ബാംഗ്ലൂരിലെ ചെലവ് കുറഞ്ഞ ഷോപ്പിങ്! വെറുതേ വന്നാൽ പോലും ഷോപ്പിങ് നടത്തിയേ മടങ്ങൂ

ബാംഗ്ലൂർ പഠിക്കാൻ പോയവരും ജോലി ചെയ്യുന്നവരും ഒക്കെ നാട്ടിലേക്ക് മടങ്ങി വരുമ്പോൾ ഇഷ്ടംപോലെ സാധനങ്ങളും കൊണ്ടുവരാറുണ്ട്. ഏറ്റവും പുതിയ ഫാഷനിലുള്ള ചെരുപ്പു മുതൽ ആഭരണങ്ങളും വസ്ത്രങ്ങളും മാത്രമല്ല, മധുരപലഹാരങ്ങളും കരകൗശല വസ്തുക്കളും വരെ കൈനിറയെ കൊണ്ടുവരും. ഇതൊക്കെ ബാംഗ്ലൂരിൽ നിന്നു കൊണ്ടുവരുമ്പോൾ നാട്ടുകാരും വീട്ടുകാരും ഒന്നത്ഭുതപ്പെടും! പൈസ കുറേ പൊടിച്ചല്ലോ എന്ന്..

എന്നാൽ നാട്ടിലേക്കുള്ള യാത്രകൾ ആഘോഷമാക്കാനും ചെലവ് കുറഞ്ഞ ജീവിതം ബാംഗ്ലൂരിൽ ജീവിക്കാനും ഓഫീസിലും കോളേജിലും ഏറ്റവും പുതിയ ഫാഷനിലുള്ള വസ്ത്രങ്ങൽ മാറി മാറി ഇടാനും ബാംഗ്ലൂരുകാരെ സഹായിക്കുന്നത് എന്താണെന്ന് അറിയാമോ? ബാംഗ്ലൂരിലെ ഷോപ്പിങ് സ്ട്രീറ്റുകൾ തന്നെയാണ് എന്നും ഇവിടുത്തെ താരം! ഇതാ ബാംഗ്ലൂരിലെ പ്രധാന ഷോപ്പിങ് സ്ട്രീറ്റുകള്‍ പരിചയപ്പെടാം.

ബാംഗ്ലൂരിലെ ഷോപ്പിങ് സ്ട്രീറ്റുകൾ

ബാംഗ്ലൂരിൽ ഒന്നു കറങ്ങാൻ വരുന്നവർ ഏറ്റവും കൂടുതൽ പോകാന്‍ ആഗ്രഹിക്കുന്നത് ഇവിടുത്തെ ഷോപ്പിങ് സ്ട്രീറ്റുകൾ കാണാനാണ്. വളരെ കുറഞ്ഞ തുകയിൽ കൈ നിറയെ സാധനങ്ങൾ അതും മികച്ച ക്വാളിറ്റിയിലുള്ളവ കിട്ടുമെന്നു പറഞ്ഞാൽ ആരാണ് ഒന്നു പോയി നോക്കാത്തത് അല്ലേ? അങ്ങനെ ഷോപ്പിങ് പ്രിയരുടെ സ്വർഗ്ഗമായ ബാംഗ്ലൂരിൽ നിങ്ങളുടെ ബജറ്റിനനുസരിച്ച് പോകാൻ പറ്റിയ, പോക്കറ്റ് കാലിയാക്കാത്ത ഷോപ്പിങ് ഇടങ്ങൾ പരിചയപ്പെടാം.

1. ജയനഗർ ഫോർത്ത് സ്ട്രീറ്റ്

ബാംഗ്ലൂരിലെ ഏറ്റവും ചെലവ് കുറഞ്ഞ ഷോപ്പിങ് സ്ട്രീറ്റാണ് ജയനഗർ ഫോർത്ത് സ്ട്രീറ്റ്. മികച്ച ഗുണനിലവാരമുള്ള, ഏറ്റവും പുതിയ മോഡൽ വസ്ത്രങ്ങൾ, ചെരിപ്പുകൾ , ആഭരണങ്ങൾ, വീടിനലങ്കരമായി സൂക്ഷിക്കാൻ പറ്റിയ സാധനങ്ങൾ എന്നിങ്ങനെ ഒരുപാട് കാര്യങ്ങൾ ഇവിടെ നിന്നും മേടിക്കാം. നാലഞ്ചു നിലകളിലായുള്ള ജയനഗർ ഷോപ്പിങ് കോംപ്ലക്സിലാണ് ഇവിടുത്തെ കടകൾ അധികവുമുള്ളത്.

ഇത് കൂടാതെ ഒരു പഴയ ഷോപ്പിങ് കോംപ്ലക്സും ഇവിടെ കാണാം. അതിനു ചുറ്റിലുമായും നിരവധി ചെറിയ ഷോപ്പുകളും വഴിയോര കച്ചവടങ്ങളും ഉണ്ട്. ഒരു ദിവസം ഉച്ചകഴിഞ്ഞ് ഇറങ്ങിയാൽ രാത്രി വരെ നടന്നു കാണാനും ഷോപ്പിങ് നടത്താനും വേണ്ടതെല്ലാം കാണാം. കൂടാതെ ബ്രാൻഡഡ് ഷോപ്പുകൾ, രുചികരമായ വിഭവങ്ങൾ വിളമ്പുന്ന തട്ടുകടകൾ എന്നിങ്ങനെ ഇവിടെ സമയം ചെലവഴിക്കാൻ വേറെയും വഴികളുണ്ട്.

