യാത്രകള്ക്ക് പഴയ ആവേശങ്ങള് തിരികെ വന്നതിന്റെ സന്തോഷത്തിലാണ് നാമെല്ലാവരും. പഴയതുപോലെ തന്നെ ഉത്സവങ്ങളും ആഘോഷങ്ങളും മറ്റു ചടങ്ങുകളുമെല്ലാം തുടങ്ങിക്കഴിഞ്ഞു. നീണ്ട രണ്ടു വര്ഷങ്ങള്ക്കുശേഷം ഉള്ള സമയമായതിനാല് തന്നെ പല മാറ്റങ്ങളും യാത്രകളില് കാണാം... ഇതാ സമ്മര് യാത്രകളിലെ പുതിയ ട്രെന്ഡുകളും മാറ്റങ്ങളും എന്തൊക്കെയാണ് എന്നു നോക്കാം
നീണ്ട യാത്രകള്
ഈ സമ്മര് സീസണിലെ മറ്റൊരു ആകര്ഷണം നീണ്ട യാത്രകളാണ്. ഒന്നും രണ്ടും ആഴ്ചകളും ഇനിയും സമയം ലഭിക്കുകയാണെങ്കില് ഒരു മാസം വരെ നീണ്ടു നില്ക്കുന്ന യാത്രകള് ചെയ്യുവാനും ആളുകള് തയ്യാറാണ്. വര്ക് അറ്റ് ഹോം ഓപ്ഷന് ഇപ്പോഴും സജീവമായതിനാല് ഇതിന്റെ ഏറ്റവും വലിയ ഗുണമെന്നത് എവിടെനിന്നും യാത്ര ചെയ്യാം എന്നതാണ്. ഓരോ ആഴ്ചയും ഓരോ പ്രദേശത്ത് താമസിച്ച് അവിടം മുഴുവന് കണ്ടുതീര്ത്ത് വീണ്ടും അടുത്തയിടത്തോട്ട് മാറുന്ന രീതിയില് യാത്രകള് ക്രമീകരിക്കാം..
അവസാനനിമിഷത്തിലെ പ്ലാനിങ്ങ്
കഴിഞ്ഞ രണ്ടു വര്ഷമായി ഒരു തരത്തിലും സംഭവിക്കുവാന് സാധ്യതയില്ലാത്ത ഒന്നായിരുന്നു യാത്രകളിലെ അവസാന നിമിഷത്തിലെ പ്ലാനിങ്ങുകള്. ഇപ്പോള് മെല്ലെ എല്ലാം തിരികെ വന്നിരിക്കുകയാണ്. നേരത്തെ ആഭ്യന്തര യാത്രകള് നടത്തുവാനാണെങ്കില് തന്നെ വാക്സിനേഷന് സര്ട്ടിഫിക്കറ്റും ആര്ടിപിസിആര് റിപ്പോര്ട്ടും എല്ലാം വേണ്ടിവന്നിരുന്നു. എങ്കില് ഇപ്പോള് മിക്കയിടത്തും ഇത്തരം നിബന്ധനകള് എല്ലാം മാറ്റിയിട്ടുണ്ട്.
യാത്രയിലെ സുരക്ഷിതത്വം
മാസ്ക് ധരിക്കണമെന്ന നിബന്ധന കേന്ദ്ര സര്ക്കാര് പിന്വലിച്ചതോടെ ജീവിതം തീര്ത്തും സാധാരണ നിലയിലേക്ക് മടങ്ങിവന്നിരിക്കുകയാണ്. പലര്ക്കും ഇത് ഒരു ആശ്വാസമാണെങ്കിലും സുരക്ഷിതത്വം കണക്കിലെടുത്ത് ആളുകള് മാസ്ക് വയ്ക്കുന്നതു തുടരുവാനാണ് സാധ്യത.