വിശ്വാസങ്ങളിലേയും ആചാരങ്ങളിലെയും പ്രത്യേകതകള് കൊണ്ട് ലോകം ശ്രദ്ധിക്കുന്ന ക്ഷേത്രങ്ങള് ഒരുപാടുണ്ട്. ചിലയിടങ്ങളിലെ പ്രതിഷ്ഠകളാണ് പ്രധാനമെങ്കില് മറ്റിടങ്ങളില് അത് ക്ഷേത്രം സ്ഥിതി ചെയ്യുന്ന സ്ഥലമോ വിശ്വാസങ്ങളോ ഐതിഹ്യങ്ങളോ ഒക്കെയാവാം. അത്തരത്തില് കൗതുകമുണര്ത്തുന്ന ഒന്നാണ് മഹാരാഷ്ട്രയിലെ സപ്തശൃംഗി ക്ഷേത്രം. സതീദേവിയുടെ ശക്തിപീഠങ്ങളിലൊന്നായ ഈ ക്ഷേത്രത്തെ 'അരശക്തിപീഠം' എന്നാണ് വിളിക്കുന്നത്. ഹൈന്ദവ വിശ്വാസങ്ങളില് പ്രത്യേക സ്ഥാനം അലങ്കരിക്കുന്ന സപ്തശൃംഗി ക്ഷേത്രത്തെക്കുറിച്ച് വിശദമായി വായിക്കാം
സ്വയംഭൂ ദേവി
സപ്തശൃംഗി ക്ഷേത്രത്തിലെ ദേവിയുടെ പ്രതിഷ്ഠ സ്വയംഭൂ ആണെന്നാണ് വിശ്വാസം. രണ്ടു നിലകളിലായി നിര്മ്മിച്ചിരിക്കുന്ന ക്ഷേത്രത്തില് മുകളിലാണ് ദേവിയുടെ പ്രതിഷ്ഠ.
8 അടി ഉയരത്തില്, പതിനെട്ട് കൈകളോടു കൂടി സിന്ദൂരത്തില് പൊതിഞ്ഞതാണ് ഇവിടുത്തെ ദേവിയുടെ രൂപം. മഹിഷാസുരനെ വധിക്കാൻ ദേവിക്ക് ദേവിദേവന്മാര് സന്നാമമായി നല്കിയ ആയുധങ്ങളണിഞ്ഞാണ് ഇവിടെ ദേവിയുള്ളത്. സര്വ്വാഭരണ വിഭൂഷയായാണ് ദേവിയുടെ നില്പ്.
ദേവിയെയും അവതാരങ്ങളെയും പ്രകീര്ത്തിക്കുന്ന ദേവീ മാഹാത്മ്യം ഇവിടെ വെച്ചാണ് മാര്ക്കണ്ഡേയ മുനി രചിച്ചതെന്നാണ് വിശ്വാസം. ഈ വാദത്തിന് ബലമേകുന്ന, മാർക്കണ്ഡേയ മുനിയുടെ വാസസ്ഥലമായിരുന്നുവെന്ന് പറയപ്പെടുന്ന ഒരു ഗുഹ മാര്ക്കണ്ഡേയ കുന്നുകളില് കാണാം.