Click it and Unblock the Notifications
മഹാരാഷ്ട്രയിലെ ബുള്ധാന ജില്ലയിലെ ഒരു കൊച്ചുപട്ടണമാണ് ലോനാര്. മുംബൈയില് നിന്നും 483 കിലോമീറ്ററും ഔറംഗാബാദില് നിന്നും 148 കിലോമീറ്ററും സഞ്ചരിച്ചാല് വിദര്ഭ പ്രദേശത്തുള്ള ഈ മനോഹരമായ വിനോദസഞ്ചാര കേന്ദ്രത്തിലെത്താം. സമുദ്രനിരപ്പില് നിന്നും ഏകദേശം 1850 അടി ഉയരത്തിലാണ് ലോനാര്.
ചരിത്രാതീത കാലത്ത് കൂറ്റന് ഒരു ഉല്ക്ക വന്നുപതിച്ചതേത്തുടര്ന്നുണ്ടായ ഗുഹാമുഖത്തിന് പേരുകേട്ട സ്ഥലമാണ് ലോനാര്. ഏതാണ്ട് 52000 വര്ഷങ്ങള് മുമ്പാണ് ഇത് സംഭവിച്ചതെന്നാണ് കരുതപ്പെടുന്നത്. കാലങ്ങള് കഴിഞ്ഞുപോയതോടെ ഈ ഗുഹാമുഖം ഒരു തടാകമായി രൂപപ്പെട്ടു. ഇതാണ് ഇന്ന് ലോനാര് ലേക്ക് എന്ന് അറിയപ്പെടുന്നത്. 4000 അടി വ്യാസവും 450 അടി താഴ്ചയുമുണ്ട് ലോനാര് ലേക്കിന്.
ബ്രിട്ടീഷ് ഉദ്യോഗസ്ഥനായിരുന്ന ജെ ഇ അലക്സാണ്ടറാണ് ഈ തടാകം കണ്ടെത്തിയത് എന്ന് കരുതപ്പെടുന്നു. എന്നാല് മതഗ്രന്ഥങ്ങളായ സ്കന്ദപുരാണത്തിലും പദ്മപുരാണത്തിലും അയിന ഇ അക്ബാരിയിലും ലോനാര് തടാകത്തെക്കുറിച്ച് പരാമര്ശങ്ങളുണ്ടെന്നും വിശ്വാസമുണ്ട്. തടാകത്തിന് അരികിലായി ദൈത്യസുതന്റെ ഒരു ക്ഷേത്രവും കാണാം. രാജ്യത്തിന്റെ വിവിധ ഭാഗങ്ങളില് നിന്നും ക്ഷേത്രവും ഈ തടാകവും കാണുന്നതിനായി സഞ്ചാരികള് എത്തിച്ചേരുന്നു.
എന്തുകൊണ്ട് ലോനാര്
അഗ്നിപര്വ്വതസമാനമായ ഈ കൂറ്റന് ഗുഹാമുഖം രൂപപ്പെട്ടത് ശാസ്ത്രത്തിന്റെ കണ്ണില് ഇന്നും ഒരു അത്ഭുതമാണ്. ഏതാണ്ട് അറുപതിനായിരം വര്ഷങ്ങള്ക്ക് പിന്നോട്ടുള്ള കാലത്തേക്കാണ് ലോനാര് സഞ്ചാരികളെ കൊണ്ടുപോകുന്നത്. ഇന്നലെകളുടെ അത്ഭുതവും പ്രകൃതി നല്കുന്ന ആശ്ചര്യവും കണ്ടറിയാനാണ് സഞ്ചാരികള് പ്രധാനമായും ലോനാറിലെത്തുന്നത്.
