വലുപ്പത്തില്‍ അമ്പരിപ്പിക്കുന്ന അഞ്ച് ഡാമുകള്‍

ഉയരത്തിൽ ഒന്നാമൻ

ഇന്ത്യയിലെ ഏറ്റവും ഉയരം കൂടിയ ഡാം സ്ഥിതി ചെയ്യുന്നത് ഉത്തരാഖണ്ഡിലാണ്. ഭഗീരഥി നദിക്ക് കുറുകേ നിർമ്മിച്ച തെ‌ഹ്‌രി അണക്കെട്ടാണ് ഇന്ത്യയിലേ ഏറ്റവും ഉയരം കൂടിയ അണക്കെട്ട്. ലോകത്തിൽ ഉയരത്തിന്റെ കാര്യത്തിൽ എട്ടാം സ്ഥാനത്താണ് ഈ അണക്കെട്ട്. 261 മീറ്റർ ആണ് ഈ അണക്കെട്ടിന്റെ ഉയരം.
ചിത്രത്തിന് കടപ്പാട് : Arvind Iyer

വലുപ്പത്തിൽ ഒന്നാമൻ

ഇന്ത്യയിലെ ഏറ്റവും വലുപ്പം കൂടിയ ഡാം സ്ഥിതി ചെയ്യുന്നത് ഹിമാചൽപ്രദേശിലാണ്. സത്‌ലജ് നദിക്ക് കുറുകെ നിർമ്മിച്ച ഭക്ര നംഗൽ അണക്കെട്ടിനാണ് ഈ പ്രശസ്തി. 225 മീറ്റർ ആണ് ഈ ഡാമിന്റെ ഉയരം. വലുപ്പത്തിന്റെ കാര്യത്തിൽ ഏഷ്യയിൽ രണ്ടാം സ്ഥാനമുണ്ട് ഈ അണക്കെട്ട് ഭീമന്.

ചിത്രത്തിന് കടപ്പാട് : KawalSingh

നീളത്തിൽ ഒന്നാമൻ

ഇന്ത്യയിൽ ഏറ്റവും നീളം കൂടിയ ഡാം സ്ഥിതി ചെയ്യുന്നത് ഒറീസയിലാണ്. മഹാനദിക്ക് കുറകെ നിർമ്മിച്ച ഹിരകുഡ് ഡാം ആണ് ഇന്ത്യയിൽ ഏറ്റവും നീളം കൂടിയ ഡാം. 26 കിലോമീറ്റർ ആണ് ഡാമിന്റെ നീളം. ഡാമിന് സമീപത്തായി രണ്ട് നിരീക്ഷണ ടവറുകളും നിർമ്മിച്ചിട്ടുണ്ട്. ഗാന്ധി മിനാർ, നെഹ്രു മിനാർ എന്നിങ്ങനെയാണ് ടവറുകളുടെ പേര്.

ചിത്രത്തിന് കടപ്പാട് : Quarterbacker

കരിങ്കല്ലിൽ നിർമ്മിച്ചതിൽ ഏറ്റവും വലുത്

കരിങ്കല്ലിൽ നിർമ്മിച്ച അണക്കെട്ടുകളിൽ ലോകത്ത് തന്നെ ഏറ്റവും വലിയ അണക്കെട്ട് സ്ഥിതി ചെയ്യുന്നത് ആന്ധ്രാപ്രദേശിലാണ്. 124 മീറ്റർ ഉയരത്തിൽ നിർമ്മിച്ചിട്ടുള്ള നാഗാർജുന സാഗർ അണക്കെട്ടിനാണ് ഈ റെക്കോർഡ്. 1.6 കിലോമീറ്റർ ആണ് കൃഷ്ണാ നദിക്ക് കുറുകെ നിർമ്മിച്ച ഈ ഡാമിന്റെ നീളം.

ചിത്രത്തിന് കടപ്പാട് : Sumanthk

നാല് സംസ്ഥാനങ്ങളെ നനയ്ക്കുന്ന ഡാം

നർമദ ഡാം എന്ന് അറിയപ്പെടുന്ന സർദാർ സരോവർ ഡാമാണ് ഇന്ത്യയിൽ പ്രശസ്തമായ മറ്റൊരു ഡാം. 163 മീറ്റർ ആണ് ഈ ഡാമിന്റെ ഉയരം. ഗുജറാത്തിലാണ് ഈ ഡാം സ്ഥിതി ചെയ്യുന്നത്. മധ്യപ്രദേശ്, മഹാരാഷ്ട്ര, രാജസ്ഥാൻ എന്നീ സംസ്ഥാനങ്ങളും ഈ ഡാമിനെ ആശ്രയിക്കുന്നുണ്ട്.

ചിത്രത്തിന് കടപ്പാട് : Shahakshay58