ഒരു ദർശനത്തിൽ ജീവിതം മാറിമറിയും, പോകണം ഗുരുവായൂർ ക്ഷേത്രത്തിൽ

തിരുവോണം

ജ്യോതിശാസ്ത്രത്തിലെ 27 നക്ഷത്രങ്ങളിൽ 22-ാം നക്ഷത്രമാണ് തിരുവോണം. ഈ നക്ഷത്രക്കാരെക്കുറിച്ച് പറയുമ്പോൾ ഏറ്റവുമാദ്യം പറയണ്ടത് അവരുടെ ക്ഷമയും സത്യസന്ധതയും ആണ്. ആളുകളെ കേട്ടിരിക്കുവാനാണെങ്കിലും തങ്ങളുടെ കഠിനാധ്വാനത്തിന്റെ ഫലം കാത്തിരിക്കുവാനാണെങ്കിലും ഇവർ ക്ഷമ കാണിക്കും. ജീവിതത്തിൽ സത്യസന്ധത എന്ന ഗുണത്തിന് ഇവർ വളരെ പ്രാധാന്യം നല്കുന്നു. വാരിവലിച്ച് ചെയ്യാതെ കാര്യങ്ങൾ ചിട്ടയോടെ ചെയ്യുവാനാണ് തിരുവോണം നാളിൽ ജനിച്ചവർക്ക് താല്പര്യം. വൃത്തിക്കും ഇവർ പ്രാധാന്യം നല്കുന്നു.
പരാജയത്തെപ്പറ്റി ചിന്തിക്കാതെ ഭാവി മുന്നിൽക്കണ്ട് പ്രവര്‍ത്തിക്കുന്നവരാണ് ഈ രാശിക്കാർ. കഷ്ടപ്പെടുന്നവരെ പണം നല്കി സഹായിക്കുന്ന കാര്യത്തിൽ രണ്ടാമതൊന്ന് ഇവർ ആലോചിക്കില്ല. മറ്റുള്ളവരോട് നന്നായി പെരുമാറുവാനും ഇവർ ശ്രദ്ധിക്കാറുണ്ട്. മാത്രമല്ല, ഒരു കാര്യം ആരംഭിക്കുന്നതിനു മുൻപ് അതിന്റെ എല്ലാ വശങ്ങളെക്കുറിച്ചും അവർ കൃത്യമായി ആലോചിച്ച ശേഷം മാത്രമേ മുന്നിട്ടിറങ്ങുകയുള്ളൂ

തിരുവോണം നക്ഷത്രക്കാരുടെ ജന്മ നക്ഷത്ര ക്ഷേത്രം

കേരളത്തിലെ ഏറ്റവും വലിയ ഹൈന്ദവ തീർത്ഥാട ക്ഷേത്രങ്ങളിലൊന്നായ ഗുരുവായൂർ ക്ഷേത്രമാണ് തിരുവോണം നക്ഷത്രക്കാരുടെ ജന്മ നക്ഷത്ര ക്ഷേത്രം ആയി അറിയപ്പെടുന്നത്. ഗുരുവായൂരപ്പനായി ആരാധിക്കുന്ന കൃഷ്ണനെ കണ്ടു തൊഴുതു പ്രാർത്ഥിക്കുവാൻ ആയിരങ്ങളാണ് ഓരോ ദിവസവും ഇവിടെ എത്തുന്നത്. തൃശൂർ ജില്ലയിലെ ഗുരുവായൂർ ക്ഷേത്രമുള്ളത്.

ഗുരുവായൂർ ക്ഷേത്രം

ദക്ഷിണേന്ത്യയുടെ ദ്വാരക എന്നാണ് വിശ്വാസികൾക്കിടയിൽ ഗുരുവായൂർ ക്ഷേത്രം അറിയപ്പെടുന്നത്. വൈഷ്ണവ വിശ്വാസികളുടെ ഏറ്റവും പ്രധാനപ്പെട്ട തീർത്ഥാടന കേന്ദ്രങ്ങളിലൊന്നായി അറിയപ്പെടുന്ന ഇവിടെ ഇന്ത്യയുടെ വിവിധ ഭാഗങ്ങളിൽ നിന്നും വിശ്വാസികളെത്താറുണ്ട്. പണ്ടുകാലം മുതലേ പുണ്യഭൂമിയായും വിശുദ്ധ ക്ഷേത്രമായും ഗുരുവായൂരിനെ കണക്കാക്കി പോരുന്നു.

