ഏറ്റുമാനൂർ ഉത്സവം 2023: കാത്തിരിക്കാം ഐശ്വര്യം നല്കുന്ന ഏഴരപ്പൊന്നാന ദര്‍ശനത്തിനായി

ഏറ്റുമാനൂർ ഉത്സവം

നാടും നഗരവും ഒരേ മനസ്സോടെ, ഭക്തിയിലും വിശ്വാസത്തിലും ഒരേപോലെ കൊണ്ടാടുന്ന പത്ത് ദിവസങ്ങളാണ് ഏറ്റുമാനൂർ ക്ഷേത്രത്തിലെ ഓരോ ഉത്സവകാലവും. കുംഭമാസത്തിൽ കേരളത്തില്‍ നടക്കുന്ന ഏറ്റവും വലിയ ആഘോഷങ്ങളിലൊന്ന് ഏറ്റുമാനൂരിലെ ഏഴരപ്പൊന്നാനയും ഉത്സവവും തന്നെയാണ്.

PC:Hari vaikom(harish)

ഏറ്റുമാനൂർ ഉത്സവം 2023

കുംഭത്തിലെ ചതയം ദിനത്തില്‍ കൊടിയേറുന്ന ഏറ്റുമാനൂർ ഉത്സവത്തിന്‍റെ ആറാട്ട് തിരുവാതിര ദിനത്തിൽ ആണ് നടക്കുന്നത്. എട്ടാമത്തെ ഉത്സവദിവസമായ വെളുത്ത പക്ഷത്തിലെ രോഹിണി ദിനത്തിൽ അര്‍ധരാത്രിയിലാണ് ഏഴരപ്പൊന്നാനകളെ പുറത്തെഴുന്നള്ളിക്കുന്നത്. 2023ലെ ഏറ്റുമാനൂർ ഉത്സവത്തിന് ഫെബ്രുവരി 21ന് കൊടിയേറി. 28ന് ഏഴരപ്പൊന്നാന ദർശനം നടക്കും. മാർച്ച് രണ്ടാം തിയതിയാണ് പ്രസിദ്ധമായ ആറാട്ട്. പേരൂരിലെ മീനച്ചിലാറ്റിലാണ് ആറാട്ട് നടക്കുന്നത്.

PC:Ranjithsiji

ഏഴരപ്പൊന്നാന ദർശനം

വിശ്വാസികളെ സംബന്ധിച്ചെടുത്തോളം ഏറ്റുമാനൂരപ്പന്‍റെ സന്നിധിയിലെ ഏഴരപ്പൊന്നാനകളെ കാണുന്നതിനോളം സാഫല്യവും പുണ്യവും മറ്റൊന്നിനും നല്കുവാൻ സാധിക്കില്ല. എട്ടാം ഉത്സവദിനത്തിൽ(2023 ഫെബ്രുവരി 28ന് ) രാത്രി 12 മണി മുതല്‍ ദര്‍ശനം സാധ്യമാകും. അഷ്ടദിഗ്ഗജങ്ങളായ ഐരാവതം, പുണ്ഡരീകം, കുമുദം, അഞ്ജന, പുഷ്പദന്തൻ, സുപ്രതീകൻ, സാർവഭൗമൻ, വാമനൻ എന്നിവരെ പ്രതിനിധീകരിക്കുന്നവരാണ് ഏഴരപ്പൊന്നാനകൾ എന്നാണ് വിശ്വാസം.

