അടുത്ത യാത്ര തായ്‌വാനിലേക്ക് തന്നെ, പണം ഇങ്ങോട്ട് കിട്ടും, ഒരുങ്ങുന്നത് 1,436 കോടിയുടെ പദ്ധതി

അവധിയൊക്കെ വരികയല്ലേ.. എവിടേക്ക് യാത്ര പോകണം എന്നാണ് ആലോചനയിലാണോ? അതോ എങ്ങനെ കുറഞ്ഞ ചിലവിൽ യാത്ര പോകണം എന്നാണോ? ഏതായാലും ഈ വർഷത്തെ യാത്രകളിൽ താരമാകുവാൻ പോകുന്ന ഒരു രാജ്യം തായ്വാൻ ആണ്. രാജ്യത്ത് വിനോദസഞ്ചാരം പ്രോത്സാഹിപ്പിക്കുക എന്ന ലക്ഷ്യത്തിൽ കൂടുതൽ വിദേശ സഞ്ചാരികളെ ആകർഷിക്കുവാനായി കിടിലൻ പാക്കേജുകളും പരിപാടികളും അണിയറയില്‍ ഒരുങ്ങുകയാണ്.

2022-ൽ കൊവിഡ് ‌നിയന്ത്രണങ്ങളെല്ലാം നീക്കിയതിനു ശേഷം ‌‌, തായ്‌വാൻ രാജ്യത്തിന്റെ സമ്പദ്‌വ്യവസ്ഥയെ പഴയരീതിയിലേക്ക് കൊണ്ടുവരുവാനും ഉത്തേജിപ്പിക്കുവാനുമുള്ള ‌ വഴികൾ തേടുകയാണ്.

കഴിഞ്ഞ ദിവസം അന്താരാഷ്ട്ര വിനോദസഞ്ചാരികൾ തായ്‌വാനിലേക്ക് വരുന്നതിനുള്ള ശ്രമങ്ങൾ ത്വരിതപ്പെടുത്താനും വിപുലീകരിക്കാനും തങ്ങള്‍ ശ്രമിക്കുന്നതായി ഗതാഗത, ആശയവിനിമയ മന്ത്രാലയത്തിന്റെ വകുപ്പ് ഡയറക്ടർ ലിൻ ഫു-ഷാൻ ഒരു പത്രസമ്മേളനത്തിൽ പറഞ്ഞിരുന്നു. കുറഞ്ഞത് എട്ട് വിനോദസഞ്ചാരികളുള്ള ഗ്രൂപ്പുകൾക്ക് ഓരോന്നിനും ട്രാവൽ ഏജൻസികൾക്ക് TWD 10,000 (ഇന്ത്യൻ രൂപ 27,096), കുറഞ്ഞത് 15 വിനോദസഞ്ചാരികളുള്ള ഗ്രൂപ്പുകൾക്ക് TWD 20,000 (ഇന്ത്യൻ രൂപ 54,192, ഏകദേശം) എന്നിവ വാഗ്ദാനം ചെയ്യാനുള്ള നിർദ്ദേശവും ചെലവ് പ്ലാനിൽ ഉൾപ്പെടുന്നു.

സഞ്ചാരികൾക്ക് ഇങ്ങോട്ടേയ്ക്ക് പണം പണം

പുതിയ റിപ്പോർട്ടുകൾ അനുസരിച്ച് തായ്വാൻ സന്ദർശിക്കുന്ന 500,000 വിദേശ സഞ്ചാരികൾക്ക് രാജ്യംപണമോ ഡിസ്‌കൗണ്ട് ഇൻസെന്റീവോ വാഗ്ദാനം ചെയ്യും. നേരത്തെ സൂചിപ്പിച്ച 5.3 ബില്യൺ TWD പാക്കേജിന്റെ ഭാഗമായി സഞ്ചാരികൾക്ക് TWD 5,000 അഥവാ 13,656 ഇന്ത്യൻ രൂപയാണ് പരമാവധി വാഗ്ദാനം ചെയ്തിരിക്കുന്നത്. എന്നാൽ ഇതിനെക്കുറിച്ചുള്ള കൂടുതൽ വിവരങ്ങൾ ഇനിയും ലഭ്യമായിട്ടില്ല.എന്തെങ്കിലും യോഗ്യതാ ആവശ്യകതകളുണ്ടോ അല്ലെങ്കിൽ ആളുകളെ എങ്ങനെ തിരഞ്ഞെടുക്കും എന്നതുൾപ്പെടെയുള്ള ചില വിശദാംശങ്ങൾ ആണ് ലഭിക്കുവാനുള്ളത്. എന്നിരുന്നാലും
പണം ഇലക്ട്രോണിക് ആയോ അല്ലെങ്കിൽ താമസത്തിനുള്ള കിഴിവായോ നൽകിയേക്കാമെന്നാണ് ഇതുമായി ബന്ധപ്പെട്ട് ഉദ്യോഗസ്ഥർ അറിയിച്ചിട്ടുള്ളത്.

