Click it and Unblock the Notifications
ഉത്തര്പ്രദേശിലെ ചെറിയൊരു ഗ്രാമമാണ് ദെയൊഗട്ട്. മധ്യപ്രദേശിലെ ഗ്വാളിയറിനോട് ചേര്ന്ന് കിടക്കുന്ന ഈ ഗ്രാമവാസികളുടെ പ്രധാന ഉപജീനമാര്ഗ്ഗം കൃഷിയാണ്. ഗുപ്തകാലഘട്ടത്തിലെ സ്മാരകങ്ങള് ദെയൊഗട്ടിനെ പ്രശസ്തമാക്കുന്നു. പ്രത്യേകിച്ച് ബേത്വാ നദിക്കരയില് സ്ഥിതി ചെയ്യുന്ന കോട്ട. ജൈന- ഹിന്ദുമതങ്ങളുമായി ബന്ധപ്പെട്ട നിരവധി സ്മാരകങ്ങള് കോട്ടയ്ക്കകത്തും പുറത്തും കാണാം.
ദെയൊഗട്ടിലും പരിസരങ്ങളിലുമുള്ള വിനോദസഞ്ചാര കേന്ദ്രങ്ങള്
പുരാതന മന്ദിരങ്ങളും ക്ഷേത്രങ്ങളും കാണാനുള്ള അവസരമാണ് ദെയൊഗട്ട് സഞ്ചാരികള്ക്ക് നല്കുന്നത്. ഉത്തരേന്ത്യയിലെ ഏറ്റവും പുരാതനമായ പഞ്ച്യാതന ക്ഷേത്രമായ ദശാവതാര ക്ഷേത്രം ഇവിടുത്തെ പ്രധാനപ്പെട്ട കാഴ്ചകളില് ഒന്നാണ്. ഈ ക്ഷേത്രം നാശത്തിന്റെ വക്കിലാണ്. ഗംഗാദേവി, യുമാനദേവി എന്നിവരുടെ ശില്പ്പങ്ങള് ഉള്പ്പെടെ നിരവധി സവിശേഷതകള് ഈ ക്ഷേത്രത്തിനുണ്ട്. ഇവിടുത്തെ മറ്റൊരു പ്രധാന വിനോദസഞ്ചാര കേന്ദ്രമാണ് ദെയൊഗട്ട് കോട്ട. കീര്ത്തിഗിരിദുര്ഗ്ഗാ കോട്ട എന്നും ഇത് അറിയപ്പെടുന്നു. ചന്ദേല രാജാവായിരുന്ന കീര്ത്തിവര്മ്മന്റെ കാലത്ത് 1057ല് ആണ് ഈ കോട്ട നിര്മ്മിച്ചത്. കോട്ടയ്ക്ക് സമീപത്ത് നിരവധി ജൈന ക്ഷേത്രങ്ങളുണ്ട്. എട്ടാം നൂറ്റാണ്ടിലും ഒമ്പതാം നൂറ്റാണ്ടിലും നിര്മ്മിച്ച ക്ഷേത്രങ്ങളും ഇവയില് പെടുന്നു. ദെയൊഗട്ടില് നദിയിലേക്ക് നീളുന്ന മൂന്ന് പടവുകളുണ്ട്. ചരിത്രപരമായ പ്രാധാന്യം ഉള്ളവയാണ് ഈ പടവുകളും. ദെയൊഗട്ട് പുരാവസ്തു മ്യൂസിയവും സന്ദര്ശിക്കാവുന്നതാണ്.
എങ്ങനെ ദെയൊഗട്ടില് എത്തിച്ചേരാം
റോഡ് മാര്ഗ്ഗമോ റെയില് മാര്ഗ്ഗമോ വിമാനമാര്ഗ്ഗമോ ദെയൊഗട്ടില് എത്താവുന്നതാണ്. ഏറ്റവും അടുത്തള്ള റെയില്വെ സ്റ്റേഷന് ലളിത്പൂര് ആണ്. ഗ്വാളിയറിലാണ് ഏറ്റവും അടുത്തുള്ള വിമാനത്താവളം സ്ഥിതി ചെയ്യുന്നത്.
