തെന്നിന്ത്യന്‍ സംസ്ഥാനമായ തമിഴ്‌നാട്ടിലെ ഏറ്റവും പ്രശസ്തമായ നഗരങ്ങളിലൊന്നാണ് ശ്രീരംഗം. തിരുച്ചിറപ്പള്ളിയോട് ചേര്‍ന്നാണ്‌  ശ്രീരംഗം സ്ഥിതിചെയ്യുന്നത്. പുരാണകാലത്ത് വെള്ളിത്തിരുമുത്തു ഗ്രാമം എന്നായിരുന്നു ശ്രീരംഗത്തിന്റെ പേര്. തമിഴില്‍ തിരുവാരംഗം എന്നും ഇവിടെ അറിയപ്പെടുന്നു. കാവേരി നദിയുടെയും പോഷകനദിയായ കൊല്ലിടത്തിനും ഇടയിലായാണ് ശ്രീരംഗം. ഹൈന്ദവ തീര്‍ത്ഥാടകരുടെ പുണ്യസ്ഥലമാണ്‌ ശ്രീരംഗം. പ്രമുഖമായ ശിവ, വിഷ്ണു ക്ഷേത്രങ്ങളാണ് ശ്രീരംഗത്തിന്റെ പ്രശസ്തിക്ക് കാരണം. ഇന്ത്യയില്‍ ഏറ്റവും കൂടുതല്‍ വൈഷണവര്‍ താമസിക്കുന്ന സ്ഥലങ്ങളില്‍ ഒന്നു കൂടിയാണ് ശ്രീരംഗം.

രംഗനാഥസ്വാമി ക്ഷേത്രമാണ് ശ്രീരംഗത്തെ ഏറ്റവും  പ്രശസ്തമായ കാഴ്ചയും ആകര്‍ഷണവും. എണ്ണമറ്റ ഹിന്ദു തീര്‍ത്ഥാടകരാണ് വര്‍ഷം തോറും ഈ ക്ഷേത്രത്തില്‍ എത്തുന്നത്. ലോകത്തിലെ ഏറ്റവും വലിയ വൈഷ്ണവ ക്ഷേത്രങ്ങളില്‍ ഒന്നാണ് രംഗനാഥ സ്വാമി ക്ഷേത്രം എന്നാണ് കരുതുന്നത്. 631000 ചരുരശ്ര മീറ്ററാണ് ക്ഷേത്രത്തിന്റെ വ്യാപ്തി.

ദൈവങ്ങളുടെ വാസകേന്ദ്രം

വിഷ്ണുദേവന്റെ എട്ട് കേന്ദ്രങ്ങളില്‍ ഒന്നാണ് ശ്രീരംഗം എന്ന് കരുതപ്പെടുന്നു. മാത്രമല്ല വിഷ്ണുവിന്റെ 108 ക്ഷേത്രങ്ങളിലും വച്ച്  ഏറ്റവും പ്രശസ്തമായ ക്ഷേത്രമാണ്‌ ഇതെന്നാണ്‌ പറയപ്പെടുന്നത്. 156 ഏക്കര്‍ സ്ഥലത്ത് വ്യാപിച്ചുകിടക്കുന്നു ഈ കൂറ്റന്‍ ക്ഷേത്രം. കാവേരി, കൊലേറൂണ്‍ നദികള്‍ രൂപീകരിച്ച ദ്വീപിലാണ് ഈ ക്ഷേത്രം. നിര്‍മാണ കലയുടെയും കൊത്തുപണികളുടെയും അവസാനിക്കാത്ത കലവറയാണ് ഈ ക്ഷേത്രം.

ക്ഷേത്രനഗരം

വിഷ്ണുക്ഷേത്രം കൂടാതെ പേരുകേട്ട മൂന്ന് ക്ഷേത്രങ്ങള്‍  വേറെയുമുണ്ട് ശ്രീരംഗത്ത്. കാവേരി നദിയുടെ തീരത്തായാണ് ഈ  ക്ഷേത്രങ്ങളെല്ലാം സ്ഥിതി ചെയ്യുന്നത്. ആദിരംഗ ക്ഷേത്രം (ശ്രീരംഗപട്ടണം) മധ്യരംഗക്ഷേത്രം (ശിവനസമുദ്ര) അന്ത്യരംഗ ക്ഷേത്രം (ശ്രീരംഗം) എന്നിവയാണ് പേരുകേട്ട ഈ രംഗനാഥ ക്ഷേത്രങ്ങള്‍. റോക്ക്‌ഫോര്‍ട്ട് ക്ഷേത്രം, തിരുവായ്‌ക്കോവില്‍, ഉരയൂര്‍വെക്കിലി അമ്മന്‍ ക്ഷേത്രം, ചമയപുരം മാരിയമ്മന്‍ ക്ഷേത്രം, കുമാര വയലൂര്‍ ക്ഷേത്രം, കാട്ടഴകിയ സിങ്കര്‍ ക്ഷേത്രം എന്നിവയാണ് ശ്രീരംഗത്തെ ചില പ്രശസ്ത ക്ഷേത്രങ്ങള്‍. വടവഴകിയ നമ്പി പെരുമാള്‍ ക്ഷേത്രമാണ്‌ ഇവിടത്തെ പ്രശസ്തമായ വിഷ്ണു ക്ഷേത്രങ്ങളില്‍ ഒന്ന്. അപ്പുക്കുടത്തന്‍ ക്ഷേത്രം എന്നും ഈ ക്ഷേത്രം അറിയപ്പെടുന്നു. രംഗനാഥ സ്വാമി ക്ഷേത്രത്തിന്റെ ഉപക്ഷേത്രമാണ് തിരുച്ചിറപ്പള്ളിയിലെ അഴകിയ നമ്പി ക്ഷേത്രം. ഇത്രയും ക്ഷേത്രങ്ങള്‍ നിറഞ്ഞ ശ്രീരംഗം ക്ഷേത്രനഗരം എന്ന് വിളിക്കപ്പെടുന്നതില്‍ അതിശയം തീരെയില്ല. ശ്രീ രംഗനാഥ സ്വാമി ക്ഷേത്രം, ചമയപുരം മാരിയമ്മന്‍ ക്ഷേത്രം, ജംബുലിംഗേശ്വര ക്ഷേത്രം, അഖിലാണ്ഡേശ്വരി ക്ഷേത്രം എന്നിവയും ശ്രീരംഗത്ത് കാണേണ്ടതു തന്നെ.

യാത്രയും കാലാവസ്ഥയും

ചൂടേറിയ വേനല്‍ക്കാലമാണ് ഇവിടത്തേത്. ശരാശരി മഴ ലഭിക്കുന്ന മഴക്കാലവും തണുത്ത ശൈത്യകാലവുമാണ് ശ്രീരംഗത്ത് അനുഭവപ്പെടുക. മധുരയാണ് സമീപത്തുള്ള വിമാനത്താവളം. ട്രെയിനില്‍  വരുന്നവര്‍ക്ക് ശ്രീരംഗം റെയില്‍ വേ സ്റ്റേഷനില്‍ ഇറങ്ങാം.