കൊവിഡിന് മുൻപ്, തായ്‌വാനിലെ ടൂറിസം ബ്യൂറോയുടെ കണക്കനുസരിച്ച്, രാജ്യത്തിന്റെ മൊത്ത ആഭ്യന്തര ഉൽപാദനത്തിന്റെ ഏകദേശം 4% ടൂറിസത്തിൽ നിന്നായിരുന്നു ലഭിച്ചിരുന്നത്. പിന്നീട് കൊവിഡ് നിയന്ത്രണങ്ങൾ കർശനമാക്കിയതോടെ സഞ്ചാരികൾ എത്തുന്നത് നിലച്ചു.
2019-ൽ വ്യക്തിഗത വിനോദസഞ്ചാരികളെ തായ്‌വാൻ സന്ദർശിക്കുന്നതിൽ നിന്ന് ചൈന വിലക്കിയതോടെ രാജ്യത്തെ മോശമായി ബാധിക്കുകയും ചെയ്തിരുന്നു,. പിന്നീട് ജനുവരിയിൽ, ചൈന തങ്ങളുടെ പൗരന്മാരെ വിദേശത്തേക്ക് യാത്ര ചെയ്യാൻ അനുവദിച്ചപ്പോൾ, ചൈനീസ് ട്രാവൽ ഗ്രൂപ്പുകൾക്ക് അനുവദനീയമായ 20 ലക്ഷ്യസ്ഥാനങ്ങളുടെ പട്ടികയിൽ നിന്ന് തായ്‌വാൻ ഒഴിവാക്കപ്പെട്ടിരുന്നു.

ആറ് ദശലക്ഷം സഞ്ചാരികളെ

വിനോദസഞ്ചാര മേഖലയിലേക്ക് സഞ്ചാരികളെ പൂർണ്ണമായും സ്വീകരിക്കുവാനുള്ള തയ്യാറെടുപ്പിലാണ് രാജ്യം,
ഈ മാസം ഹോങ്കോങ്ങിൽ നിന്നും മക്കാവുവിൽ നിന്നുമുള്ള വ്യക്തിഗത യാത്രക്കാർക്ക് അതിർത്തികൾ വീണ്ടും തുറക്കുന്നതുൾപ്പെടെ സന്ദർശകരെ സ്വാഗതം ചെയ്യുന്നതിനായി തായ്‌വാൻ ചില നടപടികൾ സ്വീകരിച്ചിട്ടുണ്ട്. ഈ വർഷം ആറ് ദശലക്ഷം വിനോദസഞ്ചാരികളെ ആകർഷിക്കാൻ സർക്കാർ ആഗ്രഹിക്കുന്നുവെന്ന് ഗതാഗത മന്ത്രി വാങ് ക്വോ-സായ് നേരത്തെ പറഞ്ഞിരുന്നു.കഴിഞ്ഞ ഒക്ടോബറിൽ വീണ്ടും തുറന്നതിന് ശേഷം, 2022 ൽ തായ്‌വാൻ ഏകദേശം 900,000 വിനോദസഞ്ചാരികളെ ആകർഷിച്ചതായാണ് കണക്കുകൾ.

കിടിലൻ ഓഫറുകളുമായി വേറെയും രാജ്യങ്ങള്‍

ടൂറിസത്തിൽ നിന്നു വരുമാനം കണ്ടെത്തുന്ന മിക്ക രാജ്യങ്ങളും സഞ്ചാരികളെ ആകർഷിക്കുന്നതിനായി കിടിലൻ പാക്കേജുകൾ പ്രഖ്യാപിച്ചിട്ടുണ്ട്. മറ്റ് ആനുകൂല്യങ്ങൾക്കൊപ്പം 5,00,000 വിമാന ടിക്കറ്റുകൾ നൽകാനാണ് 'ഹലോ ഹോങ്കോംഗ്' കാമ്പെയ്‌ൻ ലക്ഷ്യമിടുന്നത്, ജപ്പാൻ ദീർഘകാല അന്തർദ്ദേശീയ താമസക്കാരെ ആകർഷിക്കാൻ തൊഴിൽ വിസ വാഗ്ദാനം ചെയ്യുന്നു. വിയറ്റ്‌നാമിലെ ചെലവ് കുറഞ്ഞ വിമാനക്കമ്പനിയായ വിയറ്റ്‌ജെറ്റ്, സഞ്ചാരികളെ പ്രത്യേകിച്ച് ഇന്ത്യയിൽ നിന്നുള്ള യാത്രക്കാരെ, രാജ്യത്തേക്ക് വരാനും സന്ദർശിക്കാനും ആകർഷിക്കുന്നതിനായി ഓഫറുകൾ ആരംഭിക്കുന്നു.