മഹാശിവരാത്രി: ഏഴു തലമുറകൾക്ക് പാപമോചനവും മോക്ഷവും, എട്ടു പുരാണങ്ങളിലും പറയുന്ന ശിവക്ഷേത്രം!

തൃശൂൽ ഭേദ് ക്ഷേത്രം

മധ്യ പ്രദേശിൽ ജബൽപൂരിൽ നൻഹഖേഡാ എനന് സ്ഥലത്താണ് പ്രസിദ്ധമായ തൃശൂൽ ഭേദ് ക്ഷേത്രം സ്ഥിതി ചെയ്യുന്നത്. ഈ ക്ഷേത്രത്തിൽ ദർശനം നടത്തുവാൻ ശ്രമങ്ങൾ കുറച്ചൊന്നുമല്ല വേണ്ടതെങ്കിൽക്കൂടിയും ഓരോ ശിവഭക്തനും എത്ര പരിശ്രമിച്ചും ഇവിടെ വരുവാൻ തയ്യാറാണ് എന്നതാണ് ഈ ക്ഷേത്രത്തിന്റെ മാഹാത്മ്യം. അധികമാർക്കും അറിയാത്ത ഒരു ക്ഷേത്രം കൂടിയാണിത്. ത്രിശൂൽ ഭേദ് മന്ദിർ എന്നും ഇതറിയപ്പെടുന്നു.

കൈലാസത്തോളം പുണ്യമായ ഇടം

ബഹളങ്ങളിൽ നിന്നെല്ലാം അകന്ന്, ജബൽപൂരിലെ ഏറ്റവും ശാന്തമായ ഒരിടത്താണ് ഈ ക്ഷേത്രമുള്ളത്. ഹിമാലയമോ കൈലാസമോ പോലെ തീർത്തും ശാന്തമാണ് ഇവിടം. ദൂരത്തിന്റെ കണക്കിൽ ജബൽപൂരിൽ നിന്നും വെറും മുപ്പത് കിലോമീറ്റർ ദൂരം മാത്രമേയുള്ളുവെങ്കിലും എത്തിച്ചേരണമെങ്കിൽ കഠിന വഴികൾ താണ്ടണം. കാടിനുള്ളിലൂടെയുള്ള വഴിയിലൂടെയാണ് ഇവിടേക്ക് വരേണ്ടത്. എന്നാൽ യാത്രയുടെ പ്രയാസവും ക്ഷീണങ്ങളും ക്ഷേത്രത്തിലെത്തി ശിവനെ ദർശിക്കുമ്പോൾ മാറും,

ശിവൻ പ്രത്യക്ഷമാകുന്ന ഇടം

തന്‍റെ ഭക്തരെയും ആശ്രിതരെയും അനുഗ്രഹിക്കുവാനായി ശിവൻ ഇവിടെ എന്നുമെണ്ടെന്നാണ് വിശ്വാസം. ഏതാഗ്രഹവും സാധിക്കുവാൻ തൃശൂൽ ഭേദ് ക്ഷേത്രത്തിലെ ദർശനം മതിയാകുമെന്ന് കാലാകാലങ്ങളായി ഇവിടെ വിശ്വസിച്ചുപോരുന്നു. എത്ര ക്ഷീണിച്ചു വരുന്നയാളും ഇവിടെ ദർശനം നടത്തിയാൽ പൂർണ്ണ ഊർജത്തിലേ തിരികെ മടങ്ങുകയുള്ളൂവത്രെ.

ഏഴ് ജന്മങ്ങളുടെ പാപം നീക്കുവാൻ

ഇവിടെയത്തി ശിവനെ ദർശിക്കുന്നത് ഏഴു ജന്മങ്ങളുടെ പാപം ഇല്ലാതാക്കുമത്രെ. പാപം നീക്കി മോക്ഷഭാഗ്യം നേടുവാൻ സഹായിക്കുന്നതാണ് തൃശൂൽ ഭേദ് ക്ഷേത്ര ദർശനം എന്നാണ് വിശ്വസിക്കുന്നത്. മാത്രമല്ല ശിവരാത്രി ദിനങ്ങളിൽ ഇവിടം ദർശിച്ചാൽ ഇരട്ടി പുണ്യമുണ്ടാകുമത്രെ.

ത്രിശൂൽ ഭേദ് എന്ന പേരിനു പിന്നില്‍

സാധാരണ ക്ഷേത്രനാമങ്ങളിൽ നിന്നും വ്യത്യസ്തമായി ത്രിശൂൽ ഭേദ് എന്നു ഈ ക്ഷേത്രത്തിനു പേരു വരുവാൻ ഒരു കാരണമുണ്ട്. ശിവപുരാണത്തിലെ ഐതിഹ്യം അനുസരിച്ച് അന്ധകാസുരൻ എന്ന അസുരൻ തപസ്സനുഷ്ഠിച്ച് ശിവനിൽ നിന്നും അനശ്വരതയുടെ വരം നേടി. അതോടെ ലോകത്തെ മുഴുവൻ ഉപദ്രവിക്കുവാൻ തുടങ്ങിയ അന്ധകാരുസനിൽ നിന്നും ദേവന്മാർക്കും മഹര്‍ഷികൾക്കും ഒന്നും ഒരു രക്ഷയുമില്ലായിരുന്നു. ആർക്കും തകർക്കുവാൻ കഴിയില്ല എന്നായിരുന്നു വരമെന്നതിനാൽ വരം നല്കിയ ഭോലാറാം ആയ ശിവൻ പോലും പരാജയപ്പെട്ടു.

ത്രിശൂലം വരുന്നു

ഒന്നും ആർക്കും ചെയ്യുവാൻ കഴിയാതെ വന്നപ്പോള് ഭോലേനാഥ് തന്റെ ത്രിശൂലത്തോട് അന്ധകാസുരനെ വധിക്കുവാൻ ആവശ്യപ്പെട്ടു, അന്ധകാസുരനെ വധിച്ചാൽ തന്റെ എല്ലാ ദിവ്യശക്തികളും നഷ്ടപ്പെടും എന്നതിനാൽ ത്രിശൂൽ അതിന് വിസമ്മതിച്ചു. എന്നിരുന്നാലൂം പിന്നീട് ത്രിശൂൽ ആ കർത്തവ്യം ഏറ്റെടുക്കുകയും അന്ധകാസുരനെ വധിക്കുകയും ചെയ്തു. അതോടെ ത്രിശൂലിന്റെ എല്ലാ ശക്തിയും പോയി. പിന്നീട് ശിവൻ തന്റെ ത്രീശൂലത്തെ പഴയപോലെയാക്കുവാൻ എല്ലാ പുണ്യസ്ഥലങ്ങളിലും കൊണ്ടുപോവുകയും പുണ്യനദികളിൽ സ്നാനം നടത്തുകയും ചെയ്തു. നർമ്മദ നദിയിൽ ഇങ്ങനെ സ്നാനം നടത്തിയപ്പോൾ ത്രിശൂലത്തിന് പഴയ ശക്തി ലഭിച്ചു. അതുകൊണ്ടാണ് ഈ സ്ഥലത്തെ ത്രിശൂൽ ഭേദ് മന്ദിർ എന്ന് വിളിക്കുന്നത്.