മഞ്ഞ് അധികമായാൽ പണി പാളും! അതിശൈത്യത്തിൽ ഒഴിവാക്കാം ഇവിടങ്ങളിലേക്കുള്ള യാത്രകൾ

കഠിന ശൈത്യത്തിലെ യാത്ര

മഞ്ഞുകാലത്തെ കാഴ്ചകൾ ഓരോ നാട്ടിലും വ്യത്യസ്തമാണെങ്കിലും അതിലെ ഭംഗിയെന്നത് നാട് നല്കുന്ന ശൈത്യകാല അനുഭവങ്ങളാണ്. അങ്ങനെ നോക്കുമ്പോൾ സന്ദശിക്കുവാൻ പാടില്ലാത്തതായ ഒരു സ്ഥലവുമില്ല. എന്നാൽ ചില സ്ഥലങ്ങൾ മഞ്ഞിൽ അല്പം അപകടകാരികളാകും. പ്രതീക്ഷിക്കാത്ത അപകടങ്ങളും കുടുങ്ങിപ്പോകലുകളും നേരിടേണ്ടി വന്നേക്കാം ചിലപ്പോൾ വഴി മുഴുവൻ മഞ്ഞിൽ പൊതിഞ്ഞ് എന്തുചെയ്യണമെന്നറിയാതെ അകപ്പെട്ടു പോയേക്കാം. അതിനാൽ ചില സ്ഥലങ്ങൾ അതിശൈത്യകാലത്ത് നിർബന്ധമായും ഒഴിവാക്കണം.
PC:Ali Inay/ Unsplash

കേദര്‍നാഥ്

ഇന്ത്യയിലെ ഏറ്റവും പ്രസിദ്ധമായ ചാർ ദാം തീര്‍ത്ഥാടന കേന്ദ്രങ്ങളിൽ ഒന്നാണ് ഉത്തരാഖണ്ഡിലെ കേദര്‍നാഥ്. സമുദ്രനിരപ്പിൽ നിന്ന് 3584 മീറ്റർ ഉയരത്തിൽ സ്ഥിതി ചെയ്യുന്ന ഇവിടം ഗർവാൾ ഹിമാലയൻ പർവതനിരകൾക്കിടയിലായാണ് സ്ഥിതി ചെയ്യുന്നത്. സാധാരണയായി വേനൽക്കാലമാണ് ഇവിടെ യാത്രയ്ക്കായി തുറന്നു കൊടുക്കുന്നത്.
മേയ് മാസം മുതൽ ഒക്ടോബർ-നവംബർ വരെയാണ് ക്ഷേത്രം ദർശനത്തിനായി തുറന്നു നല്കുന്നത്. അതിനു ശേഷം ആറുമാസത്തോളം കാലം ഇവിടെ അതിശൈത്യമായിരിക്കും. ഈ സമയത്ത് ക്ഷേത്രം അടച്ചിടുകയാണ് ചെയ്യുന്നത്. അതീവ തണുപ്പുള്ള കാലത്ത് ഇവിടേക്കുള്ള യാത്ര അപകടമാണ്. ഈ സമയത്ത് ഒരിക്കലും കേദാർനാഥിലേക്ക് യാത്ര ചെയ്യരുത്. മഴക്കാലത്തും ഇവിടേക്കുള്ള യാത്ര ഒഴിവാക്കുന്നതാണ് നല്ലത്.

