പൗരാണിക കാഴ്ചകളും ദ്വീപ് യാത്രയും പിന്നെ കിടിലൻ ഭക്ഷണവും..കെഎസ്ആർടിസിയുടെ 'വേറെ ലെവൽ' കൊച്ചി യാത്ര

കൊച്ചി കാണാം.. ഇങ്ങനെ

മട്ടാഞ്ചേരിയും ഫോർട്ടു കൊച്ചിയും കണ്ട് കുറേ ഷോപ്പിങ്ങും നടത്തി വരുന്നതാണ് പലപ്പോഴും നമ്മുടെ കൊച്ചി യാത്രകൾ. എന്നാൽ അല്പം സമയം കണ്ടെത്തുവാൻ കഴിയുമെങ്കിൽ കൊച്ചിയിലെ തീർത്തും വ്യത്യസ്തമായ കുറേയധികം കാഴ്ചകളിലേക്ക് പോകാം. അതും കടലും കായലും കനാലും എല്ലാം കണ്ട് നല്ല കിടിലൻ നാടൻ ഭക്ഷണം കഴിച്ച് കൊതിതീരെ ബോട്ട് യാത്ര ചെയ്ത് ആഹ്ലാദിച്ച് ഒരു യാത്ര. മാത്രമല്ല, വെറും ഒറ്റ ദിവസത്തിൽ എത്രയധികം കാഴ്ചകളും യാത്രാനുഭവങ്ങളുെ സ്വന്തമാക്കുവാൻ സാധിക്കുമോ, അതെല്ലാം നിങ്ങളിലേക്കെത്തിക്കുന്ന ഒരു യാത്രയാണിത്.

PC:J A N U P R A S A D

തീർത്തും വ്യത്യസ്ഥം ഈ യാത്ര!

ഭക്ഷണങ്ങളിലെ വൈവിധ്യം കൊച്ചിയെ കേരളത്തിലെ മറ്റിടങ്ങളിൽ നിന്നും തീർത്തും വ്യത്യസ്തമാക്കുന്നു. കടൽ, കായൽ വിഭവങ്ങൾ, ഷാപ്പ് രുചികള്, നാടൻ വിഭവങ്ങൾ എന്നിങ്ങനെ രുചിമുകുളങ്ങളെ ഉദ്ദീപിപ്പിക്കുന്ന രുചികളുടെ കൂടാരമാണീ നാട്. ചരിത്രപരമായി കൊച്ചിയെ നോക്കിക്കാണുവാൻ സഹായിക്കുന്ന പൗരാണിക ഇടങ്ങൾ കൂടിയും ഈ യാത്രയിൽ ഉൾപ്പെടുത്തിയിട്ടുണ്ട്. മൂലമ്പള്ളി, പേഴല, കടമക്കുടി എന്നിങ്ങനെ ദ്വീപുകളും യാത്രയിൽ ഉൾപ്പെടുത്തിയിട്ടുണ്ട്,

PC:Arjun MJ

കായലും ദ്വീപുകളും... പിന്നെ കിടിലൻ ഭക്ഷണവും

കണ്ടെയ്നർ റോഡിലുള്ള മൂലമ്പള്ളി ബോട്ട് ജെട്ടിയിൽ നിന്നും ബോട്ട് യാത്രയോടു കൂടിയാണ് ഈ യാത്ര ആരംഭിക്കുന്നത്. മൂലമ്പള്ളി, പേഴല, കോതാട്, ചെറിയൻ തുരുത്ത് ൃ, വലിയ കടമക്കുടി, ചെറിയ കടമക്കുടി, ചെന്നൂർ, കോടംതുരുത്ത് എന്നീ ദ്വീപുകൾ സന്ദർശിക്കും. വെറുതെ കണ്ടുപോവുകയല്ല ചെയ്യുന്നത്. പരം ഒരു ദ്വീപിലിറങ്ങി . ദ്വീപിലെ മത്സ്യഫാമുകൾ, ചൈനീസ് വലകൾ, കനാൽ യാത്ര, നെൽപ്പാടങ്ങൾ എന്നിവ കണ്ടാസ്വദിക്കുവാൻ സമയമുണ്ട്. അതിനുശേഷം കായലിന്റെ കിടിലൻ സൗന്ദര്യം കണ്ട് ഉച്ചഭക്ഷണം ആസ്വദിക്കാം. കേരളീയ രീതിയിൽ മീൻ കറി കൂടി ഉൾപ്പെടുത്തിയ ഭക്ഷണമാണ് ലഭ്യമാക്കുന്നത്. താല്പര്യമുള്ളവര്‍ക്ക് സ്വന്തം ചിലവില്‍ കായൽ വിഭവങ്ങൾ വാങ്ങുവാനും കഴിയും.

PC:Mayur Nair

ഇനി ഫോർട്ട് കൊച്ചിയിലേക്ക്

ഭക്ഷണം കഴിഞ്ഞാൽ നേരെ കൊച്ചിയിലേക്ക് പോകും. ഏകദേശം 1 മണിക്കൂർ യാത്ര കായലിന്‍റെ കാഴ്ചകള്‍ പരിചയപ്പെടുത്തും. ഫോർട്ട് കൊച്ചിയിൽ കഥക്ക് കൾച്ചറൽ സെന്റെർ, വാസ്കോഡ ഗാമ ചർച്ച്, ജൂതത്തെരുവ്, മട്ടാഞ്ചേരി തുടങ്ങിയ സ്ഥലങ്ങൾ സന്ദർശിക്കുന്നു. വൈകുന്നേരത്തോടെ ബോട്ടിൽ ഡിന്നറും ഡി.ജെ പാർട്ടിയുമായി മറൈൻ ഡ്രൈവിൽ തിരിച്ചെത്തുന്നു. തുടർന്ന് മറൈൻ ഡ്രൈവ് പാർക്കിൽ സമയം ചിലവഴിച്ച് രാത്രി എട്ടു മണിയോടെ മടക്കം.

PC:Firos nv

യാത്രാ നിരക്കും തിയതിയും

ഒരാൾക്ക് യാത്രാ നിരക്ക് 1950 രൂപയാണ്. ബസ് ടിക്കറ്റ്,
വെൽക്കം ഡ്രിങ്ക്സ്,
ഉച്ചഭക്ഷണം (കേരള മീൽസ്, ഫിഷ് കറി) - (പ്രത്യേക കായൽവിഭവങ്ങൾ വേണ്ടവർക്ക് അധിക തുക നൽകി അവ വാങ്ങുന്നതിനുള്ള സൗകര്യം ഒരുക്കിയിട്ടുണ്ട്)
വൈകുന്നേരത്തെ ചായയും സ്നാക്സും, ഡിന്നർ - ചിക്കൻ ബിരിയാണി / വെജ് ബിരിയാണി എന്നിവ ഈ തുകയിൽ ഉൾപ്പെട്ടിട്ടുണ്ട്. 2022 നവംബർ 6 ന് ആണ് യാത്ര ഷെഡ്യൂൾ ചെയ്തിരിക്കുന്നത്.

കൂടുതൽ വിവരങ്ങൾക്കും സീറ്റുകൾ മുൻകൂട്ടി ബുക്ക് ചെയ്യുന്നതിനുംഫോൺ: 9995986658,9388855554, 8592065557,
9446748252.