരു പ്രത്യേകത. അവധിക്കാലം ചെലവഴിക്കാന്‍ പറ്റിയ അന്തരീക്ഷമാണ് ഇവിടത്തേത്. മഴക്കാലം മനോഹരമായ പ്രകൃതിക്കാഴ്ചകളൊരുക്കുന്നു, ശീതകാലത്താകട്ടെ ദേശാടനപ്പക്ഷികളാണ് ഇവിടെ കാഴ്ചയൊരുക്കുന്നത്. അവധിക്കാലത്തിനും പെട്ടെന്നൊരു വീക്കെന്‍ഡ് ചെലവഴിക്കാനും പറ്റിയ സ്ഥലമാണ് കര്‍ണാല.
റോഡ്, റെയില്‍, വിമാന മാര്‍ഗങ്ങളില്‍ ഇവിടെയെത്താന്‍ വലിയ പ്രയാസമില്ല. മുംബൈയില്‍ നിന്നു ഏകദേശം 60 കിലോമീറ്റര്‍ ദൂരമുണ്ട് ഇവിടേക്ക്. പനവേലില്‍ നിന്നും വെറും 10 കിലോമീറ്റര്‍ ദൂരമേയുള്ളൂ ഇവിടേക്ക്. പനവേലില്‍ നിന്നും നിരവധി വാഹനങ്ങള്‍ ഇവിടേക്ക് ലഭിക്കും.
