Click it and Unblock the Notifications
നയനാഭിരാമമായ ഒരു പര്‍വ്വത പ്രദേശമാണ് ചൌകൊരി. ഉത്തരഖണ്ഡിലെ പിത്തോരഘര്‍ ജില്ലയില്‍ സമുദ്രനിരപ്പില്‍ നിന്ന് 2010 മീറ്റര്‍ ഉയരത്തിലാണിത് സ്ഥിതിചെയ്യുന്നത്. ഹിമാലയത്തിന്‍റെ പശ്ചിമദിക്കിലെ പര്‍വ്വതനിരകള്‍ക്കിടയില്‍ വടക്കുഭാഗത്ത് തിബറ്റും തെക്ക് ടെറായി പ്രദേശവും ഇതിന് അതിര്‍ വരന്പിടുന്നു. പൈന്‍, ഓക്ക് മരങ്ങളും ചോലവനങ്ങളും ഹരിതാഭമാക്കുന്ന ഈ ചെറുഗ്രാമത്തില്‍ വിസ്തൃതമായ ചോളവയലുകളും പഴത്തോട്ടങ്ങളുമുണ്ട്.
ഒരുപാട് പഴയ ക്ഷേത്രങ്ങളുണ്ട് ചൌകൊരിയില്‍. ബെറിനാഗ് ഗ്രാമത്തിലെ നാഗമന്ദിര ക്ഷേത്രം ഇവയില്‍ പ്രധാനമാണ്. നാഗവേണി വംശത്തിലെ ബെനിമാധവാണ് ഇത് പണിതതെന്ന് കരുതുന്നു. സമുദ്രനിരപ്പില്‍ നിന്ന് 1350 മീറ്റര്‍ ഉയരത്തിലുള്ള ഒരു ഗുഹാക്ഷേത്രവും സന്ദര്‍ശകര്‍ക്ക് കാണാം. പാടല്‍ ഭുവനേശ്വര്‍ എന്ന ഈ ഗുഹാക്ഷേത്രത്തിലേക്ക് തുരങ്കസമാനമായ ഒരു ഗുഹയിലൂടെയാണ് ചെന്നെത്തുക. ഇന്ത്യയില്‍ പലയിടത്തായി ചിതറിക്കിടക്കുന്ന ശക്തിദേവിയുടെ 51 ശക്തിപീതങ്ങളിലൊന്നാണ് ഇവിടെയുള്ള മഹാകാളി ക്ഷേത്രം. ഉല്‍കദേവി ക്ഷേത്രം പിതോരഘര്‍ ചന്ദക് മോട്ടോര്‍ റോഡിലെ റെസ്റ്റ് ഹൌസിനടുത്താണ്. ഒരു കുന്നിന്‍റെ മുകളില്‍ കൊത്തുപണികളാല്‍ തീര്‍ത്ത ഒരുപാട് ദേവഗണങ്ങളുള്ള ഗുഹാക്ഷേത്രമാണ് ഗുണശേരദേവി ക്ഷേത്രം. കൂടാതെ കാമാക്ഷക്ഷേത്രം, കേദാര്‍ ക്ഷേത്രം എന്നിവയും ചൌകൊരിയിലെ പുണ്യദേവാലയങ്ങളാണ്.
വിമാന മാര്‍ഗ്ഗവും റോഡ്, റെയിലുകള്‍ വഴിയും ഇവിടെ അനായാസം എത്തിച്ചേരാം. പാന്ത്നഗര്‍ വിമാനത്താവളമാണ് സമീപസ്ഥമായ എയര്‍പോര്‍ട്ട്. വിദേശത്ത് നിന്നുള്ള സന്ദര്‍ശകര്‍ക്ക് ന്യൂ ഡല്‍ഹിയിലെ ഇന്ദിരാഗാന്ധി അന്താരാഷ്ട്ര വിമാനത്താവളമാണ് ആശ്രയം. കത്ഗൊഡം റെയില്‍വേ സ്റ്റേഷനാണ് അടുത്തുള്ള റെയില്‍വേ താവളം. ഇവിടെനിന്ന് ടാക്സികള്‍ വഴി ചൌകൊരിയിലെത്താം. പ്രമുഖ നഗരങ്ങളുമായി ചൌകൊരിയെ ബന്ധിപ്പിച്ച് അനേകം ബസ്സുകളുണ്ട്. ഈ മനോഹരതീരത്തേക്ക് യാത്രചെയ്യാന്‍ ഉദ്ദേശിക്കുന്നവര്‍ വേനല്‍കാലമോ ശൈത്യകാലത്തിന്‍റെ ആരംഭത്തിലോ സന്ദര്‍ശിക്കുന്നതാണ് ഏറ്റവും ഉത്തമം.
