Click it and Unblock the Notifications
ഹാരപ്പന് സംസ്കാരത്തിന്റെ അവശിഷ്ടങ്ങള് കണ്ടെത്തിയ സ്ഥലം എന്ന നിലയ്ക്കാണ് ധോളവീരയുടെ പ്രശസ്തി. പ്രധാനപ്പെട്ട സിന്ധൂനദീതട സംസ്കാര കേന്ദ്രങ്ങളില് പെടുന്ന ധോളവീര റാന് ഓഫ് കച്ചിലെ ഖാദിര് ബെറ്റ് ദ്വീപിലാണ് സ്ഥിതി ചെയ്യുന്നത്. പ്രാദേശികമായി ഇത് ടിമ്പാ പ്രാചീന് മഹാനഗര് കോട്ടഡ എന്ന് അറിയപ്പെടുന്നു. ഇവിടെ നിന്ന് ഉത്ഘനനം ചെയ്തെടുത്ത ഹാരപ്പന് നഗരം തന്നെയാണ് ധോളവീരയുടെ ഏറ്റവും പ്രധാന ആകര്ഷണം.
ഇവിടെ നിലനിന്നിരുന്ന സംസ്കാരത്തെ കുറിച്ചും ഭാഷ, നിര്മ്മാണ ശൈലികള് എന്നിവയെ കുറിച്ചും ധോളവീര വ്യക്തമായ ചിത്രം നല്കുന്നുണ്ട്. അതുകൊണ്ട് തന്നെ ചരിത്രകാരന്മാരെ സംബന്ധിച്ചിടത്തോളം ധോളവീരയില് നിന്നുള്ള കണ്ടെത്തലുകള് വളരെ പ്രധാനപ്പെട്ടവയാണ്. നിശ്ചിതമായ ജ്യാമിതീയ രീതിയിലായിരുന്നു ധോളവീരയുടെ നിര്മ്മിതി. അതുകൊണ്ട് തന്നെ നഗരത്തില് മൂന്ന് പ്രധാന ഭാഗങ്ങള് കാണാം. കോട്ട, നഗരമധ്യം, താഴ്ന്ന പട്ടണഭാഗം എന്നിവയായിരുന്നു ഈ ഭാഗങ്ങള്. നഗരമധ്യത്തില് ഒരു കോട്ടയും നിര്മ്മിച്ചിരുന്നു.
മറ്റു ഹാരപ്പന് നഗരങ്ങളില് നിന്ന് വ്യത്യസ്തമായി ഇവിടെ നിര്മ്മാണത്തിന് കല്ലുകളാണ് ഉപയോഗിച്ചിരുന്നത്. മറ്റിടങ്ങളിലെ പ്രധാന നിര്മ്മാണ വസ്തു ചുടുകല്ലുകളായിരുന്നു. ജലസംരക്ഷണമായിരുന്നു ധോളവീരയുടെ മറ്റൊരു സവിശേഷത. ഇവിടെ നിരവധി ജലസംഭരണികള് നിര്മ്മിച്ചിരുന്നതായി ചരിത്രകാരന്മാര് സാക്ഷ്യപ്പെടുത്തുന്നു. ആഭരണങ്ങള്, പാത്രങ്ങള്, മുദ്രകള്, സ്വര്ണ്ണം, വെള്ളി, ടെറാകോട്ട ഉത്പന്നങ്ങള്, മെസപ്പൊട്ടോമിയയില് നിന്നുളള ഏതാനും സാധനങ്ങള് എന്നിവ ധോളവീരയില് നിന്ന് കണ്ടെടുത്തിട്ടുണ്ട്.
റോഡ് മാര്ഗ്ഗം ധോളവീരയില് എത്താവുന്നതാണ്. ഗാന്ധിധാം വിമാനത്താവളം, സമക്യാലി റെയില്വെ സ്റ്റേഷന് എന്നിവയും ധോളവീരയ്ക്ക് സമീപത്താണ് സ്ഥിതി ചെയ്യുന്നത്.
