സൂറത്ത്-ഉദയ്പൂർ വന്ദേ ഭാരത് ട്രാക്കിലേക്ക്; നവരാത്രി സമ്മാനമായി പുതിയ ട്രെയിൻ, അറിയേണ്ടതെല്ലാം

സൂറത്തിനെയും ഉദയ്പൂരിനെയും ബന്ധിപ്പിച്ച് പുതിയ വന്ദേ ഭാരത് എക്സ്പ്രസ് വരുന്നു. സെപ്റ്റംബർ 1-നാണ് റെയിൽവേ ബോർഡ് ഈ സർവീസിന് അനുമതി നൽകിയത്. ചൊവ്വാഴ്ച ഒഴികെ ആഴ്ചയിൽ ആറ് ദിവസമായിരിക്കും 8 കോച്ചുകളുള്ള ഈ ട്രെയിൻ ഓടുക. കൃത്യമായ തീയതി റെയിൽവേ ഔദ്യോഗികമായി പുറത്തുവിട്ടിട്ടില്ലെങ്കിലും, 2026 ഒക്ടോബർ 11 ഞായറാഴ്ചയിലെ നവരാത്രി ആഘോഷങ്ങൾക്ക് മുന്നോടിയായി സർവീസ് ആരംഭിക്കുമെന്നാണ് സൂചന. 7 മണിക്കൂറും 30 മിനിറ്റും കൊണ്ട് ലക്ഷ്യസ്ഥാനത്തെത്തുന്ന ഈ ട്രെയിൻ, സൂറത്തിൽ നിന്ന് ആരംഭിക്കുന്ന ആദ്യ പ്രീമിയം ട്രെയിൻ കൂടിയാണ്.

സഞ്ചാരികൾക്കും വ്യാപാരികൾക്കും ഒരുപോലെ ഉപകാരപ്രദമാകുന്ന സമയക്രമമാണ് പുതിയ വന്ദേ ഭാരതിനായി തയാറാക്കിയിരിക്കുന്നത്. ട്രെയിൻ നമ്പർ 26903 സൂറത്തിൽ നിന്ന് രാവിലെ 6:10-ന് പുറപ്പെട്ട് ഉച്ചയ്ക്ക് 1:40-ന് ഉദയ്പൂരിലെത്തും. മടക്ക സർവീസായ ട്രെയിൻ നമ്പർ 26904 ഉദയ്പൂരിൽ നിന്ന് വൈകുന്നേരം 3:35-ന് പുറപ്പെട്ട് രാത്രി 11:00-ന് സൂറത്തിൽ തിരിച്ചെത്തും. ചൊവ്വാഴ്ചകളിൽ അറ്റകുറ്റപ്പണികൾക്കായി സർവീസ് ഉണ്ടാകില്ല.

സൂറത്ത്-ഉദയ്പൂർ വന്ദേ ഭാരത്: റൂട്ട്, സമയക്രമം, സ്റ്റോപ്പുകൾ

കൂടുതൽ യാത്രക്കാർക്ക് പ്രയോജനം ലഭിക്കുന്നതിനായി ഒമ്പത് പ്രധാനം സ്റ്റോപ്പുകളാണ് റെയിൽവേ ബോർഡ് അനുവദിച്ച് നൽകിയിട്ടുള്ളത്. ഭറൂച്ച്, വഡോദര, ആനന്ദ്, മണിനഗർ, അസർവ, ഹിമ്മത്നഗർ, ശാംലാജി റോഡ്, ദുൻഗർപൂർ, സാവർ എന്നിവയാണ് ആ സ്റ്റോപ്പുകൾ. സൂറത്തിലാണ് ട്രെയിനിന്റെ പ്രധാന അറ്റകുറ്റപ്പണികൾ നടക്കുക. വഡോദരയിലും അസർവയിലും വെള്ളം നിറയ്ക്കാനുള്ള സൗകര്യമുണ്ടാകും. സബർബൻ അസർവ ടെർമിനൽ വഴി അഹമ്മദാബാദിലേക്കുള്ള കണക്റ്റിവിറ്റിയും ഈ സർവീസ് മെച്ചപ്പെടുത്തും.

