Click it and Unblock the Notifications
കേരളത്തിന്റെ വടക്കന് ജില്ലകളിലൊന്നായ കണ്ണൂര് വ്യത്യസ്തങ്ങളായ സംസ്കാരത്തനിമകള് കൊണ്ടും വര്ണാഭമായ കാഴ്ചകള് കൊണ്ടും സഞ്ചാരികളെ ആകര്ഷിക്കുന്ന ഒന്നാണ്. കണ്ണൂര് അതിന്റെ ഇംഗ്ലീഷ് പേരായ കാനന്നൂര് എന്ന പേരിലും അറിയപ്പെട്ടിരുന്നു. പശ്ചിമഘട്ടവും അറബിക്കടലുമായി ഇരവശത്തും അതിര്ത്തികള് പങ്കിടുന്ന കണ്ണൂര് പ്രകൃതി ദൃശ്യങ്ങള്ക്കും നാടന്കലകള്ക്കും പ്രശസ്തമാണ്. പണ്ടുകാലം മുതല്ത്തന്നെ ഉത്തരമലബാറിന്റെ സാംസ്കാരിക, കച്ചവട കേന്ദ്രമായിരുന്നു കണ്ണൂര്.
നിരവധി ഭരണാധികാരികളുടെ അധിനിവേശങ്ങള് പറയാനുണ്ട് കണ്ണൂരിന്, സോളമന് രാജാവ് കണ്ണൂരിലെത്തിയിട്ടുണ്ടെന്ന കഥയാണ് ഇവയില് പ്രസിദ്ധം. കാലാകാലങ്ങളില് ഡച്ചുകാരും പോര്ട്ടുഗീസുകാരും മൈസൂര് സുല്ത്താനും ബ്രിട്ടീഷുകാരും കണ്ണൂരിലെത്തി.
നാടന്കലകളുടെയും കാഴ്ചകളുടെയും നാട്
തെയ്യാട്ടം അഥവാ തെയ്യമാണ് കണ്ണൂരിനെ ലോക വിനോദസഞ്ചാരഭൂപടത്തില് വേറിട്ടുനിര്ത്തുന്ന ചമയക്കാഴ്ച. നിരവധി ക്ഷേത്രങ്ങളുണ്ട് കണ്ണൂരില്. തളാപ്പ് സുന്ദരേശ്വര ക്ഷേത്രം, കൊട്ടിയൂര് ശിവക്ഷേത്രം, ഊര്പഴശിക്കാവ്, മാടായിക്കാവ്, കിഴക്കേക്കര ശ്രീകൃഷ്ണ ക്ഷേത്രം, ശ്രി രാഘവപുരം ക്ഷേത്രം, തളിപ്പറമ്പ് രാജരാജേശ്വരി ക്ഷേത്രം, ശ്രീ സുബ്രഹ്മണ്യ സ്വാമി ക്ഷേത്രം തുടങ്ങിയവയാണ് ഇവയില് പ്രധാനം.
നീണ്ടുപരന്നു കിടക്കുന്ന വിശാലമായ മണല്പ്പരപ്പാണ് കണ്ണൂരിലെ മറ്റൊരു പ്രധാന ആകര്ഷണം. പയ്യാമ്പലം ബീച്ച്, മീന്കുന്ന് ബീച്ച്, മുഴപ്പിലങ്ങാട് ബീച്ച് തുടങ്ങിയവയാണ് കണ്ണൂരിലെ ഏറ്റവും പ്രശസ്തമായ കടല്ത്തീരങ്ങള്. വിവിധതരം കൊട്ടാരക്കെട്ടുകള്ക്കും രുചികള്ക്കും കൂടി പേരുകേട്ട നാടാണ് കണ്ണൂര്. ഗുണ്ടര്ട്ട് ബംഗ്ലാവ്, സെന്റ് ആഞ്ജലോസ് കോട്ട, ഹോളി ട്രിനിറ്റി കത്തീഡ്രല് തുടങ്ങിയവയാണ് ഇവയില് കോളനിവാഴ്ചയുടെ സ്മരണകളുണര്ത്തുന്ന ചില പേരുകള്.
ഭക്ഷണപ്രേമികള്ക്ക് പറ്റിയ ഇടമാണ് കണ്ണൂര്, തിന്നുനടക്കാനായി നിരവധി വിഭവങ്ങളുണ്ടിവിടെ. തലശ്ശേരി ബിരിയാണിയെക്കുറിച്ച് കേള്ക്കാത്ത ഭക്ഷണപ്രേമികളുണ്ടാകില്ല. അരിയുണ്ട, നെയ്പ്പത്തിരി, ഉന്നക്കായ, പഴം നിറച്ചത്, ഇലയട, കലത്തപ്പം, കിണ്ണത്തപ്പം എന്നിങ്ങനെ പോകുന്നു മറ്റ് കണ്ണൂര് രുചികള്.
തീരപ്രദേശ കാലാവസ്ഥയായതുകൊണ്ടുതന്നെ വര്ഷത്തിലേതു കാലത്തും സന്ദര്ശിക്കാവുന്ന ഒരിടമാണ് കണ്ണൂര്. റോഡ്, റെയില് മാര്ഗങ്ങളില് കണ്ണൂരിലെത്തിച്ചേരാന് പ്രയാസമില്ല. അതിമനോഹരമായ പ്രകൃതിദൃശ്യങ്ങളും സാംസ്കാരകത്തനിമയും കണ്ടറിയണമെന്നാഗ്രഹമുണ്ടോ, വരൂ കണ്ണൂരിലേക്ക്.
