Click it and Unblock the Notifications
മഹാരാഷ്ട്രയുടെ തെക്കു കിഴക്കന് ഭാഗത്തായി മറാത്തവാഡ പ്രദേശത്താണ് സഞ്ചാരികള്ക്ക് കൗതുകം പകര്ന്നുകൊണ്ട് ലാത്തൂര് സ്ഥിതിചെയ്യുന്നത്. നിരവധി ചരിത്രപരമായ പ്രത്യേകതകളും നിര്മാണകൗശലങ്ങളുമാണ് ലാത്തൂരിനെ സഞ്ചാരികള്ക്ക് പ്രിയങ്കരമാക്കുന്നത്. ഏഴാം നൂറ്റാണ്ടിലെ രാഷ്ട്രകൂടന്മാരുടെ ഭരണകാലം മുതല് തുടങ്ങി നൈസാമിന്റെയും ബ്രിട്ടീഷ് രാജിന്റെയും കീഴിലൂടെ ഇന്ത്യന് യൂണിയന്റെ ഭാഗമാകുന്നതുവരെയുള്ള ലാത്തൂരിന്റെ ചരിത്രം സംഭവബഹുലമാണ്. നിരവധി സഞ്ചാരികളാണ് ലാത്തൂരിന്റെ ചരിത്രമറിയാനും കാഴ്ചകള് കാണാനുമായി ഇവിടെയെത്തുന്നത്.
ലാത്തൂര് കഥകള്
സമുദ്രനിരപ്പില് നിന്നും 2000 അടി ഉയരത്തില് ബാല്ഗഡ് പീഠഭൂമിയിലാണ് സഞ്ചാരികളുടെ പ്രിയകേന്ദ്രമായ ലാത്തൂര് സ്ഥിതിചെയ്യുന്നത്. ശീതകാലത്താണ് ഇവിടം ഏറെ സുന്ദരമാകുന്നതും സഞ്ചാരികള് ഇവിടെയെത്തുന്നതും. മഞ്ഞര, തേര്ന, മന്യാദ്, ലേന്ഡി, ഗര്നി തുടങ്ങിയ നദികളാണ് ലാത്തൂരിനെ സുന്ദരമാക്കുന്നത്. മഞ്ഞര നദിക്കരയിലൂടെയുള്ള ഒരു സായംകാല നടത്ത ഇവിടെയെത്തുന്ന സഞ്ചാരികള്ക്ക് പ്രിയപ്പെട്ട അനുഭവമായിരിക്കുമെന്ന കാര്യത്തില് സംശയം വേണ്ട. താരതമ്യേന കനത്തമഴ ലഭിക്കുന്ന മഴക്കാലത്തും ലാത്തൂര് സുന്ദരിയായി സഞ്ചാരികളെ കാത്തിരിക്കുന്നു.
ഹൈദരാബാദ് നൈസാമിന്റെ കാലഘട്ടം മുതല്ത്തന്നെ മറാത്തവാഡ പ്രദേശത്തിന്റെ സ്ട്രാറ്റജിക് ഹബ്ബ് ആയിരുന്നു ലാത്തൂര്. ഇന്നും ലാത്തൂരിന് ആ പ്രാധാന്യമുണ്ട്. കാര്ഷിക ടൂറിസത്തിന്റെ അനന്തമായ സാധ്യതകള് ആരായാന് ആഗ്രഹിക്കുന്നവര്ക്ക് സംശയം കൂടാതെ ലാത്തൂരിലേക്ക് വരാം. സാഹസികതയ്ക്കും പ്രകൃതിഭംഗിക്കുമൊപ്പം അഗ്രോ ടൂറിസത്തിന്റെ കാഴ്ചകളും സഞ്ചാരികള്ക്ക് നല്കുന്നു ലാത്തൂര്. ഏറ്റവും എളുപ്പത്തില് എത്തിപ്പെടാന് പറ്റുന്ന ഒരു ടൂറിസം സെന്റര് കൂടിയാണ് ലാത്തൂര്. മഹാരാഷ്ട്രയുടെ ഉള്നാടുകളിലേക്കുള്ള യാത്രയില് ഒഴിച്ചുകൂടാനാവാത്തതാണ് നന്ദേടിനും പര്ഭാനിക്കും സമീപത്തായുള്ള ലാത്തൂര്.