നിലവിൽ 8 കോച്ചുകളോടെയാണ് സർവീസ് ആരംഭിക്കുന്നതെങ്കിലും, യാത്രക്കാരുടെ തിരക്ക് വർധിക്കുന്നതിനനുസരിച്ച് കോച്ചുകളുടെ എണ്ണം കൂട്ടാനാണ് തീരുമാനം. സൂറത്തിൽ തന്നെ പ്രൈമറി മെയിന്റനൻസ് സൗകര്യമുള്ളതിനാൽ രാവിലെ 6:10-നുള്ള യാത്ര കൃത്യസമയത്ത് തന്നെ ആരംഭിക്കാൻ സാധിക്കും. ഉച്ചയ്ക്ക് ശേഷം ഉദയ്പൂരിൽ എത്തുന്ന വിധത്തിലുള്ള സമയക്രമം, വിനോദസഞ്ചാരികൾക്ക് ഹോട്ടൽ ചെക്ക്-ഇൻ ചെയ്യാനും കാഴ്ചകൾ കാണാനും ഏറെ സൗകര്യപ്രദമാണ്. ചൊവ്വാഴ്ചകളിലെ അവധി വരാനിരിക്കുന്ന ഉത്സവ സീസണിലും വാരാന്ത്യങ്ങളിലും മികച്ച സർവീസ് ഉറപ്പാക്കാൻ സഹായിക്കും. നവരാത്രിക്ക് മുന്നോടിയായുള്ള തുടക്കം സൂറത്ത്, ഉദയ്പൂർ കേന്ദ്രീകരിച്ച് നടക്കുന്ന വിവാഹ ആവശ്യങ്ങൾക്കുള്ള യാത്രക്കാർക്കും വലിയ അനുഗ്രഹമാകും.

സൂറത്ത്-ഉദയ്പൂർ വന്ദേ ഭാരത്: ബുക്കിംഗും ടിക്കറ്റ് നിരക്കും

പുതിയ സർവീസ് ആരംഭിക്കുന്നതോടെ ഉദയ്പൂർ-അസർവ വന്ദേ ഭാരത് (26963/26964) സർവീസ് നിർത്തിവെക്കും. പാസഞ്ചർ റിസർവേഷൻ സിസ്റ്റത്തിലും (PRS) ഐആർസിടിസി (IRCTC) വെബ്സൈറ്റിലും സമയവിവരങ്ങൾ അപ്‌ലോഡ് ചെയ്ത ശേഷമായിരിക്കും ടിക്കറ്റ് ബുക്കിംഗ് ആരംഭിക്കുക. വെസ്റ്റേൺ റെയിൽവേയുടെ ഔദ്യോഗിക അറിയിപ്പുകൾക്കായി ട്രാവൽ ആപ്പുകളിൽ അലേർട്ടുകൾ സെറ്റ് ചെയ്ത് വെക്കാം. തിരക്കേറിയ തീയതികളിൽ സൂറത്തിൽ നിന്ന് ടിക്കറ്റ് ലഭിച്ചില്ലെങ്കിൽ ആനന്ദ് അല്ലെങ്കിൽ വഡോദര സ്റ്റേഷനുകളിൽ നിന്നുള്ള ടിക്കറ്റ് ലഭ്യത പരിശോധിക്കുന്നത് നന്നായിരിക്കും.

റോഡ് മാർഗ്ഗമുള്ള 8 മുതൽ 9 മണിക്കൂർ വരെയുള്ള ദീർഘയാത്രയ്ക്ക് പുതിയ വന്ദേ ഭാരത് മികച്ചൊരു ബദലാകും. ഇത് വ്യാപാര-വിനോദസഞ്ചാര മേഖലകൾക്ക് വലിയ ഉണർവ് നൽകും. സൂറത്തിലെ വസ്ത്ര, ഡയമണ്ട് വ്യാപാരികൾക്കും ഉദയ്പൂരിലെ പൈതൃക വിനോദസഞ്ചാര കേന്ദ്രങ്ങളിലേക്കും വിവാഹ ആവശ്യങ്ങൾക്കുമായി യാത്ര ചെയ്യുന്നവർക്കും ഇനി വാരാന്ത്യങ്ങളിൽ വേഗത്തിൽ സഞ്ചരിക്കാം. ഇതോടെ ഗുജറാത്തിലെ മൊത്തം വന്ദേ ഭാരത് സർവീസുകളുടെ എണ്ണം ആറായി ഉയർന്നു. ടിക്കറ്റ് നിരക്കുകൾ, ഉദ്ഘാടന തീയതി എന്നിവ സംബന്ധിച്ച ഔദ്യോഗിക വിവരങ്ങൾ വരും ദിവസങ്ങളിൽ റെയിൽവേ പുറത്തുവിടും.