ഗോവ... ഏതു തരം സഞ്ചാരികളെയും തൃപ്തരാക്കുന്ന നാട്.. വിദേശികളും സ്വദേശികളും ഒരുപോലെ വന്നുചേരുന്ന, സമയം ചിലവഴിക്കുന്ന ഹോട്ട് ഡെസ്റ്റിനേഷൻ. വലുപ്പത്തിൽ തീരെ കുഞ്ഞനാണ് ഗോവയെങ്കിലും കാഴ്ചകളിൽ ആളൊരു താരം തന്നെയാണ്. എത്ര കണ്ടാലും മടുക്കാത്ത ബീച്ചുകളും ആഘോഷിക്കുവാൻ ഇഷ്ടംപോലെ പബ്ബുകളും രാത്രി ജീവിതം അടിച്ചുപൊളിക്കുന്ന ഇടങ്ങളും എല്ലാം ഗോവയെ പ്രിയപ്പെട്ട സ്ഥലമാക്കുന്നു.
എന്നാൽ ഇവിടെ എത്തിച്ചേരുന്ന സന്ദർശകരില് ചുരുക്കം ചിലർ പരിസ്ഥിതിക്കു ദോഷം വരുത്തുന്ന തരത്തിലുള്ള ചില കാര്യങ്ങൾ ചെയ്യാറുണ്ട്. അതുകൊണ്ടു തന്നെ പ്ലാസ്റ്റിക് വലിച്ചെറിയുന്നതു മുതല് റോഡ്സൈഡിലുള്ള പാചകം വരെ നിരവധി കാര്യങ്ങൾ നിയമവിരുദ്ധമാണെന്ന് ഗോവൻ സർക്കാർ പ്രഖ്യാപിച്ചിട്ടുണ്ട്.
ഗോവ യാത്രയിൽ ശ്രദ്ധിക്കേണ്ട കാര്യങ്ങൾ എന്തൊക്കെയാണെന്നും ഇവിടെ നിയമവിരുദ്ധവും ശിക്ഷാർഹവുമായ കാര്യങ്ങൾ ഏതൊക്കെയാണെന്നും മനസ്സിലാക്കാം
Cover Image: oel Steevan/ Unsplash
ബീച്ചുകളിൽ പാചകം ചെയ്യുന്നത്
റോഡ് സൈഡിൽ ഭക്ഷണം പാചകം ചെയ്യുന്നതു മാത്രമല്ല,
ബീച്ചുകളിലോ, ബീച്ചുകൾക്ക് സമീപമോ ഭക്ഷണം പാചകം ചെയ്യുന്നതും ഇവിടെ വിലക്കിയിട്ടുണ്ട്. ഗോവ യാത്രയിൽ ഏറ്റവുമധികം ശ്രദ്ധിക്കേണ്ട കാര്യങ്ങളിലൊന്നാണിത്. ബീച്ചുകളിൽ മദ്യപിക്കുന്നതിനും വിലക്കുണ്ട്. സഞ്ചാരികൽ ഈ നിയമങ്ങൾ പാലിക്കുന്നുണ്ട് എന്നുറപ്പുവരുത്താനായി വിനോദസഞ്ചാരികളുടെ ഇത്തരം പ്രവർത്തനങ്ങൾ നിയന്ത്രിക്കുന്നതിന് പുതിയ കർശനമായ നിയമങ്ങൾ സർക്കാർ ഏർപ്പെടുത്തിയിട്ടുണ്ട്.
PC:Josue Michel / Unsplash
വെള്ളത്തിലിറങ്ങുന്നതിനു മുൻപ്
വെള്ളത്തിൽ സാഹസിക വിനോദങ്ങൾക്കായി ഇറങ്ങുന്നതിനു മുൻപ് അനുമതിയുള്ള സ്ഥലത്താണ് നിങ്ങളുള്ളതെന്ന് ഉറപ്പു വരുത്തുക. സംസ്ഥാന ടൂറിസം വകുപ്പിൻറെ അനുമതിയില്ലാത്ത പ്രദേശങ്ങളിൽ ബോട്ടിംഗ്/ജല കായിക വിനോദങ്ങൾ അനുവദിക്കില്ലെന്ന് നേരത്തെ അറിയിച്ചിരുന്നു. അംഗീകൃത ടിക്കറ്റിംഗ് കൗണ്ടറുകളും ഓഫീസുകളും ഇല്ലാത്ത സ്ഥലങ്ങളിൽ വിനോദസഞ്ചാര പ്രവർത്തനങ്ങൾ നടത്തുന്നതിനും ഇതിനായി ടിക്കറ്റുകള് വിൽക്കുന്നതിനും വിലക്കുണ്ട്. ഇത്തരം കാര്യങ്ങൾ മുന്കൂട്ടി അന്വേഷിച്ച ശേഷം മാത്രം ഈ സ്ഥലങ്ങളിലേക്കുള്ള യാത്ര പ്ലാൻ ചെയ്യുക.
കടൽത്തീരത്തും ബീച്ചുകളിലും ഡെസ്ക് ബെഡുകളും മറ്റും ഉപയോഗിക്കുന്നതിനും നിയന്ത്രണങ്ങൾ ഏർപ്പെടുത്തിയിട്ടുണ്ട്. നിർദ്ദിഷ്ട യോഗ്യതയുള്ള അതോറിറ്റിയിൽ നിന്ന് സാധുവായ അനുമതികൾ നേടാതെ സംസ്ഥാനത്തെ എല്ലാ ബീച്ചുകളിലും ഡെക്ക്-ബെഡുകൾ, മേശകൾ, മറ്റ് വസ്തുക്കൾ എന്നിവ ഉപയോഗിക്കുന്നത് നിയമ വിരുദ്ധമാണ്. ഇത്തരം സൗകര്യങ്ങള് ഉപയോഗിക്കുന്നതിനു മുൻപ് അവയ്ക്ക് അനുമതിയുണ്ടെന്ന് ഉറപ്പാക്കുക.