പുലർച്ചെ മൂന്നു മുതൽ

മലയാള മാസത്തിലെ എല്ലാ ഒന്നാം തിയതികളിലും വിഷു നാളിലുമാണ് ഗുരുവായൂർ ക്ഷേത്രത്തിൽ ഏറ്റവുമധികം വിശ്വാസികളെത്തുന്നത്. പുലർച്ചെ മൂന്നു മണിക്ക് ഭഗവാനെ പള്ളിയുണർത്തുന്നതോടു കൂടി ഗുരുവായൂരിലെ ഒരു ദിവസം ആരംഭിക്കും. നാരായണീയവും ഹരിനാമകീർത്തവും ജ്ഞാനപ്പാനയും ശംഖനാദവും തകിലും നാദസ്വരവും കൊണ്ടാണ് ഇവിടെ ഭഗവാനെ പള്ളിയുണർത്തുന്നത്.

ശ്രീകൃഷ്ണന്‍ പൂജിച്ചിരുന്ന വിഗ്രഹം

ഒരുപാട് പ്രത്യേകതകളുള്ള വിഗ്രഹമാണ് ഗുരുവായൂരിലെ ശ്രീകൃഷ്ണ വിഗ്രഹം. ദേവഗുരുവായ ബൃഹസ്പതിയും വായൂ ദേവനും ചേർന്ന് പ്രതിഷ്ഠ നടത്തിയ ക്ഷേത്രമാണ് ഗുരുവായൂർ എന്നാണ് വിശ്വാസം. ഗുരുവായൂർ പ്രതിഷ്ഠ നടന്ന ദിവസമാണ് ഗുരുവായൂർ ഏകാദശിയായി ആചരിക്കുന്നത്. വൃശ്ചിമാസത്തിലെ വെളുത്ത ഏകാദശി ദിവസം ആണിത്.

ഗുരുവായൂരിലെ ദർശനങ്ങൾ

ഗുരുവായൂർ ക്ഷേത്രത്തിലെ ദർശനങ്ങൾക്ക് ഓരോ ഫലങ്ങൾ ഉണ്ടെന്നാണ് വിശ്വാസം. ആദ്യം പുലർച്ചെ മൂന്നു മണിക്കുള്ള നിർമ്മാല്യ ദർശനം ആണ് ഇവിടുത്തെ ആദ്യ ദർശനം. ഗുരുവായൂരപ്പനെ വിശ്വരൂപത്തിലാണ് ഇവിടെ നിർമ്മാല്യ ദർശനം. തുടർന്ന് വാകച്ചാര്‍ത്ത്, തൈലാഭിഷേക ദർശനം, പാലഭിഷേകം, ബാലഗോപാലഭാവം,ശംഖാഭിഷേകം,‌‌‌പന്തീരടി പൂജ, ശ്രീഭൂതബലി, ദീപാരാധന,അത്താഴപൂജ, തൃപ്പുക, കൃഷ്ണനാട്ട ദര്‍ശനം, തുടങ്ങിയവയാണ് ഇവിടുത്തെ പ്രധാനപ്പെട്ട ദർശനങ്ങൾ. ഓരോ ദര്‍ശനത്തിനും ഓരോ ഫലമാണെന്നാണ് വിശ്വാസം.

ഗുരുവായൂർ ക്ഷേത്രം മാത്രമല്ല

ഗുരുവായൂരിൽ ഉണ്ണിക്കണ്ണനെ ദർശനം മാത്രം ദർശിച്ചു മടങ്ങിയാൽ ഗുരുവായൂർ ദർശനം പൂർത്തിയാകില്ല എന്നാണ് വിശ്വാസം. സമീപത്തു തന്നെയുള്ള മമ്മിയൂർ മഹാദേവക്ഷേത്രം, തിരുവെങ്കിടം ക്ഷേത്രം, പാർഥസാരഥി ക്ഷേത്രം എന്നീ മൂന്നു ക്ഷേത്രങ്ങൾ കൂടി ഇവിടെയെത്തുന്നവർ ദര്‍ശനം നടത്തുന്നു.