Click it and Unblock the Notifications
തമിഴ്‌നാട്ടിലെ തിരുവാരൂര്‍ ജില്ലയുടെ ആസ്ഥാനം കൂടിയാണ് പ്രശസ്തമായ വിനോദസഞ്ചാര കേന്ദ്രമായ തിരുവാരൂര്‍. നേരത്തെ നാഗപട്ടണം ജില്ലയുടെ ഭാഗമായിരുന്നു തിരുവാരൂര്‍. ചോള രാജാക്കന്മാരുടെ ഭരണകേന്ദ്രമായിരുന്നു ബംഗാള്‍ ഉള്‍ക്കടലിനോട് ചേര്‍ന്നുകിടക്കുന്ന തിരുവാരൂര്‍.
പ്രശസ്തനായ കുലോത്തുംഗ ചോളന്‍ ഭരിച്ചിരുന്ന പ്രദേശമാണ് ഇത്. മാത്രമല്ല, കര്‍ണാടക സംഗീതത്തിലെ ത്രിമൂര്‍ത്തികളായിരുന്നു ത്യാഗരാജസ്വാമികള്‍, ശ്യാമശാസ്ത്രി, മുത്തിസ്വാമി ദീക്ഷിതര്‍ എന്നിവരുടെ ജന്മസ്ഥലം എന്ന പേരിലും തിരുവാരൂര്‍ പ്രശസ്തമാണ്.
തിരുവാരൂരിലെ ആകര്‍ഷണകേന്ദ്രങ്ങള്‍
ത്യാഗരാജ സ്വാമി ക്ഷേത്രം, കൂത്തന്നൂര്‍ സരസ്വതി ക്ഷേത്രം, തിരുക്കണ്ണപുരത്തെ നീലമേഘപെരുമാള്‍ ക്ഷേത്രം, കോദണ്ഡസ്വാമി ക്ഷേത്രം, രാജഗോപാല സ്വാമി ക്ഷേത്രം തുടങ്ങിയവയാണ് ഇവിടത്തെ പ്രധാന ക്ഷേത്രങ്ങള്‍. ഒപ്പം തന്നെ സിറ്റി ഗാര്‍ഡനും മുത്തുപെട്ടിയും നിരവധി സഞ്ചാരികളെ ആകര്‍ഷിക്കുന്നു.
എങ്ങിനെയെത്തും
റോഡ്, റെയില്‍ മാര്‍ഗങ്ങളില്‍ കൂടി തിരുവാരൂരില്‍ എത്താന്‍ പ്രയാസമില്ല. 110 കിലോമീറ്റര്‍ ദൂരത്തുള്ള തിരുച്ചിറപ്പള്ളിയാണ് സമീപത്തെ പ്രധാന ടൗണ്‍. ചെന്നൈയിലേക്ക് ഇവിടെ നിന്നും 290 കിലോമീറ്റര്‍ ദൂരമുണ്ട്. തിരുവാരൂരില്‍ തന്നെ റെയില്‍വേ സ്റ്റേഷന് ഉണ്ട്.
കാലാവസ്ഥ
പൊതുവേ ചൂടേറിയ കാലാവസ്ഥയാണ് തിരുവാരൂരില്‍. ജൂണ്‍ മുതല്‍ സെപ്റ്റംബര്‍ വരെയുള്ള മഴക്കാലത്താണ് ഇവിടെ സന്ദര്‍ശിക്കാന്‍ പറ്റിയ സമയം. ഡിസംബര്‍ മുതല്‍ ഫെബ്രുവരി വരെയുള്ള ശീതകാലത്തും ഇവിടെ സന്ദര്‍ശനത്തിന് വരാം. കടുത്ത ചൂടാണ് വേനല്‍ക്കാലത്ത്. താപനില 40 ഡിഗ്രി സെല്‍ഷ്യസ് വരെ ഉയരും.
