Click it and Unblock the Notifications
മണിപ്പൂരിലെ ഏറ്റവും ഏറ്റവും വലിയ ജില്ലയാണ് ചുരാചന്ദ്പൂര്‍. ജില്ലാ ആസ്ഥാനം കൂടിയാണ് ഇവിടം. ലംക എന്നാണ് പ്രാദേശികമായി ഈ സ്ഥലം അറിയപ്പെടുന്നത്. ലംക എന്നതിനര്‍ത്ഥം റോഡ് ജംഗ്ഷനിലുള്ള സ്ഥലം എന്നാണ്. മണിപ്പൂരി വാക്കുകളായ ലം (വഴി എന്നര്‍ത്ഥം), ക (ജംഗ്ഷന്‍) എന്നിവയില്‍ നിന്നാണ് ഈ പേരുത്ഭവിച്ചത്. ചെറിയ കുന്നുകളാല്‍ ചുറ്റപ്പെട്ട, ഇടുങ്ങിയ താഴ്വരകളുള്ള മനോഹരമായ പ്രദേശമാണ് ചുരാചന്ദ്പൂര്‍. മണിപ്പൂരിന്‍റെ തലസ്ഥാനമായ ഇംഫാലില്‍ നിന്ന് 59 കിലോമീറ്റര്‍ അകലെയാണ് ചുരാചന്ദ്പൂര്‍.
ചുരാചന്ദ്പൂരിലെ കാഴ്ചകള്‍
ഖുഗ ഡാം, തുയിബോങ്ങിലെ ട്രൈബല്‍ മ്യൂസിയം, താങ്ക്സാം റോഡ്, എന്‍ഗാലോയ് വെള്ളച്ചാട്ടം എന്നിവ ഈ പ്രദേശത്തെ പ്രധാന ആകര്‍ഷണങ്ങളാണ്. ചുരാചന്ദ്പൂരിലേക്കുള്ള യാത്ര പൂര്‍ണ്ണമാകണമെങ്കില്‍ നഗരത്തില്‍ ഒരു ഷോപ്പിംഗ് കൂടി നടത്തണം. ചുരാചന്ദ്പൂരിലെ കരകൗശല വസ്തുക്കളും, കലാസൃഷ്ടികളും ഒരു ഓര്‍മ്മക്കായി കൂടെയെടുക്കാതെ നിങ്ങള്‍ അവിടെ നിന്ന് മടങ്ങില്ല.
ഇംഫാല്‍ കഴിഞ്ഞാല്‍ മണിപ്പൂര്‍ സംസ്ഥാനത്തെ രണ്ടാമത്തെ വലിയ നഗരമാണ് ചുരാചന്ദ്പൂര്‍. കഴിഞ്ഞ ദശാബ്ദങ്ങളില്‍ അതിവേഗതയിലുള്ള വളര്‍ച്ചയാണ് ഈ നഗരം നേടിയത്. മണിപ്പൂര്‍ കലാപങ്ങള്‍ പതിവായ ഒരു സംസ്ഥാനമാണെങ്കിലും ചുരാചന്ദ്പൂര്‍ വളരെ സമാധാനം നിറഞ്ഞ സ്ഥലമാണ്. വിവിധ മതവിഭാഗങ്ങള്‍ ഇവിടെ ഒത്തൊരുമയോടെ കഴിഞ്ഞുകൂടുന്നു. സിംതെ, പെയ്റ്റെ, ഗാങ്ങ്തെ, ഹമാര്‍, സൗ, വായ്ഫേയ്, ലൂസൈ, സുക്തെ തുടങ്ങിയ ജനവിഭാഗങ്ങള്‍ ഇവിടെ സഹിഷ്ണുതയോടെ ജീവിക്കുന്നു.
ജനങ്ങളും, ജീവിത രീതിയും
പണ്ട് ചുരാചന്ദ്പൂര്‍ കുറെ ഗ്രാമങ്ങള്‍ ചേര്‍ന്ന ഒരു ജില്ലയായിരുന്നു. കൃഷിയായിരുന്നു ജനങ്ങളുടെ പ്രധാന ജീവനോപാധി. ഇന്നും കൃഷി നടക്കുന്നുണ്ടെങ്കിലും നഗരം ഒരു വ്യവസായകേന്ദ്രമായി മാറിയിരിക്കുന്നു. നെയ്ത്തും, കന്നുകാലി വളര്‍ത്തലും ജനങ്ങളുടെ മറ്റൊരു തൊഴിലാണ്.
യുദ്ധവും, ചുരാചന്ദ്പൂരും
രണ്ടാം ലോകമഹായുദ്ധകാലത്ത് ജപ്പാന്‍ സൈന്യം ഇന്ത്യയില്‍ പ്രവേശിച്ചപ്പോള്‍ കനത്ത ബോബ് ആക്രമണത്തിന് സാക്ഷ്യം വഹിച്ച സ്ഥലമാണ് ചുരാചന്ദ്പൂര്‍. നഗരം ഏറിയ പങ്കും തകര്‍ന്ന് പോയെങ്കിലും അമ്പത് വര്‍ഷങ്ങള്‍ കൊണ്ട് പുനര്‍ നിര്‍മ്മിക്കപ്പെടുകയും, സമാധാനപൂര്‍ണ്ണമായ ഒരു പ്രദേശം എന്ന പേര് ചുരാചന്ദ്പൂര്‍ സ്വന്തമാക്കുകയും ചെയ്തു.
ചുരാചന്ദ്പൂരില്‍ എങ്ങനെ എത്തിച്ചേരാം
ചുരാചന്ദ്പൂരിനടുത്തുള്ള എയര്‍പോര്‍ട്ട് ഇംഫാലിലാണ്. ഇവിടേക്ക് 59 കിലോമീറ്റര്‍ ദൂരമുണ്ട്. ട്രെയിനില്‍ വരുമ്പോള്‍ ഡിമാപൂരിലോ, ജിരിബാമിലോ ഇറങ്ങാം. സംസ്ഥാനത്തെ മറ്റ് നഗരങ്ങളുമായി മികച്ച റോഡ് സൗകര്യം ലഭ്യമാണ്.
