ഗവിയും മൂന്നാറും നെല്ലിയാമ്പതിയും കണ്ടു വരാം.. പാലക്കാട് കെഎസ്ആർടിസിയുടെ കിടിലൻ ബജറ്റ് യാത്രകൾ

പാലക്കാട്-ഗവി പാക്കേജ്

കെഎസ്ആർടിസിയുടെ ബജറ്റ് യാത്രകളിലെ താരം ഇപ്പോൾ ഗവിയാണ്. കേരളത്തിലെ എല്ലാ ജില്ലകളിൽ നിന്നും ഗവിയിലേക്ക് കെഎസ്ആർടിസി പാക്കേജ് ടൂർ സംഘടിപ്പിക്കുന്നുണ്ട്. പാലക്കാട് ഡിപ്പോയുടെ യാത്ര ജനുവരി എട്ടാം തിയതി ഞായറാഴ്ച രാത്രി പത്ത് മണിക്ക് പുറപ്പെടും. പിറ്റേന്ന് പുലർച്ചെ ഗവിയിലെത്തി സന്ദര്‍ശനം നടത്തി, ചൊവ്വാഴ്ച (ജനുവരി 10) പുലർച്ചെ നാലു മണിയോടു കൂടി പാലക്കാട് എത്തുന്ന വിധത്തിലാണ് പ്ലാൻ ചെയ്തിരിക്കുന്നത്. 2850 രൂപയാണ് ടിക്കറ്റ് നിരക്ക്.

പാലക്കാട്-നെഫർറ്റിറ്റി പാക്കേജ്

പാലക്കാട് നിന്നും കൊച്ചിയിലെ ആഢംബര കപ്പലായ നെഫർറ്റിറ്റിയിലേക്ക് ബജറ്റ് യാത്രകൾ നടത്തുന്നു. പാലക്കാട് നിന്നും എസി ലോ ഫ്ലോർ ബസ്സിൽ ബോൾഗാട്ടി ജെട്ടിയിൽ യാത്രികരെ എത്തിക്കുകയും, കപ്പൽ യാത്രയ്ക്കു ശേഷം പാലക്കാട് തിരികെ എത്തിയ്ക്കുന്നതുമാണ് പാക്കേജിൽ ഉൾപ്പെട്ടിരിക്കുന്നത്. അഞ്ച് മണിക്കൂർ കപ്പലിൽ ചിലഴിക്കുവാൻ സാധിക്കും. സംഗീത വിരുന്നിന്റെ അകമ്പടിയിൽ യാത്രയും, വിഭവ സമൃദ്ധമായ ഭക്ഷണവും പാക്കേജിൽ ഉൾപ്പെടുന്നു.
ബസ്സ് യാത്രാസമയത്തെ ഭക്ഷണ ചെലവ് യാത്രികർ വഹിക്കേണ്ടതാണ്. 5 വയസ്സിനും, 10 വയസ്സിനുമിടസിലുള്ളവർക്ക് 1999/-രൂപയും 10 ന് മുകളിൽ 3499/- രൂപയുമാണ് ടിക്കറ്റ് നിരക്ക്.

പാലക്കാട്- നെല്ലിയാമ്പതി പാക്കേജ്

കാടും കാട്ടുകാഴ്ചകളും ജൈവവൈവിദ്യവും കാട്ടുമൃഗങ്ങളെയുമെല്ലാം കണ്ടാസ്വദിച്ച് പോകുവാൻ സാധിക്കുന്ന നെല്ലിയാമ്പതിയിലേക്കും പാലക്കാട് നിന്നും കെഎസ്ആർടിസി ബജറ്റ് യാത്രകൾ നടത്തുന്നുണ്ട്.
പോത്തുണ്ടി ഡാമിന്റെ കാഴ്ചകൾ ആസ്വദിച്ച് ത് വരയാടു മല വ്യൂ പോയിന്‍റും സീതാർക്കുണ്ടും കണ്ട് ഓറഞ്ച് ഫാമിലെ ഉദ്യാന ഭംഗി ആസ്വദിച്ച് പോത്തുപാറയിലെത്തി തേയില തോട്ടത്തിന്റെ ഭംഗി കാണാം. തുടർന്ന്, കാട്ടിലൂടെ ലഘു നടത്തം ആസ്വദിച്ച് കേശവൻ പാറയിലെത്തും. ഇവിടുന്ന് പോത്തുണ്ടി ഡാമിലെത്തുന്നതോടെ സാഹസിക റൈഡുകൾ ആസ്വദിക്കുവാനുള്ള അവസരമാണ്. പ്രഭാത ഭക്ഷണം, ഉച്ച ഭക്ഷണം, വൈകീട്ട് ഉള്ള ചായ, ലഘു ഭക്ഷണം, പോത്തുണ്ടി ഡാം പ്രവേശന ഫീസ് എന്നിവ അടക്കം ഒരാൾക്ക് 600 രൂപയാണ് ഈടാക്കുന്നത്. രാവിലെ 7 ന് പാലക്കാട് കെഎസ്ആർടിസിയിൽ നിന്ന് ആരംഭിക്കുന്ന യാത്ര വൈകീട്ട് 7 ന് അവസാനിക്കും. എല്ലാ ശനി, ഞായർ ദിവസങ്ങളിലും യാത്ര ഉണ്ടായിരിക്കും. 35 ആളുകൾ ഉണ്ടെങ്കിൽ ഏത് ദിവസവും യാത്ര ഒരുക്കുന്നതാണ്.

