Click it and Unblock the Notifications
മിസോറാമിലെ ഏറ്റവും മനോഹരമായ ഗ്രാമങ്ങളിലൊന്നാണ് തെന്സാവല്. ഒരു കാലത്ത് കൊടും വനമായിരുന്ന തെന്സാവല് ഇന്ന് സെര്ഷിപ്പ് ജില്ലക്ക് കീഴിലാണ്. മിസോറാമിന്റെ തലസ്ഥാനമായ ഐസ്വാളില് നിന്ന് 43 കിലോമീറ്റര് അകലെയാണ് ഈ ഗ്രാമം.
1961 വരെ വന്യജീവികള് നിറഞ്ഞ വനപ്രദേശമായിരുന്നു തെന്സാവല്. പിന്നീട് ഇവിടെ വനം വെട്ടിത്തെളിച്ച് കൃഷിയാരംഭിക്കുകയും തുടര്ന്ന് ജനങ്ങള് അവിടെ താമസം തുടങ്ങുകയും ചെയ്തു. 1963 ല് ബെന്ഗുവായ സെയ്ലോ ആണ് ഇവിടെ ഗ്രാമം സ്ഥാപിച്ചതെന്നാണ് വിശ്വസിക്കപ്പെടുന്നത്. ഇന്ന് തെന്സാവല് അറിയപ്പെടുന്നത് മിസോ കൈത്തറി വ്യവസായത്തിന്റെ പേരിലാണ്.
തെന്സാവലിലെ കാഴ്ചകള്
തെന്സാവല് ഒഴിവാക്കാനാവാത്ത ഒരു ടൂറിസ്റ്റ് കേന്ദ്രമല്ല. സാമ്പ്രദായികമായ രീതികളില് നിന്ന് മാറിയ കാഴ്ചകള് ആഗ്രഹിക്കുന്നവര്ക്കാണ് തെന്സാവല് അനുയോജ്യം. സമ്പന്നമായ സസ്യ ജീവജാലങ്ങളുടെ കേന്ദ്രമാണ് ഇവിടം. അധികമില്ലെങ്കിലും അതിശയിപ്പിക്കുന്ന കാഴ്ചകളാണ് ഇവിടെ സഞ്ചാരികളെ കാത്തിരിക്കുന്നത്. മിസോറാമിലെ ഏറ്റവും ഉയരം കൂടി വെള്ളച്ചാട്ടമായ വാന്റാവങ്ങ്, പലതരം മാനുകള് വളരുന്ന തെന്സാവല് ഡീര് പാര്ക്ക്, ചാവങ്ങ്ചിഹി ഗുഹ എന്നിവ ഇവിടുത്തെ പ്രധാന കാഴ്ചകളാണ്. ഈ ഗുഹയുമായി ബന്ധപ്പെട്ട ഐതിഹ്യമനുസരിച്ച് ഒരു പാമ്പും, സ്ത്രീയും തമ്മിലുള്ള പ്രണയത്തിന് സാക്ഷ്യം വഹിച്ച ഇടമാണിത്. തുവാല്വംഗി ത്ലാന് എന്നത് ഒരു സ്ത്രീ തന്റെ ഭര്ത്താവ് മരണമടഞ്ഞപ്പോള് അതിനരികിലായി സ്വന്തം ശവദാഹം നടത്തിയ സ്ഥലമാണ്.
