വിനോദസഞ്ചാരികളുടെ ഓഫ്ബീറ്റ് ലക്ഷ്യസ്ഥാനങ്ങളിലൊന്നായ സിക്കിം വിദേശ സഞ്ചാരികള്ക്കും ഏറെ പ്രിയപ്പെട്ട ഇടമാണ്. ഇന്ത്യയെന്ന മഹാരാജ്യത്തിലെ ഏറ്റവും മനോഹരമായ കുറേയധികം കാഴ്ചകള് തെളിമയോടെ കാണുവാന് സാധിക്കും എന്നതാണ് സിക്കിം സഞ്ചാരികള്ക്ക് നല്കുന്ന വാഗ്ദാനം. ഏറ്റവും പുതിയ വാര്ത്തകള് അനുസരിച്ച് സിക്കിം സന്ദർശിക്കുന്ന വിദേശ വിനോദസഞ്ചാരികൾക്ക് ഈ വർഷം ഒക്ടോബർ മുതൽ നിയന്ത്രിത ഏരിയ പെർമിറ്റിനും (ആർഎപി) പ്രൊട്ടക്റ്റഡ് ഏരിയ പെർമിറ്റിനും (പിഎപി) ഓൺലൈനായി അപേക്ഷിക്കാൻ കഴിയും.
സിക്കിം മുഖ്യമന്ത്രി പ്രേം സിംഗ് തമാംഗ് തന്റെ സ്വാതന്ത്ര്യദിന പ്രസംഗത്തിൽ ആണ് ഇക്കാര്യം സൂചിപ്പിച്ചത്. വിദേശ വിനോദ സഞ്ചാരികൾക്കായി ആഎപി, പിഎപി എന്നിവയ്ക്കുള്ള ഓൺലൈൻ അപേക്ഷകൾ ഉടൻ ലഭ്യമാക്കുമെന്നും അദ്ദേഹം അറിയിച്ചിരുന്നു.
ഇതിനു വേണ്ടി മാത്രമായുള്ള വെബ്സൈറ്റ് വികസിപ്പിക്കുന്നതിനുള്ള പ്രവർത്തനങ്ങൾ ദ്രുതഗതിയിൽ നടന്നുകൊണ്ടിരിക്കുകയാണ്. അതിനാൽ ഒക്ടോബറിൽ വരാനിരിക്കുന്ന ടൂറിസ്റ്റ് സീസണിൽ, വിദേശികൾക്ക് നിയന്ത്രിത ഏരിയ പെർമിറ്റിനും സംരക്ഷിത ഏരിയ പെർമിറ്റിനും വേണ്ടി ഒരു പ്രത്യേക വെബ്സൈറ്റ് വഴി ഓൺലൈനായി എളുപ്പത്തിൽ അപേക്ഷിക്കാൻ കഴിയുമെന്നാണ് പ്രതീക്ഷിക്കുന്നത്.
ഇതുവരെ, സിക്കിം സന്ദർശിക്കാൻ, വിദേശികൾക്ക് സാധുവായ ഇന്ത്യൻ വിസ ഉണ്ടെങ്കിൽ, സിക്കിം ടൂറിസം ഓഫീസർമാരിൽ നിന്ന് മുമ്പ് ഇന്നർലൈൻ പെർമിറ്റ് എന്നറിയപ്പെട്ടിരുന്ന നിയന്ത്രിത ഏരിയ പെർമിറ്റ് (ആർഎപി) നേടേണ്ടതുണ്ട്. പുതിയ രീതികള് പ്രാബല്യത്തിലാകുന്നതോടെ എളുപ്പത്തില് അനുമതികള് ലഭിക്കുകയും യാത്രകള് തടസ്സമില്ലാത്തതായി മാറുകയും ചെയ്യും ഇത് കൂടുതൽ വിനോദസഞ്ചാരികളെ ആകർഷിക്കുമെന്നും പ്രതീക്ഷിക്കുന്നു.