PC:Kjrajesh

പാലക്കാട്-മൂന്നാർ യാത്ര

പാലക്കാട് നിന്നും മൂന്നാറിലേക്ക് പോകുവാൻ ആഗ്രഹിക്കുന്നവർക്കായും ബജറ്റ് യാത്ര കെഎസ്ആർടിസി ഒരുക്കുന്നുണ്ട്. കുറഞ്ഞ നിരക്കിൽ സൗകര്യപ്രദമായി, താമസത്തിനും ഭക്ഷണത്തിനും ഒരുപാട് തുക ചിലവഴിക്കാതെ പോയി വരാം എന്നതുന്നെയാണ് ഇതിന്റെ പ്രത്യേകത.
പാലക്കാട് നിന്ന് പകൽ 11.30 ന് പുറപ്പെട്ട് നേര്യമംഗലത്തിനും , അടിമാലിയ്ക്കും, ഇടയിലുള്ള ചീയപ്പാറ വെള്ളച്ചാട്ടം കണ്ട് വൈകീട്ട് 7.30 ഓടെ മൂന്നാറിലെത്തും. അവിടെ ക്യംപ് ഫയർ നടത്തി കെഎസ്ആർടിസി സ്ലീപ്പർ ബസ്സിൽ ഉറങ്ങി, പിറ്റേന്ന് രാവിലെ 9.00 മുതൽ വൈകീട്ട് 5.30. വരെ ടോപ്പ് സ്റ്റേഷനിലുള്ള പ്രധാന സ്ഥലങ്ങളും കാഴ്ചകളും കണ്ട്
രാത്രി 8 മണിയോടെ പാലക്കാട്ടേയ്ക്ക് തിരിക്കും. പിറ്റേന്ന് പുലർച്ചെ 2 മണിയോടെ പാലക്കാട് എത്തുന്ന വിധത്തിലാണ് യാത്ര ക്രമീകരിച്ചിരിക്കുന്നത്. 1150 രൂപയാണ് നിരക്ക്. ഭക്ഷണം, പ്രവേശന ഫീസ് എന്നിവ ഒഴികെയുള്ള തുകയാണിത്.

PC:Navi/Unsplash

പാലക്കാട് - വണ്ടർല

ഇന്ത്യയിലെ ഏറ്റവും വലിയ അമ്യൂസ്മെന്റ് പാർക്കുകളിലൊന്നായ വണ്ടർലായിലേയ്ക്ക് പാലക്കാട് നിന്നും യാത്രകൾ സംഘടിപ്പിക്കുന്നുണ്ട്. ടിക്കറ്റ് നിരക്കുകൾ സീസണുകൾക്കനുസരിച്ച് വ്യത്യാസപ്പെടാം. സ്ക്കൂൾ, കോളേജ്, വിദ്യാർത്ഥികൾക്ക് ഈ ട്രിപ്പ് പ്രയോജനപ്പെടുത്താവുന്ന രീതിയിലുള്ള പാക്കേജാണിത്.

ബുക്കിങ് പാലക്കാട് ഡിപ്പോയുടെ ബജറ്റ് യാത്രകൾ
99470 86128 എന്ന നമ്പരിൽ മുൻകൂട്ടി ബുക്ക് ചെയ്യാം.

PC:Konrad Burdyn/ Unsplash