2. ശിവാജി നഗർ

ബാംഗ്ലൂരിലെ പേരുകേട്ട ഷോപ്പിങ് സ്ഥലങ്ങളിലൊന്നാണ് ശിവാജി നഗര്‍. ചെറുതും വലുതുമായ ഒരുപാട് സ്ഥാപനങ്ങളും ചെറുകിട കച്ചവടക്കാരും ഭക്ഷണശാലകളും ഇവിടെ പ്രവർത്തിക്കുന്നു. ചുരിദാറുകൾ, ടോപ്പുകൾ, ജീന്‍സ്, ബനിയൻ, ലഹങ്ക സെറ്റ്, കുട്ടികൾക്കുള്ള വസ്ത്രങ്ങൾ. ഷർട്ടുകൾ, പാന്‍റ്സുകൾ, ബെഡ്ഷീറ്റ്, കർട്ടൺ തുടങ്ങി ഒരു വീട്ടിലേക്ക് ആവശ്യമായ തുണിത്തരങ്ങൾ എല്ലാം ഇവിടുന്ന് കിട്ടും. ബാംഗ്ലൂരിൽ ജീവിക്കുന്നവരും ഇവിടെ വരുന്നവരും
എല്ലാം ശിവാജി നഗറിൽ വരാറുണ്ട്.

3. ചിക്പേട്ട്

ബാംഗ്ലൂരില്‍ വന്ന് നിങ്ങൾക്ക് ഒട്ടും ചെലവില്ലാതെ ഇഷ്ചംപോലെ ഷോപ്പിങ് നടത്താൻ പറ്റിയ സ്ഥലമാണ് ചിക്പേട്ട്. ബാംഗ്ലൂരിലെ ഏറ്റവും പഴയ പ്രദേശങ്ങളിലൊന്നായ ഇവിടെ തുണികൾ ഉൾപ്പെടെ പല സാധനങ്ങളും മൊത്തവിലയിലും ചില്ലറ വിലയിലും ലഭിക്കും. ബാംഗ്ലൂരിലെത്തി വലിയ ഷോപ്പിങ് നടത്തുന്നവർക്കും കച്ചവടക്കാർക്കും ഒക്കെ പ്രയോജനകരമായ സ്ഥലമാണിത്. കുറഞ്ഞ നിരക്കിൽ തുണിത്തരങ്ങൾ മേടിക്കാനാണ് ആളുകളധികവും ഇവിടേക്ക് വരുന്നത്.

4. മല്ലേശ്വരം 8-ാം ക്രോസ്

മല്ലേശ്വരത്തേയ്ക്കുള്ള യാത്ര ഒരിക്കലും വെറുതേയാകില്ല. ഷോപ്പിങ് മുതൽ ക്ഷേത്രദർശനവും നടത്തവും ഭക്ഷണവും ഉൾപ്പെടെ നിരവധി കാര്യങ്ങൾ ഇവിടെ ചെയ്യാനുണ്ട്. കുർത്ത മുതൽ വ്യത്യസ്തമായ വാച്ച് കളക്ഷനുകൾ, ജ്വല്ലറികൾ, ഓഫീസിലേക്കും കോളേജിലേക്കും പാർട്ടികൾക്കും പോകാൻ പറ്റിയ ബാഗുകൾ, എന്നിങ്ങനെ നിവരധി കാര്യങ്ങൾ ഇവിടെ നിന്നും മേടിക്കാം.

5. കൊമേഷ്യൽ സ്ട്രീറ്റ്

ബാംഗ്ലൂരിൽ ഏറ്റവുമധികം ആളുകൾ പോകുന്ന ഷോപ്പിങ് സ്ട്രീറ്റുകളിൽ ഒന്നാണ് കൊമേഷ്യൽ സ്ട്രീറ്റ്. റോഡിന് രണ്ടു വശത്തുമായി നിരന്നു നിൽക്കുന്ന കടകളാണ് ഇവിടെയുള്ളത്. എന്തൊക്കെയാണ് മേടിക്കേണ്ടത് എന്നൊരു ധാരണയോടെ വന്നാൽ പോലും ഇവിടുത്തെ കടകൾ കണ്ട് അവിടുത്തെ വില കൂടി അറിഞ്ഞാൽ ലിസ്റ്റില്‌ ഇല്ലാത്തതടക്കം ഷോപ്പിങ് നടത്തിയേ മടങ്ങൂ. ഡിസൈനർ വസ്ത്രങ്ങൾ മുതൽ ബ്രാൻഡഡ് വസ്ത്രങ്ങളുടെ സെക്കൻഡ് സെയിലും ഇവിടെ കാണാം. ഏറ്റവും ലാഭം വഴിയരികിലെ തുണിത്തരങ്ങൾ തന്നെയാണ്.

രാവിലെ ഇറങ്ങിയാലും രാത്രിയായാലും ഇവിടെ കാഴ്ചകളും ഷോപ്പിങും തീരില്ല. വഴിയരികിൽ നിന്ന് ഒരു ഫ്രൂട്ട് ബൗളും മേടിച്ച് നടക്കാൻ തുടങ്ങിയാൽ എത്ര നേരം വേണമെങ്കിലും മടുക്കാതെ ഇവിടെയിരിക്കാം. വിൻഡോ ഷോപ്പിങ്ങിന് പറ്റിയ സ്ഥലങ്ങളും ഇവിടെയുണ്ട്. അവധി ദിവസങ്ങളിൽ ഇവിടെ വന്ന് ഒന്നും മേടിച്ചില്ലെങ്കിൽ പോലും വ്യത്യസ്തമായ ഒരനുഭവമായിരിക്കും ഇത്.