Click it and Unblock the Notifications
ബാംഗ്ലൂരില് നിന്നും കേവലം 60 കിലോമീറ്റര് അകലെയായി പ്രകൃതിസുന്ദരമായ കാഴ്ചകളൊരുക്കി വിനോദസഞ്ചാരികളെ കാത്തിരിക്കുന്നു നന്ദി ഹില്സ്. സമുദ്രനിരപ്പില് നിന്നും 4851 മീറ്റര് ഉയരത്തിലാണ് സഞ്ചാരികളുടെ ഈ പ്രിയ താവളം. ചിക്കബല്ലാപൂര് ജില്ലയിലെ ഈ വിനോദസഞ്ചാര കേന്ദ്രത്തിലേക്ക് ബാംഗ്ലൂര് ഇന്റര്നാഷണല് എയര്പോര്ട്ടില് നിന്നും ഏറെ അകലമില്ല.
ചരിത്രത്തിലെ നന്ദി ഹില്സ്
രസകരമായ കഥകള് ഒളിച്ചിരിക്കുന്ന ചരിത്രമുണ്ട് ഹില്സിന്റെ പേരിന് പിന്നില്. ഉറങ്ങിക്കിടക്കുന്ന ഒരു കാളയുടെ രൂപമുണ്ട് ഈ കുന്നിനെന്നും അതുകൊണ്ട് നന്ദി ഹില്സ് എന്ന പേരുലഭിച്ചുവെന്നും ചിലര് പറയുന്നു. ചോള കാലഘട്ടത്തില് അനന്തഗിരി എന്നായിരുന്നു നന്ദി ഹില്സിന് പേരെന്ന് സൂചനകളുണ്ട്. സ്വാതന്ത്രസമരവുമായി ബന്ധപ്പെട്ടും നന്ദി ഹില്സിന്റെ പേര് പ്രശസ്തമാണ്. കീഴടക്കാന് സാധ്യമല്ലാത്തത് എന്ന് പേരിട്ട് മൈസൂര് സുല്ത്താനായിരുന്ന ടിപ്പു സുല്ത്താന് പണികഴിപ്പിച്ച നന്ദിദുര്ഗ് എന്ന കോട്ട നന്ദി ഹില്സിലാണ്. എന്നാല് 1791 ല് ബ്രിട്ടീഷുകാര് ഈ കോട്ടയും കീഴടക്കുകതന്നെ ചെയ്തു.
ടിപ്പുവിന്റെ വേനല്ക്കാല വിശ്രമസ്ഥലമായിരുന്നു നന്ദി ഹില്സ്. കുറ്റവാളികളെ താഴേക്കിട്ടു കൊല്ലുന്ന ടിപ്പൂസ് ഡ്രോപ്പ് പോലെയുള്ള കഥകള് പറയാനുണ്ട് നിരവധി രഹസ്യവഴികളെത്തിച്ചേരുന്ന നന്ദിഹില്സിന്. ടിപ്പുവിന്റെ സമ്മര് പാലസും ഗവി വീരഭദ്രക്ഷേത്രവുമടക്കമുള്ള മനോഹരമായ കെട്ടിടങ്ങള് ഇവിടെ കാണാം. പാരാഗ്ലൈഡിംഗിനും സൈക്ലിംഗിനും ഇവിടെ സൗകര്യമുണ്ട്. അമൃതസരോവര് വാട്ടര് ടാങ്കും ഹോര്ട്ടികള്ച്ചര് ഗാര്ഡനുമാണ് നന്ദിഹില്സില് വിനോദസഞ്ചാരികളെ കാത്തിരിക്കുന്ന മറ്റൊരു കാഴ്ച.
ചിക്കബെല്ലാപൂരില് നിന്നും 7 കിലോമീറ്റര് മാറിയാണ് മുദ്ദെനഹള്ളി. ആധുനിക ഇന്ത്യ കണ്ട എണ്ണം പറഞ്ഞ എഞ്ചിനീയര്മാരിലൊരാളായ വിശ്വേശ്വരയ്യയുടെ ജന്മസ്ഥമാണിവിടം. ഇവിടെയാണ് വിശ്വേശ്വരയ്യ മ്യൂസിയം സ്ഥിതി ചെയ്യുന്നത്. വിശ്വേശ്വരയ്യയുടെ കയ്യക്ഷരത്തിലുള്ള കത്തുകള്, രേഖകള്, അദ്ദേഹത്തിന്റെ ഫോട്ടോകള് എന്നിവയും മ്യൂസിയത്തില് സൂക്ഷിച്ചിട്ടുണ്ട്. ദ്രവീഡിയന് നിര്മാണവൈദഗ്ധ്യത്തിന്റെ കഥകള് പറയുന്ന ഭോഗ നന്ദീശ്വര ക്ഷേത്രവും ഇവിടെയാണ് നിലകൊള്ളുന്നത്.