PC:TEJASHVI VERMA/ Unsplash

ശ്രീനഗർ

വിന്‍ററിലെ ഏറ്റവും ജനപ്രിയ ലക്ഷ്യസ്ഥാനമാണ് കാശ്മീരിലെ ശ്രീനഗർ. നവംബർ മുതൽ മാർച്ച് വരെ ഇവിടെ വരാമെങ്കിലും അതീവ ശൈത്യം അനുഭവപ്പെടുന്ന സമയത്ത് യാത്ര ഒഴിവാക്കുകയാണ് നല്ലത്. സമുദ്ര നിരപ്പിൽ നിന്നും 1585 മീറ്റർ ഉയരത്തിൽ സ്ഥിതി ചെയ്യുന്ന ഇവിടം ഝലം നദിയ്ക്ക് സമാന്തരമാായണ് കിടക്കുന്നത്. ഇന്ത്യയിലെ ഏറ്റവും തണുപ്പേറിയ സ്ഥലങ്ങളിൽ ഒന്നു കൂടിയാണിത്. കനത്ത ശൈത്യത്തിൽ ഈ പ്രദേശം മുഴുവനും മഞ്ഞിൽ മൂടിയ പോലെ നിൽക്കും. മാത്രമല്ല, കനത്ത മഞ്ഞുവീഴ്ചയും മൈനസ് താപനിലയും ഈ സമയങ്ങളിൽ വളരെ സാധാരണമാണ്. മൈനസ് രണ്ടു ഡിഗ്രി മുതൽ 12 ഡിഗ്രി വരെ ഇവിടെ തണുപ്പെത്തും.

PC:imad Clicks/ Unsplash

ലേ ല‍ഡാക്ക്

തണുപ്പു കാലത്ത് സാഹസികർ ചെന്നെത്തുവാൻ ആഗ്രഹിക്കുന്ന ലക്ഷ്യസ്ഥാനങ്ങളിൽ ഒന്നാണ് ലേയും ലഡാക്കും. വഴിയാണോ എന്നു സംശയം തോന്നിപ്പിക്കുന്ന തരത്തിലുള്ള പാതകൾ മാത്രമല്ല, അതിന്റെ ഘടനയും ഭൂപ്രകൃതിയുമെല്ലാമാണ് ഇതിനെ സാഹസികമാക്കുന്നത്. വേനല്ക്കാലത്ത് ഇവിടേക്കുള്ള വഴികൾ മിക്കപ്പോഴും മഞ്ഞുവീണ് കിടക്കുകയാവും. ഇത് യാത്രയെ ദുർഘടമാക്കുന്നു. സമുദ്രനിരപ്പിൽ നിന്ന് 3000 മീറ്റർ ഉയരത്തിൽ, ഏറ്റവും ഉയർന്ന മനുഷ്യവാസ കേന്ദ്രം കൂടിയാണ് ലേ. സമുദ്രനിരപ്പിൽ നിന്ന് 11,000 അടി ഉയരത്തിൽ ലഡാക്ക് അത്ഭുതകരമായ കാഴ്ചകള്‍ നല്കുന്നു. സുരക്ഷിതമായ യാത്രയ്ക്ക് മഞ്ഞുകാലം ഒഴിവാക്കി ജൂൺ മുതൽ സെപ്റ്റംബർ വരെയുള്ള സമയം തിരഞ്ഞെടുക്കുക.

PC:Ravi Hooda/ Unsplash

ലാചെനും തംഗ്ലി വാലിയും

ഹിമാചൽ പ്രദേശിലും ഉത്തരാഖണ്ഡിലും മാത്രമല്ല, സിക്കിമിലെ ചില ഇടങ്ങളിലും ശൈത്യം അതിന്‍റെ കഠിനത കാണിക്കും. അതിനു പലപ്പോഴും ഇരയാകുന്നത് ഇവിടുത്തെ ലാചെനും തംഗ്ലി വാലിയും ആണ്. സാധാരണ പോലെ മഞ്ഞു വീഴ്ചയുള്ള കാലത്ത് പകരംവയ്ക്കുവാനാകാത്ത കാഴ്ചകൾ ഇവിടം നിങ്ങൾക്ക് തരുന്നു. വടക്കൻ സിക്കിമിലാണ് ഇവിടമുള്ളത്. കനത്ത തണുപ്പ് ആണെങ്കിൽ പൂജ്യത്തിലും താഴെ താപനിലയെത്തും. സമുദ്രനിരപ്പിൽ നിന്ന് 2,500 മീറ്റർ ഉയരത്തിൽ ആണ് ഇവിടമുള്ളത്.

PC: Nandita Paul/ Unsplash