PC:Sivavkm

ഏഴരപ്പൊന്നാന ദർശനം 2023

വർഷത്തിൽ കുംഭമാസത്തിലെ രോഹിണി ദിനത്തിൽ മാത്രമാണ് ഏഴരപ്പൊന്നാനകളെ ദർശിച്ച് പ്രാർത്ഥിക്കുവാനുള്ള അവസരം വിശ്വാസികൾക്കുള്ളത്. ആസ്ഥാനമണ്ഡപത്തിലെ എഴുന്നള്ളിപ്പിനും തുടർന്നുള്ള ആറാട്ടിനും മാത്രമായാണ് ഏഴരപ്പൊന്നാനകളെ പുറത്തെടുക്കുന്നത്. ഇത് ദർശിക്കുവാനും കാണിക്ക സമർപ്പണം നടത്തുവാനുമായും വിശ്വാസികൾ ഇവിടേക്ക് വരുന്നു. സകല ദേവന്മാരും ഈ സമയത്ത് ഇവിടെ എഴുന്നള്ളുമെന്നാണ് വിശ്വാസം. പ്രസിദ്ധമായ ആസ്ഥാനമണ്ഡപ ദർശനം നടക്കുന്നതും ഈ സമയത്ത് തന്നെയാണ്. പ്രത്യേകം തയ്യാറാക്കിയ ഒരു പീഠത്തില്‍ ഭഗവാന്‍റെ തിടമ്പ് കൊണ്ടുവരുന്നതോടെ ഈ ചടങ്ങുകൾക്ക് തുടക്കമാകും. ഇതിനു മുന്നിലാണ് വലിയ കാണിക്ക എന്നറിയപ്പെടുന്ന കാണിക്ക് വിശ്വാസികൾ ഏറ്റുമാനൂരപ്പന് സമർപ്പിക്കുന്നത്. കാണിക്കയിടുന്ന സമയത്ത് ഏഴരപ്പൊന്നാനകളെ ഇവിടേക്ക് കൊണ്ടുവരും.. തിടമ്പിന്റെ വലതു ഭാഗത്ത് മൂന്ന് പൊന്നാനകളെയും ഇടതു ഭാഗത്ത് നാലു പൊന്നാനകളെയുമാണ് വയ്ക്കുക. അരപ്പൊന്നാനയെ തിടമ്പിന്‍റെ താഴെയാണ് സൂക്ഷിക്കുന്നത്.

PC:RajeshUnuppally

ഏറ്റുമാനൂർ ഉത്സവം പ്രധാന തിയതികൾ

കൊടിയേറ്റ് (ഒന്നാം ഉത്സവം)
ഫെബ്രുവരി 21 (1198 കുംഭം 9) ചൊവ്വാഴ്ച

ഏഴരപ്പൊന്നാന ദർശനം (എട്ടാം ഉത്സവം )
ഫെബ്രുവരി 28 (1198 കുംഭം 16) ചൊവ്വാഴ്ച

പള്ളിവേട്ട (ഒൻപതാം ഉത്സവം )
മാർച്ച്‌ 1 (1198 കുംഭം 17) ബുധനാഴ്ച

ആറാട്ട് പത്താം ഉത്സവം )
മാർച്ച്‌ 2 (1198 കുംഭം 18) വ്യാഴാഴ്ച

എട്ടാം ഉത്സവദിനമായ 28ന് സിനിമാതാരം ജയറാമും സംഘവും അവതരിപ്പിക്കുന്ന സ്പെഷ്യൽ പഞ്ചാരിമേളം നടക്കും. രാത്രി 12ന് ആസ്ഥാന മണ്ഡപത്തിൽ ഏഴരപ്പൊന്നാന ദർശനവും വലിയ കാണിക്കയും നടക്കും. പള്ളിവേട്ട ദിനമായ മാർച്ച് 1ന് രാവിലെ 7 മണിക്ക് നടക്കുന്ന ശ്രീബലിയിൽ കുടമാറ്റം നടക്കും. തുടർന്ന് മട്ടന്നൂർ ശങ്കരൻകുട്ടി മാരാരും സംഘവും അവതരിപ്പിക്കുന്ന മേജർസെറ്റ് പഞ്ചാരിമേളം നടക്കും. വൈകിട്ട് അഞ്ചിന് കാഴ്ച ശ്രീബലിയും, കുടമാറ്റവും, വേല - സേവ എന്നിവയുമുണ്ടാവും ചോറ്റാനിക്കര സുഭാഷ് നാരായണ മാരാരും സംഘവും അവതരിപ്പിക്കുന്ന സ്പെഷ്യൽ പഞ്ചവാദ്യവും നടക്കും. രാത്രി 12ന് പള്ളിവേട്ട ദീപക്കാഴ്ച. ആറാട്ട് ദിവസമായ മാർച്ച് 2ന്‌ ഉച്ചയ്ക്ക് 12ന് ആറാട്ട് ബലി, പുറപ്പാട്. രാത്രി 12ന് എതിരേൽപ് മണ്ഡപത്തിൽ ആറാട്ട് എതിരേൽപ്. തുടർന്ന് ക്ഷേത്ര മൈതാനത്ത് എഴുന്നള്ളിപ്പ്. തുടർന്ന് ഉത്സവം കൊടിയിറങ്ങും.

PC:Rklystron